ଦନ୍ତା ହାତୀର ଗଳିତ ମୃତଦେହ ମିଳିବା ଘଟଣାରେ ୨ ବନବିଭାଗ କର୍ମଚାରୀ ନିଲମ୍ବନ
ଓଡ଼ିଆ ନ୍ୟୁଜ,(ବ୍ୟୁରୋ): ଦନ୍ତାହାତୀର ଗଳିତ ମୃତଦେହ ଠାବ ଘଟଣାରେ ନିଲମ୍ବିତ ହେଲେ ଦୁଇ ବନବିଭାଗ କର୍ମଚାରୀ । ଏହି ଘଟଣାରେ ଜଣେ ବ୍ୟକ୍ତିଙ୍କୁ ଗିରଫ ବି କରାଯାଇଛି । ଜରପଡ଼ା ଫରେଷ୍ଟର୍ ଦିନବନ୍ଧୁ ନାୟକ ଓ ପରା ବିଟ୍ର ଦାୟିତ୍ବରେ ଥିବା ଫରେଷ୍ଟ ଗାର୍ଡ ମନୋଜ କୁମାର ନାଏକଙ୍କୁ ନିଲମ୍ବିତ କରାଯାଇଛି। ଡିଏଫ୍ଓ ନୀତୀଶ କୁମାର ଏନେଇ ସ୍ପଷ୍ଟ କରିଛନ୍ତି। ସୂଚନା ମୁତାବକ, ପ୍ରାୟ ୮ ଦିନ ତଳେ ଅନୁଗୋଳ ଜିଲ୍ଲା ବନଖଣ୍ଡ ଜରପଡା ବନାଞ୍ଚଳ ପରା ସଂରକ୍ଷିତ ଜଙ୍ଗଲରେ ଏକ ହାତୀର ଗଳିତ ମୃତଦେହ ଉଦ୍ଧାର ହୋଇଥିବା ବେଳେ ତଦନ୍ତ କରାଯାଇ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
କାର୍ଯ୍ୟରେ ଅବହେଳା ପାଇଁ ଜଣେ ଫରେଷ୍ଟର ଓ ଜଣେ ଫରେଷ୍ଟ ଗାର୍ଡଙ୍କୁ ନିଲମ୍ବିତ କରାଯାଇଛି । ସେହିପରି ହାତୀ ଦାନ୍ତ ଚୋରି ଅଭିଯୋଗରେ ରୋଡ଼ସିଙ୍ଗା ଗାଁ ଜଣେ ବ୍ୟକ୍ତିଙ୍କୁ ଗିରଫ କରାଯାଇଥିବା DFO ସୂଚନା ଦେଇଛନ୍ତି। ଚୋରି ହାତୀ ଦାନ୍ତକୁ ବି ଉଦ୍ଧାର କରାଯାଇଛି। ଅନ୍ୟପଟେ ଏହି ଘଟଣାରେ ରୋଡ଼ସିଂହାର ରୋହିତ ବେହେରା (୪୧)ଙ୍କୁ ଗିରଫ କରାଯାଇଛି। ତାଙ୍କ ଘରୁ ୨ଟି ଯାକ ହାତୀ ଦାନ୍ତ ଜବତ କରାଯାଇଛି। ଜୁନ ୨୮ ତାରିଖରେ ଜରପଡ଼ା ବନାଞ୍ଚଳର ସଂରକ୍ଷିତ ଜଙ୍ଗଲରେ ଥିବା ମାଙ୍କଡ଼କନ୍ଦା ନାଳରେ ଏକ ଦନ୍ତା ହାତୀର ଗଳିତ ମୃତଦେହ ମିଳିଥିଲା।
ହାତୀ ଶରୀରର ଆଭ୍ୟନ୍ତରୀଣ ଅଙ୍ଗ ପଚି ନଷ୍ଟ ହୋଇଯାଇଥିଲା। ଫଳରେ ହାତୀର ମୃତ୍ୟୁ ମାସେରୁ ଅଧିକ ସମୟ ପୂର୍ବରୁ ହୋଇଥିବା ପାରିପାର୍ଶ୍ବିକ ସ୍ଥିତିରୁ ଜଣାପଡ଼ିଥିଲା। ଏହି ଘଟଣାକୁ ନେଇ ଅନୁଗୁଳ ଆରସିସିଏଫ୍ ସୁଧାଂଶୁ ଶେଖର ଖରା, ଡିଏଫ୍ଓ ନୀତୀଶ କୁମାରଙ୍କ ସହ ଓୟୁଏଟିର ଏକ ଟିମ୍ ଯାଇ ହାତୀମୃତ୍ୟୁର ତଦନ୍ତ କରିଥିଲେ। ମୃତ ହାତୀର ବୟସ୨୦ରୁ ୨୫ ବର୍ଷ ହୋଇଥିବାବେଳେ ତାହା ଏକ ଦନ୍ତାହାତୀ ଥିଲା ବୋଲି ଡିଏଫ୍ଓ ସ୍ପଷ୍ଟ କରିଥିଲେ । ଏହି ଘଟଣାର ତଦନ୍ତ କରାଯାଇ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।