ଲିଙ୍ଗରାଜ ମହାପ୍ରଭୁଙ୍କ ମହାଶିବରାତ୍ରି ପାଇଁ ଟ୍ରାଫିକ୍ କଟକଣା ଜାରି
ଓଡ଼ିଆ ନ୍ୟୁଜ୍:ଶ୍ରୀ ଲିଙ୍ଗରାଜ ମହାପ୍ରଭୁଙ୍କ ମହାଶିବରାତ୍ରି ପାଇଁ ଯାନବାହାନ ଚଳାଚଳ ଓ ପଥଚାରୀଙ୍କ ସୁବିଧା ନିମନ୍ତେ କମିଶନରେଟ୍ ପୋଲିସ୍ ପକ୍ଷରୁ ସର୍ବସାଧାରଣଙ୍କ ସୁବିଧା ନିମନ୍ତେ ବିଜ୍ଞପ୍ତି ଜାରି ! କମିଶନରେଟ୍ ପୋଲିସ ଅନୁଯାୟୀ ଟ୍ରାଫିକ ନିୟମ ୧୪ ଫେବୃଆରୀ ୨୦୨୬ ମଧ୍ୟରାତ୍ରିରୁ ଲାଗୁ ହେବ ଏବଂ ଉତ୍ସବ ସମାପ୍ତ ହେବା ପର୍ଯ୍ୟନ୍ତ ବଳବତ୍ତର ରହିବ । ମହା ଶିବରାତ୍ରି ପାଳନ ଅବସରରେ ଯାନବାହାନ ଚଳାଚଳର ସୁଗମ ପ୍ରବାହ, ଭିଡ଼ ରୋକିବା ଏବଂ ପଦଯାତ୍ରୀଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ଟ୍ରାଫିକ ନିୟମ ଲାଗୁ କରାଯାଇଛି।
ରଥ ରୋଡ୍ ଏବଂ ପୁନାମା ଗେଟ୍ ପାର୍ଶ୍ୱରୁ: ରଥ ରୋଡ୍ ଏବଂ ପୁନାମା ଗେଟ୍ ପାର୍ଶ୍ୱରୁ ଲିଙ୍ଗରାଜ ମନ୍ଦିର ଆଡକୁ ଆସୁଥିବା ଯାନବାହାନ (ଚାର ଚକିଆ ଏବଂ ଦୁଇ ଚକିଆ) ପାର୍କିଂ ପାଇଁ ବଧେଇବଙ୍କା ଛକରେ ବି.ଏମ୍. ହାଇସ୍କୁଲ ପଡ଼ିଆ ଆଡ଼କୁ ଗତି କରିବ। ଏହି ସମୟ ମଧ୍ୟରେ ରଥ ରୋଡ୍ ଉପରେ କୌଣସି ଭାରୀ ଯାନ ଚଳାଚଳ କରିବାକୁ ଅନୁମତି ଦିଆଯିବ ନାହିଁ।
କେଦାର ଗୌରୀ ମନ୍ଦିର ଏବଂ ସାନିଟାରିୟମ୍ ଛକ ପାର୍ଶ୍ୱରୁ: କେଦାର ଗୌରୀ ମନ୍ଦିର ପାର୍ଶ୍ୱ ଏବଂ ସାନିଟାରିୟମ୍ ଛକ ପାର୍ଶ୍ୱରୁ ଆସୁଥିବା ଦୁଇ ଚକିଆ ଯାନଗୁଡ଼ିକ କଚେରାପିଣ୍ଡି ଛକ ଦେଇ କୋଟିତୀର୍ଥ ଲେନ୍ ବ୍ୟବହାର କରିପାରିବେ ଏବଂ ତରଙ୍ଗା କ୍ଲବ୍ ପଛ ପାର୍ଶ୍ୱରେ ଖାଲି ସ୍ଥାନରେ ସେମାନଙ୍କର ଯାନବାହନ ପାର୍କ କରିପାରିବେ।ଏଥିପାଇଁ କୋଟିତୀର୍ଥ ଲେନ୍ ଦେଇ ଯାନବାହନ ଚଳାଚଳକୁ ସିଦ୍ଧି ମଣ୍ଡପ ଲେନ୍ ପାର୍ଶ୍ୱରୁ ଏକମୁଖୀ କରାଯିବ।
ସାମନ୍ତରପୁର ପାର୍ଶ୍ୱରୁ: ସାମନ୍ତରପୁର ପାର୍ଶ୍ୱରୁ ଆସୁଥିବା ଯାନଗୁଡ଼ିକ ଶ୍ରୀରାମ ନଗର ଦେଇ ଆଗକୁ ବଢ଼ିବେ, ସବ-ଷ୍ଟେସନ୍ ଛକ ପରେ ମିଶିଯିବେ, ଏବଂ ପାର୍କିଂ ପାଇଁ ଅନନ୍ତ ବାସୁଦେବ ମନ୍ଦିରର ଉତ୍ତର ପାର୍ଶ୍ୱ ଏବଂ ତରଙ୍ଗା କ୍ଲବ୍ ପଛ ପାର୍ଶ୍ୱକୁ ସ୍ଥାନାନ୍ତରିତ କରାଯିବ।