ଯୁବକଙ୍କୁ ମରଣାନ୍ତକ ଆକ୍ରମଣକାରୀ ୩ ଅଭିଯୁକ୍ତ ଗିରଫ

ଓଡ଼ିଆ ନ୍ୟୁଜ,(ବ୍ୟୁରୋ):  ବାଲେଶ୍ୱର ଟାଉନଥାନା ଅଧିନରେ ଗତ ୯ ତାରିଖରେ ଘଟିଥିବା ଯୁବକଙ୍କୁ ମରଣାନ୍ତକ ଆକ୍ରମଣ ଘଟଣାରେ ୩ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ବାଲେଶ୍ୱର ପୋଲିସ।ସୂଚନା ଅନୁସାରେ ଗତ ୯ତାରିଖ ସଂଧ୍ୟାରେ ଗେମ୍ ଚେଞର ପୂଜାକମିଟିର ଗଣେଷ ଠାକୁର ଭସାଣି ଶୋଭାଯାତ୍ରା ଚାଲୁଥିଲା। ମୋତିଗଞ ଛକ ନିକଟରେ କିଛି ଯୁବକ ହଠାତ ଶୋଭାଯାତ୍ରା ଭିତରକୁ ପଶିଆସି ପାରା ଓରଫ ପ୍ରଣୟ ଦାସ ନାମକ ଜଣେ ଯୁବକକୁ ଅତର୍କିତ ମରଣାନ୍ତକ ଆକ୍ରମଣ କରିଥିଲେ।

ଅଭିଯୁକ୍ତ ମାନେ ତୀକ୍ଷ୍ମ ଧାରଯୁକ୍ତ ଅସ୍ତ୍ରରେ ଆକ୍ରମଣ କରିବା ଯୋଗୁଁ ପ୍ରଣୟ ଗୁରୁତର ଆହତ ହୋଇଥିଲେ। ପୂର୍ବ ଶତୃତାରୁ ଏହି ଗଣ୍ଡଗୋଳ ଘଟିଥିବା ସନ୍ଦେହ କରାଯାଉଥିଲା ବେଳେ ଗୁରୁତର ଆହତ ପ୍ରଣୟକୁ ସଂଗେ ସଂଗେ ବାଲେଶ୍ୱର ମେଡିକାଲକୁ ନିଆଯାଇଥିଲା।ସେଠାରେ ଅବସ୍ଥା ସଂକଟାପନ୍ନ ହେବାରୁ ପ୍ରଣୟଙ୍କୁ କଟକ ବଡ ମେଡିକାଲ ସ୍ଥାନାନ୍ତର କରାଯାଇଛି।ଅପର ପକ୍ଷରେ ବାଲେଶ୍ୱର ପୋଲିସ ସିଟି ଡି ଏସ୍ ପି. ଓ ଟାଉନଥାନା ଆଇଆଇସି ଙ୍କ ନେତୃତ୍ୱରେ ଏକ ଟିମ୍ ଗଠନ କରାଯାଇ ତଦନ୍ତ କରୁଥିଲେ।

ବାଲେଶ୍ୱର ଏସପି ସାଗରିକା ନାଥଙ୍କ ପ୍ରତ୍ୟକ୍ଷ ତତ୍ୱବଧାନରେ ଚାଲିଥିବା ତଦନ୍ତରେ ଆଜି ଘଟଣାରେ ସମ୍ପୃକ୍ତ ୩ଜଣ ଅଭିଯୁକ୍ତଙ୍କୁ ଗିରଫ କରିବାକୁ ସମର୍ଥ ହୋଇଛି ତଦନ୍ତକାରୀ ଟିମ୍।ଅଭିଯୁକ୍ତ ମାନେ ହେଲେ ଖପରାପଦାର ନାଡୁ,କଂଗ୍ରେସ ଅଫିସ ଲେନର ବାଙ୍ଗୁରୁ ଓ ବାବୁଆ।ଟାଉନଥାନା କେସ୍ ନଂ ୩୨୨ ଅନୁସାରେ ତଦନ୍ତ କରି ଅଭିଯୁକ୍ତ ମାନଙ୍କୁ କୋର୍ଟ ଚାଲାଣ କରିଛି ବାଲେଶ୍ୱର ପୋଲିସ୍।