ସାଇକେଲରେ ଘରକୁ ଫେରୁଥିଲେ ବୃଦ୍ଧ, ପିଟିଦେଲା ଅଜଣା ଗାଡ଼ି

ଓଡ଼ିଆ ନ୍ୟୁଜ,(ବ୍ୟୁରୋ):  ଅନୁଗୁଳ ସଦର ଥାନା କରଡ଼ାଗାଡ଼ିଆ ନିକଟରେ ଆଜି ସଡ଼କ ଦୁର୍ଘଟଣାରେ ଜଣେ ବୃଦ୍ଧଙ୍କ ଜୀବନ ଯାଇଛି। ଅଜଣା ଗାଡି ଧକ୍କାରେ ତାଙ୍କର ମୃତ୍ୟୁ ହୋଇଥିବା ବେଳେ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଥିଲା। ସୂଚନା ମୁତାବକ, ଆଜି ସକାଳେ ଅନୁଗୁଳ ଜିଲ୍ଲା ସଦର ଥାନା ଅଧୀନ କରଡ଼ା ଗାଡିଆ ଛକରେ ଘଟିଛି।

ମୃତକ ହେଲେ କରଡ଼ାଗାଡିଆ ଗାଁର ୬୫ ବର୍ଷୀୟ କାଶୀନାଥ ତୁଙ୍ଗ। କଶୀନାଥ ଆଜି ଭୋରରୁ ସାଇକେଲ ଯୋଗେ ଛକକୁ ଆସିଥିଲେ। ଛକରୁ ଫୁଲ ତୋଳି ସେ ଘରକୁ ଫେରୁଥିଲେ। ମାତ୍ର ହଠାତ୍‌ ସାମନା ପଟୁ ଆସୁଥିବା ଏକ ଅଜଣା ଗାଡ଼ି ତାଙ୍କୁ ଧକ୍କା ଦେଇଥିଲା। ଫଳରେ ଘଟଣାସ୍ଥଳରେ ହିଁ ତାଙ୍କ ମୃତ୍ୟୁ ଘଟିଥିଲା। ଏହାପରେ ଗାଡ଼ିଟି ଫେରାର ହୋଇ ଯାଇଥିବାରୁ କୌଣସି ସୂଚନା ମିଳିପାରିନି।

ଖବର ପାଇ ସ୍ଥାନୀୟ ଲୋକେ ପହଞ୍ଚିବା ପରେ ପ୍ରବଳ ଉତ୍ତେଜନା ପ୍ରକାଶ ପାଇଥିଲା। ଉତ୍ତ୍ୟକ୍ତ ଲୋକେ ୫୫ ନମ୍ବର ଜାତୀୟ ରାଜପଥ ଅବରୋଧ କରିଥିଲେ। ଫଳରେ ରାସ୍ତାର ଉଭୟ ପାର୍ଶ୍ୱରେ ବହୁ ସଂଖ୍ୟାରେ ଗାଡ଼ି ଅଟକି ରହିଥିଲା । ଖବର ପାଇ ସଦର ଥାନା ପୁଲିସ୍‌ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିଥିଲା। ଏହାପରେ କ୍ଷତିପୂରଣ ପ୍ରଦାନ ନିମନ୍ତେ ପ୍ରତିଶ୍ରୁତି ଦେବା ପରେ ରାସ୍ତାରୋକ ପ୍ରତ୍ୟାହୃତ ହୋଇଥିଲା।