ମଣିପୁର ହିଂସା, ରାସ୍ତା ଅବରୋଧ କଲେ ମହିଳା

ଓଡ଼ିଆ ନ୍ୟୁଜ (ବ୍ୟୁରୋ) : ମଣିପୁର ଲଜ୍ଜା ପ୍ରସଙ୍ଗକୁ ନେଇ ସାରା ଦେଶ ଜଳୁଛି । ଚାରିଆଡେ ଆନ୍ଦୋଳନ ଦେଖିବାକୁ ମିଳିବା ସହ ରାଜନୈତିକ ତାତି ବି ବଢିବାରେ ଲାଗିଛି । ଆଜି ପୁଣି ଇମ୍ଫାଲରେ ଆନ୍ଦୋଳନକୁ ଓହ୍ଲାଇଛନ୍ତି ମହିଳା। ଘାରୀ ଅଞ୍ଚଳରେ ଏକ ମୁଖ୍ୟ ରାସ୍ତାର ଉଭୟ ପାର୍ଶ୍ୱକୁ ଅବରୋଧ କରିଛନ୍ତି ଆନ୍ଦୋଳନକାରୀ। ରାସ୍ତାରେ ଟାୟାର୍ ଜାଳି ବିକ୍ଷୋଭ ପ୍ରଦର୍ଶନ କରାଯାଉଥିବା ଦେଖିବାକୁ ମିଳିଛି। ମଣିପୁର ପୋଲିସ, ସେନା ଏବଂ ରାପିଡ୍ ଆକ୍ସନ୍ ବାଟାଲିୟନ ଘଟଣାସ୍ଥଳରେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଛନ୍ତି।

ବିରୋଧକାରୀଙ୍କୁ ନିୟନ୍ତ୍ରଣ କରିବା ପାଇଁ ବିଭିନ୍ନ ଅଞ୍ଚଳରେ ପତାକା ପ୍ରଦର୍ଶନ କରାଯାଇଥିଲା। ମଣିପୁର ଇମ୍ଫାଲ ଉପତ୍ୟକାରେ ପର୍ବତ ଅଞ୍ଚଳ ଦଖଲକୁ ନେଇ ମେତେଇ ଏବଂ କୁକିମାନଙ୍କ ମଧ୍ୟରେ ଗତ ମେ ୩ରୁ ବିରୋଧ ପ୍ରଦର୍ଶନ କରାଯାଉଛି। ହିଂସାରେ ଏପର୍ୟ୍ୟନ୍ତ ୧୬୦ ରୁ ଅଧିକ ଜୀବନ ଗଲାଣି। କେବଳ ଜୀବନ ଯାଇନି, ରାଜ୍ୟର ବିଭିନ୍ନ ସ୍ଥାନରୁ ଅଗ୍ନିକାଣ୍ଡ, ଲୁଟ୍, ହିଂସା ଏବଂ ମହିଳାଙ୍କୁ ଯୌନ ନିର୍ୟାତନା ପରେ ହତ୍ୟା କରାଯାଇଛି।
ବିକ୍ଷୋଭ ଧିରେ ଧିରେ ଶାନ୍ତ ପଡୁଥିବା ସମୟରେ ସଂସଦ ଅଧିବେଶନର ପୂର୍ବଦିନ ଜୁଲାଇ-୧୯ ରେ ଏକ ଭିଡିଓ ଭାଇରାଲ୍ ହେବା ପରେ ପୂରା ଘଟଣା ସାମ୍ନାକୁ ଆସିଛି। ଏକ ଭିଡିଓରେ ଦୁଇ କୁକି ସମ୍ପ୍ରଦାୟର ମହିଳାଙ୍କୁ ଉଲଗ୍ନ କରି ରାସ୍ତାରେ ଚଲାଇ ନିଆଯାଉଥିବା ଦେଖିବାକୁ ମିଳିଛି। ଏହି ଘଟଣାରେ ପୂର୍ବରୁ ୪ ଜଣଙ୍କୁ ଗିରଫ କରାଯାଇ ଥିବାବେଳେ ଆଜି ଆଉ ଜଣେ ଗିରଫ ହୋଇଛି।

ସେପଟେ ମଣିପୁରରେ ଏପରି ଗୋଟିଏ ନୁହେଁ ୬୦୦ରୁ ଅଧିକ ମାମଲା ରୁଜୁ ହୋଇଛି। ମହିଳାଙ୍କୁ ନର୍କ ଯନ୍ତ୍ରଣା ଦିଆଯାଇ ହତ୍ୟା କରାଯାଇଥିବା ଅଭିଯୋଗ ହେଉଛି।