ସାନଖେମୁଣ୍ଡିରେ ଲଜ୍ୟା

ଓଡ଼ିଆ ନ୍ୟୁଜ୍: ସାନଖେମୁଣ୍ଡିରେ ଲଜ୍ୟା । ୪ ବର୍ଷର ନାବାଳିକାଙ୍କୁ ଦୁଷ୍କର୍ମ ପରେ ହତ୍ୟା ନେଇ ପରିବାର ଲୋକଙ୍କ ଅଭିଯୋଗ । ଗଂଜାମ ଜିଲ୍ଲା ସାନଖେମୁଣ୍ଡି ବ୍ଲକ ଖଲିଙ୍ଗି ଗ୍ରାମରେ ଘଟିଛି ଏଭଳି ଏକ ଅଭାବନୀୟ ଘଟଣା । ପରିବାର ଅଶାନ୍ତି ଯୋଗୁଁ ନାବାଳିକା ଜଣଙ୍କ କିଛି ଦିନ ହେବ ଅଜା ଆଈଙ୍କ ନିକଟରେ ରହୁଥିଲେ । ଗତକାଲି ସନ୍ଧ୍ୟା ସମୟରେ ନାବାଳିକା ଜଣଙ୍କ କେଉଁ ଆଡେ ନିଖୋଜ ହେଇଯାଇଥିଲେ । ଏ ନେଇ ପରିବାର ବର୍ଗ ଅନେକ ଖୋଜାଖୋଜି ପରେ ମଧ୍ୟ ପାଇ ନଥିଲେ ।

ପ୍ରାୟ ରାତ୍ର ୨ ଘଣ୍ଟା ସମୟରେ ଖୋଜାଖୋଜି ବେଳେ ଏକ ନିର୍ମାଣାଧୀନ ଅଙ୍ଗନୱାଡି କୋଠାରୁ ନଗ୍ନ ଅବସ୍ଥାରେ ମୃତଦେହ ମିଳିଥିଲା । ପରେ ପରେ ନାବାଳିକାଙ୍କ ଅଜା ଆଈ ଥାନାରେ ଅଭିଯୋଗ କରିଥିବା ବେଳେ ଘଟଣାସ୍ଥଳରେ ପୋଲିସ ସାଇଣ୍ଟିଫିକ ଟିମ ସହ ସନ୍ଧାନୀ କୁକୁର ପହଂଚି ଛାନଭିନ ଜାରି ରଖିଛନ୍ତି । ଅନ୍ୟପଟେ ଘଟଣାକୁ ଗୁରୁତର ସହ ନେଇ ସାନଖେମୁଣ୍ଡି ବିଧାୟକ ରମେଶ ଜେନା ଘଟଣାସ୍ଥଳରେ ପହଂଚି ଏଭଳି ଘୂର୍ଣ୍ଣ୍ୟ କାର୍ଯ୍ୟ କରିଥିବା ଦୋଷୀ ବିରୋଧୀରେ ଦୃଢ କାର୍ଯ୍ୟାନୁଷ୍ଠାନ ନେବା ସହ ଦୋଷୀଙ୍କୁ ଫାଶୀ ଦିଆଯାଉ ବୋଲି ଦାବି କରିଛନ୍ତି ।