ଗ୍ରାହକଙ୍କୁ ବାଧୁଛି ଅହେତୁକ ଡାଲି ଦରବୃଦ୍ଧି
ଓଡ଼ିଆ ନ୍ୟୁଜ୍ (ବ୍ୟୁରୋ): ଦେଶରେ ଅତ୍ୟାବଶ୍ୟକ ଜିନିଷର ଦରବୃଦ୍ଧି ଲୋକଙ୍କ ଆର୍ଥିକ ମେରୁଦଣ୍ଡକୁ ଦୋହଲାଇ ଦେଲାଣି । ପନିପରିବା ଓ ମସଲା ସହିତ ଅଧିକାଂଶ ଖାଦ୍ୟ ପଦାର୍ଥର ଦର ବୃଦ୍ଧି ପାଇଛି। ବିଲାତି ବାଇଗଣ ଓ ମସଲା ପରେ ଏବେ ଡାଲିଜାତୀୟ ଶସ୍ୟର ମୂଲ୍ୟବୃଦ୍ଧି ହୋଇଛି। ଗତ ଏକ ମାସ ହେଲା ଡାଲି ମୂଲ୍ୟରେ ଲଗାତାର ବୃଦ୍ଧି ହୋଇ ଚାଲିଛି। ହରଡ ଡାଲି ମୂଲ୍ୟ କିଲୋ ପିଛା ୧୦୦ରୁ ୧୨୦ ଟଙ୍କା ମଧ୍ୟରେ ବିକ୍ରି ହେଉଥିଲା। ଏବେ ଏହି ଡାଲି ଦର କେଜି ପିଛା ୨୦୦ ଟଙ୍କାକୁ ଛୁଇଁଛି। ବ୍ୟବସାୟୀ ଡାଲିର କଳାବଜାରୀ କରୁଥିବା ସରକାର ସନ୍ଦେହ କରୁଥିଲେ। ଏଣୁ ଡାଲିର ମୂଲ୍ୟ ନିୟନ୍ତ୍ରଣ ପାଇଁ କେନ୍ଦ୍ର ସରକାର ଗତ ମାର୍ଚ୍ଚ ମାସରୁ ଉଦ୍ୟମ କଲେଣି। ଏଥି ପାଇଁ ପ୍ରଥମେ ଡାଲିର ଷ୍ଟକ୍ ଓ କଳାବଜାରୀ ନିୟନ୍ତ୍ରଣ ପାଇଁ ଏକ କମିଟି ଗଠନ କରିଥିଲେ। ଏହି କମିଟି ବିଭିନ୍ନ ରାଜ୍ୟରେ ଅଧିକାରୀଙ୍କ ସହ ମିଶି ଚଢଉ ମଧ୍ୟ କରିଥିଲେ। ଏଥିରେ ତାମିଲନାଡୁ ସମେତ ଅନେକ ରାଜ୍ୟରେ ଚଢଉ ହୋଇଥିଲା, ଏହାସତ୍ତ୍ୱେ ଡାଲି ମୂଲ୍ୟ କମିବା ପରିବର୍ତ୍ତେ ବଢିବଢି ଚାଲିଛି।
ଏଣୁ ସରକାର ଡାଲି ଷ୍ଟକ୍ ସୀମା ଧାର୍ୟ୍ୟ କରିଦେଇଛନ୍ତି। କେନ୍ଦ୍ର ସରକାର ଜୁନ ୨ ତାରିଖରେ ଡାଲି ଷ୍ଟକ୍ ଧାର୍ୟ୍ୟ କରିଥିଲେ। ଦେଶରେ ଏହି ଷ୍ଟକ୍ ସୀମା ଜୁନ ୨ ତାରିଖରୁ ପ୍ରଭାବୀ ହୋଇଥିଲା। ଏହା ୩୧ ଅକ୍ଟୋବର ପର୍ୟ୍ୟନ୍ତ ଜାରି ରହିବ। ସରକାରଙ୍କ ପକ୍ଷରୁ ଧାର୍ୟ୍ୟ ସୀମାଠାରୁ ଯଦି କେହି ଅଧିକ ଡାଲି ଷ୍ଟକ୍ ରଖିଥାନ୍ତି ତେବେ ସମ୍ପୃକ୍ତ ବ୍ୟବସାୟୀଙ୍କ ବିରୋଧରେ କାର୍ୟ୍ୟାନୁଷ୍ଠାନ ହେବ ବୋଲି କୁହାଯାଇଥିଲା। ଏହି ଷ୍ଟକ୍ ଲିମିଟ୍ ପାଇକାରୀ ବିକ୍ରେତା, ରିଟେଲର୍ସ, ମିଲ୍ ମାଲିକଙ୍କ ସମେତ ଆମଦାନୀକାରୀଙ୍କ ଉପରେ ମଧ୍ୟ ଲାଗୁ ହୋଇଥିଲା। ସରକାରଙ୍କ ଆଦେଶ ଅନୁସାରେ ରିଟେଲର ୫ ଟନରୁ ଅଧିକ ଡାଲି ଷ୍ଟକ୍ କରିପାରିବେନି।