ଦୋକାନୀଙ୍କ ଉପରେ ମାଡିଗଲା କାର: ୫ ଆହତ

ଓଡ଼ିଆ ନ୍ୟୁଜ,(ବ୍ୟୁରୋ):  ଦ୍ରୁତ ଗତିରେ ଆସି ବଜାରରେ ଲୋକଙ୍କ ଉପରେ ଚଢିଗଲା କାର।୫ ଜଣ ଆହତ ହୋଇଥିବା ସୂଚନା | ବାଲେଶ୍ୱର ଜିଲ୍ଲା ବାହାନଗା ବ୍ଲକ ଗୋପାଳପୁର ବଜାରରେ କାର ଧକ୍କାରେ ୫ ଜଣ ଗୁରୁତର ଆହତ ହୋଇଛନ୍ତି। ଗୋପାଳପୁର ବଜାରରେ ଆଜି ଲୋକେ ପରିବା କିଣିବା ଓ ବିକିବା ପାଇଁ ଭିଡ ଲାଗିଥିଲା।

ଏହି ସମୟରେ ବାଲେଶ୍ୱର ଅଭିମୁଖେ ଯାଉଥିବା ଗୋଟାଏ କାର ଦୃତଗତିରେ ଯାଇ ଲୋକଙ୍କ ଉପରେ ମାଡ଼ି ଯାଇଥିଲା। ଫଳରେ ଆଇସକ୍ରିମ ବିକ୍ରେତା ଶ୍ରୀଧର ରାଉତ, ପରିବା ବିକାଳୀ ଧରଣୀଧର ସାହୁ ସହ ପରିବା କିଣିବା ପାଇଁ ଆସିଥିବା ବିକର୍ତନ ଜେନା, ସନାତନ ଜେନା, ଗୁରୁପ୍ରସାଦ ଦାସ ଆହତ ହୋଇ ଗୋପାଳପୁର ଚିକିତ୍ସାଳୟରେ ପ୍ରାଥମିକ ଚିକିତ୍ସା ପରେ ବାଲେଶ୍ୱର ଜିଲ୍ଲା ମେଡିକାଲକୁ ସ୍ଥାନାନ୍ତରିତ ହୋଇଛନ୍ତି।

ଅନ୍ୟପଟେ ଘଟଣା ସ୍ଥଳରେ ଗୋପାଳପୁର ପୋଲିସ ପହଞ୍ଚି ଧକ୍କା ଦେଇଥିବା କାରକୁ ଜବତ କରି ଘଟଣାର ତଦନ୍ତ ଜାରି ରଖିଛି। ଦୁର୍ଘଟଣା ଘଟାଇଥିବା କାର ଡ଼୍ରାଇଭର ଫେରାର ହୋଇଯାଇଥିବା ଜଣାଯାଇଛି l