କପିଳାସ ପ୍ରଭୁ ଚନ୍ଦ୍ରଶେଖରଙ୍କ ପୀଠରେ ଜଳଲାଗି ପାଇଁ ଜାରି ହେଲା ସ୍ୱତନ୍ତ୍ର ଗାଇଡ ଲାଇନ୍

ଓଡ଼ିଆ ନ୍ୟୁଜ (ବ୍ୟୁରୋ) : ଶ୍ରାବଣ ମାସରେ ଜଳଲାଗି ପାଇଁ କପିଳାସ ପ୍ରଭୁ ଚନ୍ଦ୍ରଶେଖରଙ୍କ ପୀଠରେ ଜିଲ୍ଲା ପ୍ରଶାସନ ପକ୍ଷରୁ ସ୍ୱତନ୍ତ୍ର ଗାଇଡ ଲାଇନ୍ ଜାରି କରାଯାଇଛି। ଚଳିତ ବର୍ଷ ଶ୍ରାବଣ ମାସରେ ୩ଟି ସୋମବାରରେ ହେବ ଜଳାଭିଷେକ । ଜୁଲାଇ ମାସ ୧୦ ତାରିଖ, ଅଗଷ୍ଟ ମାସ ୨୧ ଓ ୨୮ ତାରିଖ ରେ ହେବ ଜଳଲାଗି। ।

ଅନ୍ୟ ସୋମବାର ଗୁଡିକରେ ମନ୍ଦିରରେ ଜଳଲାଗି ପାଇଁ ନିଷିଦ୍ଧ କରାଯାଇଛି । ଜିଲ୍ଲାପାଳଙ୍କ କାର୍ଯ୍ୟାଳୟରେ ଜିଲ୍ଲାପାଳଙ୍କ ଅଧ୍ୟକ୍ଷତାରେ କାଉଡି ଯାତ୍ରା ଓ ଜଳାଭିଷେକ ପାଇଁ ଏକ ବୈଠକ ଅନୁଷ୍ଠିତ ହୋଇଥିଲା। ବୈଠକରେ ଜିଲ୍ଲା ଆରକ୍ଷୀ ଅଧୀକ୍ଷକଙ୍କ ସମେତ ଜିଲ୍ଲାସ୍ତରୀୟ ଅଧିକାରୀମାନେ ଉପସ୍ଥିତ ଥିଲେ । ଚଳିତ ବର୍ଷ ମଳ ମାସ ପଡ଼ୁଥିବାରୁ କପିଳାସ ସମେତ ଅନ୍ୟ ଶୈବପୀଠରେ ୧୦ ଜୁଲାଇ, ୨୧ ଓ ୨୮ ଅଗଷ୍ଟରେ ପଡ଼ୁଥିବା ମୋଟ୍ ୩ଟି ସୋମବାରରେ କାଉଡିଆମାନେ ଜଳଲାଗି କରିପାରିବେ ବୋଲି ନିଷ୍ପତ୍ତି ହୋଇଛି ।

ମଳମାସ ଯୋଗୁଁ ଶ୍ରାବଣ ମାସର ଅନ୍ୟ ସୋମବାର ଗୁଡିକ ଅସୁଦ୍ଧି ହେତୁ ରାଜପୁରୋଧା ପଞ୍ଚାନନ ମିଶ୍ରଙ୍କ ପରାମର୍ଶ କ୍ରମେ ଜିଲ୍ଲାପାଳ ଏହି ଘୋଷଣା କରିଛନ୍ତି । ଲକ୍ଷାଧିକ କାଉଡିଆଙ୍କ ଆଗମନକୁ ନେଇ ବ୍ୟାପକ ପୁଲିସ ମୁତୟନ ସହିତ ଆଲୋକୀକରଣ ପାନୀୟ ଜଳ ସୁବିଧା କରାଯିବ । ଚଳିତବର୍ଷ କାଉଡିଆ ପ୍ରବେଶକୁ ମାଗଣା କରାଯାଇଥିବା ବେଳେ ଢେଙ୍କାନାଳରୁ କପିଳାସ ଗାଡି ଭଡ଼ା ୫୦ ଟଙ୍କା କରାଯାଇଛି ।

ତେବେ ପଲିଥିନ ଓ ଡିଜେ ବାଜାକୁ ସମ୍ପୂର୍ଣ୍ଣ ନିଷେଧ କରାଯାଇଥିବା ବେଳେ ଆମାନିଆଙ୍କ ବିରୁଦ୍ଧରେ ଦୃଢ଼ କାର୍ୟ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲ୍ଲା ପୁଲିସ ପ୍ରଶାସନ ପକ୍ଷରୁ ଚେତାବନୀ ଦିଆଯାଇଥିବା ସୂଚନା ମିଳିଛି ।