ଭାରସାମ୍ୟ ହରାଇ ଗଛରେ ପିଟି ହେଲା ବୋଲେରୋ

ଓଡ଼ିଆ ନ୍ୟୁଜ,(ବ୍ୟୁରୋ):  କେନ୍ଦ୍ରାପଡା ଓସ୍ତପୁର ଠାରେ ମର୍ମନ୍ତୁଦ ସଡକ ଦୁର୍ଘଟଣା । ଭାରସାମ୍ୟ ହରାଇ ଗଛରେ ପିଟି ହେଲା ବୋଲେରୋ । 3 ଜଣଙ୍କର ମୃତ୍ୟୁ ହୋଇଥିବା ବେଳେ 4 ଜଣ ଗୁରୁତର ହୋଇଥିବା ସୂଚନା ମିଳିଛି । ସଦର ଥାନା ଓସ୍ତପୁର ନିକଟ ହଳଦିଢ଼ିଅରେ ଏହି ଦୁର୍ଘଟଣା ଘଟିଛି । ନରଣପୁର ଗାଁରୁ ଫେରୁଥିବା ବେଳେ ଦୁର୍ଘଟଣାର ଶିକାର ହୋଇଥିଲା ବୋଲେରୋ । ସମସ୍ତ ମୃତକ ମହିଳା ହୋଇଥିବା ବେଳେ ମଞ୍ଚ କଳାକାର ହୋଇଥିବା ସୂଚନା ।

ସୂଚନା ମୁତାବକ, ସୋମବାର ସକାଳେ କିଛି କଳାକାର ବୋଲେରୋରେ ନରଣପୁର ଗାଁରୁ ଡ୍ରାମା ରିହରସାଲ ସାରି ଫରୁଥିଲେ। ଓସ୍ତପୁର ହଳଦିଢ଼ିଅ ନିକଟ ବୋଲେରୋ ଉପରେ ହଠାତ ନିୟନ୍ତ୍ରଣ ହରାଇ ରାସ୍ତା କଡ଼ରେ ଥିବା ଗଛକୁ ଧକ୍କା ଦେଇଥିଲା। ବୋଲେରୋରେ ଥିବା ୭ ଜଣଙ୍କ ମଧ୍ୟରୁ ଦୁର୍ଘଟଣାସ୍ଥଳରେ ଜଣଙ୍କ ମୃତ୍ୟୁ ଘଟିଥିଲା। ବାକି ୬ ଜଣ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି କରାଯାଇଥିଲା। ହସ୍ପିଟାଲରେ ଡାକ୍ତର ଆଉ ୨ଜଣଙ୍କ ମୃତ୍ୟୁ ଘୋଷଣା କରିଥିଲେ । ୩ ଜଣ ମୃତକ ମହିଳା ଥିବା ନେଇ ଜଣାପଡିଛି । ଆଉ ୪ ଜଣ ଗୁରୁତରଙ୍କ ବର୍ତ୍ତମାନ ଚିକିତ୍ସା ଜାରି ରହିଛି। ଏଯାଏଁ ମୃତକଙ୍କ ପରିଚୟ ଜଣାପଡିନାହିଁ ।

ରବିବାର ବାଲେଶ୍ୱର ଓ ନେମାଳ ଅଞ୍ଚଳର 7ଜଣ ପେଶାଦାର କଳାକାର ଆୟବା ପଞ୍ଚାୟତ ନରଣପୁର ଗ୍ରାମକୁ ଏକ ବୋଲେରୋରେ ଆସିଥିଲେ । ଆଗାମୀ ଜାଗର ଉପଲକ୍ଷେ ଡ୍ରାମା ପାଇଁ ସେଠାରେ ଫାଇନାଲ୍ ଅଭ୍ୟାସ ଚାଲିଥିଲା । ସେଠାରେ ଅଭ୍ୟାସ ସାରି ଆଜି ସକାଳେ ଫେରିବା ସମୟରେ ଭାରସାମ୍ୟ ହରାଇ ବୋଲେରୋଟି ହଳଦିଢ଼ିଅ ଗ୍ରାମର ଏକ ଗଛରେ ପିଟି ହୋଇଥିଲା । ଫଳରେ ଏହି ଦୁଃଖଦ ଘଟଣା ଘଟିଯାଇଛି ।