ଶ୍ରୀଲଙ୍କାରେ ସଙ୍କଟ: ୫ ଦିନ ଧରି ପେଟ୍ରୋଲ ପମ୍ପରେ ଲାଇନରେ ଛିଡ଼ା ହୋଇଥିବା ଟ୍ରକ ଡ୍ରାଇଭରଙ୍କ ମୃତ୍ୟୁ

ଓଡ଼ିଆ ନ୍ୟୁଜ୍ (ବ୍ୟୁରୋ): ଶ୍ରୀଲଙ୍କାରେ ଦିନକୁ ଦିନ ଅବସ୍ଥା ଖରାପ ହେବାରେ ଲାଗିଛି। ଗୋଟିଏ ପଟେ ଦୈନନ୍ଦିନ ଜିନିଷ ମହଙ୍ଗା ହେଉଥିବାବେଳେ ବଜାରରେ ପାଇବା ମଧ୍ୟ କଷ୍ଟକର ହୋଇପଡୁଛି । ଡିଜେଲ ଏବଂ ପେଟ୍ରୋଲ ପାଇଁ ପେଟ୍ରୋଲ ପମ୍ପରେ ଯାନବାହାନର ଲମ୍ବା ଧାଡି ଦେଖାଯାଏ, ଏବଂ ଲୋକଙ୍କୁ ଇନ୍ଧନ ପାଇଁ ଅନେକ ଦିନ ଧାଡିରେ ଛିଡା ହେବାକୁ ପଡେ । ଶ୍ରୀଲଙ୍କାର ଏକ ପେଟ୍ରୋଲ ପମ୍ପରେ ୫ ଦିନ ଲାଇନରେ ଠିଆ ହେବା ପରେ ଜଣେ ୬୩ ବର୍ଷିୟ ଟ୍ରକ ଡ୍ରାଇଭରଙ୍କର ମୃତ୍ୟୁ ଘଟିଛି।

ସ୍ୱାଧୀନତା ପରଠାରୁ ଶ୍ରୀଲଙ୍କା ଏହାର ସବୁଠାରୁ ଖରାପ ଅର୍ଥନୈତିକ ସଙ୍କଟ ସହ ମୁକାବିଲା କରୁଛି ଏବଂ ଋଣଗ୍ରସ୍ତ ହୋଇଛି। ଶ୍ରୀଲଙ୍କାରେ ପେଟ୍ରୋଲ ପମ୍ପରେ ଇନ୍ଧନ କିଣିବା ପାଇଁ ଧାଡ଼ିରେ ଅପେକ୍ଷା କରିଥିବାବେଳେ ଟ୍ରକ ଡ୍ରାଇଭରଙ୍କର ଏହା ହେଉଛି ଦଶମ ମୃତ୍ୟୁ । ଗୁରୁବାର ଦିନ ଏ ସମ୍ପର୍କରେ ସୂଚନା ଦେଇ ପୋଲିସ କହିଛି ଯେ ଅଙ୍ଗୁରୱାଟୋଟାସ୍ଥିତ ପେଟ୍ରୋଲ ପମ୍ପରେ ଲାଇନରେ ଅପେକ୍ଷା କରିଥିବା ବ୍ୟକ୍ତି ଜଣଙ୍କ ତାଙ୍କ କାର ଭିତରୁ ମୃତଦେହ ପାଇଥିଲେ। ଏହିପରି, ଲାଇନରେ ଅପେକ୍ଷା କରିବା ସମୟରେ ମୃତ୍ୟୁ ସଂଖ୍ୟା ବର୍ତ୍ତମାନ ୧୦ କୁ ବୃଦ୍ଧି ପାଇଛି।

ଯେଉଁମାନେ ଧାଡ଼ିରେ ଅପେକ୍ଷା କରି ମୃତ୍ୟୁବରଣ କରିଥିଲେ, ସେମାନେ ସମସ୍ତେ ପୁରୁଷ ଥିଲେ ଏବଂ ସେମାନଙ୍କର ବୟସ ୪୩ ରୁ ୮୪ ବର୍ଷ ପର୍ୟ୍ୟନ୍ତ ଥିଲା । ଧାଡିରେ ଧାଡିରେ ଜୀବନ ହରାଇଥିବା ଅଧିକାଂଶ ଲୋକ ହୃଦଘାତରେ ମୃତ୍ୟୁ ବରଣ କରିଥିଲେ। ଏକ ସପ୍ତାହ ପୂର୍ବରୁ, କଲମ୍ବୋ, ପାନଡୁରାସ୍ଥିତ ଏକ ଇନ୍ଧନ କେନ୍ଦ୍ରରେ ଅନେକ ଘଣ୍ଟା ଧରି ଲାଇନରେ ଅପେକ୍ଷା କରୁଥିବା ସମୟରେ ଜଣେ ୫୩ ବର୍ଷୀୟ ବ୍ୟକ୍ତିଙ୍କର ମୃତ୍ୟୁ ହୋଇଥିଲା । କୁହାଯାଉଛି ଯେ ତିନି ଚକିଆ ଯାନରେ ଅପେକ୍ଷା କରୁଥିବା ବ୍ୟକ୍ତି ହୃଦଘାତରେ ମୃତ୍ୟୁ ବରଣ କରିଛନ୍ତି।

ଶ୍ରୀଲଙ୍କାରେ ଖାଦ୍ୟ ଏବଂ ପାନୀୟ ମହଙ୍ଗା, ଔଷଧର ତୀବ୍ର ଅଭାବ ।
ପ୍ରାୟ ୨୨ ନିୟୁତ ଜନସଂଖ୍ୟା ବିଶିଷ୍ଟ ଏହି ସୁନ୍ଦର ଦେଶ ସ୍ୱାଧୀନତାର ୭୦ ବର୍ଷରୁ ଅଧିକ ସମୟ ମଧ୍ୟରେ ବର୍ତ୍ତମାନର ସବୁଠାରୁ ଖରାପ ଆର୍ଥିକ ସଙ୍କଟ ଦେଇ ଗତି କରୁଛି । ଶ୍ରୀଲଙ୍କାରେ ପ୍ରବଳ ଇନ୍ଧନ ଅଭାବ ଦେଖାଦେଇଛି ଏବଂ ଖାଦ୍ୟ ମୂଲ୍ୟ ଆକାଶଛୁଆଁ ହେଉଛି। ଏଥି ସହିତ ଦେଶରେ ଔଷଧର ଅଭାବ ମଧ୍ୟ ଦେଖାଦେଇଛି। ପରିସ୍ଥିତି ଏତେ ଖରାପ ହୋଇଛି ଯେ ଖାଦ୍ୟ ସଙ୍କଟକୁ ଦୂର କରିବା ପାଇଁ ସରକାରୀ କର୍ମଚାରୀଙ୍କୁ ଶୁକ୍ରବାର ଛୁଟିଦିନରେ ଚାଷ କାର୍ୟ୍ୟ କରିବାକୁ ଉତ୍ସାହିତ କରାଯାଉଛି।