ଚୋରାମଦ ଗାଡି ଜାଳିଦେଲେ ଲୋକେ

ଓଡ଼ିଆ ନ୍ୟୁଜ,(ବ୍ୟୁରୋ): ଚୋରାମଦ ଗାଡି ଜାଳିଦେଲେ ଲୋକେ | ଗତକାଲି ବିଳମ୍ବିତ ରାତିରେ ଚୋରା ମଦ ବୋଝେଇ ଏକ ସ୍କର୍ପିଓ ଗାଡିକୁ ସ୍ଥାନୀୟ ଲୋକେ ପୋଡି ଦେଇଥିବା ଜଣାଯାଇଛି।ସୂଚନା ଅନୁସାରେ ବାଲେଶ୍ୱର ଜିଲ୍ଲା ସିମୁଳିଆ ଥାନା ଭଗିଆ ଛକ ଅଞ୍ଚଳରେ ଚୋରାମଦ ଭର୍ତ୍ତି ଏକ ସ୍କର୍ପିଓ ଗାଡିରେ ନିଆଁ ଲଗାଇ ଦେଇଛନ୍ତି ସ୍ଥାନୀୟ ଲୋକେ।

୧୬ ନଂ ଜାତୀୟ ରାଜପଥ ଦେଇ ଚୋରାମଦ ବୋଝେଇ ଗାଡିଟି ବାଲେଶ୍ୱର ଅଭିମୁଖେ ଯାଉଥିଲା ବେଳେ ଭଦ୍ରକ ପୋଲିସ ଏହି ଗାଡିକୁ ପିଛା କରିବାରୁ ଭଗିଆ ଛକ ନିକଟରେ ଗାଡି ଚାଳକ ଗାଡିଟିକୁ ନିକଟସ୍ଥ ଏକ ଗାଁ ଭିତରକୁ ନେଇ ଯାଇଥିଲା।ଗାଁ ଲୋକେ ଚୋରା ମଦ ଜାଣିପାରି ଉତକ୍ଷିପ୍ତ ହୋଇ ଗାଡିରେ ନିଆଁ ଲଗେଇ ଦେଇଥିଲେ।

ଫଳରେ ଗାଡିଟିରେ ଥିବା ମଦରେ ନିଆଁ ଲାଗିବା ଯୋଗୁ ହୁତୁହୁତୁ ହୋଇ ଗାଡିଟି ଜଳିଯାଇଥିଲା।ସିମୁଳିଆ ପୋଲିସ ଓ ଭଦ୍ରକ ପୋଲିସ ଘଟଣାର ତଦନ୍ତ କରୁଥିଲା ବେଳେ ଗାଡିରେ ଥିବା ଡ୍ରାଇଭର ସମେତ ଅନ୍ୟ ଅପରାଧିମାନେ ସେଠାରୁ ଫେରାର ହୋଇଯାଇଥିବା ଜଣାଯାଇଛି।