ରାଉରକେଲାକୁ ବିମାନ ଉଡ଼ାକୁ ନେଇ ଶ୍ରେୟ ନେବାକୁ ଚାହୁଁଚି ବିଜେଡି,କ୍ଷୁଦ୍ର ମାନସିକତାରୁ ବାହାରୁ ବିଜୁ ଜନତା ଦଳର ସରକାର: ଜୟନାରାୟଣ ମିଶ୍ର
ଓଡ଼ିଆ ନ୍ୟୁଜ (ବ୍ୟୁରୋ): ଉଡାନ୍ ଯୋଜନାରେ କେନ୍ଦ୍ର ସରକାରଙ୍କ ଅର୍ଥରେ ରାଉରକେଲାକୁ ବିମାନ ଉଡିଲା । ହେଲେ ରାଜ୍ୟ ସରକାରଙ୍କ ବିଜ୍ଞାପନରେ ନବୀନ ବାବୁଙ୍କ ଫଟୋ ଛାପିଲା । ମୁଖ୍ୟମନ୍ତ୍ରୀ ନିଜର ଫଟୋ ରଖି ପ୍ରଧାନମନ୍ତ୍ରୀଙ୍କ ଫଟୋକୁ ବିଜ୍ଞାପନରେ ନରଖିବା ମୁଖ୍ୟମନ୍ତ୍ରୀଙ୍କର କି ବଡପଣର ଉଦାହରଣ? ଓଡ଼ିଶାରେ ହକି ବିଶ୍ୱକପ୍ ଅନୁଷ୍ଠିତ ହେବ । ଏନେଇ ଓଡ଼ିଶାର ଗଣମାଧ୍ୟମଠାରୁ ଆରମ୍ଭ କରି ରୋଡ ପାଖରେ ବିଜ୍ଞାପନ ମାଧ୍ୟମରେ ଜୋରଦାର ପ୍ରଚାର ପ୍ରସାର କରୁଛନ୍ତି ରାଜ୍ୟ ସରକାର । କିନ୍ତୁ ଦେଶର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଆମ ଓଡିଶା ମାଟିର ଝିଅ ଦେଶର ପ୍ରଥମ ଆଦିବାସୀ ମହିଳା ମହାମହିମ ରାଷ୍ଟ୍ରପତି ଦୌପଦୀ ମୁର୍ମୁଙ୍କୁ ନିମନ୍ତ୍ରଣ କରିନାହାନ୍ତି । ଏଥିରୁ ନବୀନ ବାବୁଙ୍କ ହୀନ ମାନସିକତା ସ୍ପଷ୍ଟ ପ୍ରତିପାଦିତ ହେଉଛି ବୋଲି କ୍ଷୋଭ ପ୍ରକାଶ କରିଛନ୍ତି ବିରୋଧୀ ଦଳ ନେତା ଜୟନାରାୟଣ ମିଶ୍ର ।
ନବୀନ ବାବୁଙ୍କ ସଙ୍କୁଚିତ ମାନସିକତା ପଦାରେ ପଡିଛି । ଓଡ଼ିଶାର ହକି ଖେଳ ଆୟୋଜନରୁ ବିଶାଳ ହୃଦୟ କାହାର କେତେ ଅଛି ତାହା ଭାରତ ଓ ଓଡ଼ିଶାବାସୀଙ୍କ ପାଖରେ ଅଛପା ନାହିଁ । ରାଉରକେଲାରେ ନବ ନିର୍ମିତ ହକି ଷ୍ଟାଡିୟମ ବାବଦକୁ ମୁଖ୍ୟମନ୍ତ୍ରୀଙ୍କ ଶୂନ୍ୟ ଅର୍ଥ ଅବଦାନ ସତ୍ୱେ ଉଦ୍ଘାଟନୀ ଉତ୍ସବରେ ଭାରତୀୟ ଜନତା ପାର୍ଟି ଓ କଂଗ୍ରେସର ବିଧାୟକମାନଙ୍କୁ ପ୍ରବେଶ କରିବାକୁ ଦିଆଗଲା ନାହିଁ । ହକି ବିଶ୍ୱକପ୍ ପାଇଁ ମୁଖ୍ୟମନ୍ତ୍ରୀ ବୁଲି ବୁଲି ନିମନ୍ତ୍ରଣ ପତ୍ର ପ୍ରଦାନ କରୁଥିଲେ ମଧ୍ୟ ନିଜ ରାଜ୍ୟର ବିରୋଧୀ ଦଳର ନେତାଙ୍କ ପ୍ରତି ଏଭଳି ବୈମାତୃକ ମନୋବୃତି କାହିଁକି ? ଯାହାକି ନବୀନ ବାବୁଙ୍କ କୁତ୍ସିତ ମନୋଭାବକୁ ପଦାରେ ପକାଇଛି ବୋଲି ଜୟନାରାୟଣ ମିଶ୍ର କହିଛନ୍ତି ।
ପ୍ରଧାନମନ୍ତ୍ରୀ ଓଡ଼ିଶାର ଉନ୍ନତି ପାଇଁ ବିଭିନ୍ନ ପ୍ରକଳ୍ପ ମାଧ୍ୟମରେ କୋଟି କୋଟି ଟଙ୍କା ଦେଉଥିଲେ ମଧ୍ୟ ମିଛୁଆ ରାଧୁଆ ରାଜ୍ୟ ସରକାର ସେସବୁ ନିଜେ କରୁଛନ୍ତି ବୋଲି ଡିଣ୍ଡିମ ପିଟି ବିଜ୍ଞାପନ ମାଧ୍ୟମରେ ବାଃ ବାଃ ନେଉଛନ୍ତି । ସବୁ କେନ୍ଦ୍ରୀୟ ଯୋଜନାକୁ ନିଜ ଯୋଜନା କହି ଗାଁ ଗାଁରେ ବିଜୁ ଜନତା ଦଳ ବୈଠକ କରି ନିଜସ୍ୱ ପ୍ରଚାର କରୁଛନ୍ତି । ଯଦି ରାଜ୍ୟ ସରକାର ସବୁବେଳେ କେନ୍ଦ୍ର ସରକାରଙ୍କ ଉପରେ ଦୋଷ ଲଦୁଛନ୍ତି ତାହାଲେ ବିମାନ ଉଡାନ୍ କେନ୍ଦ୍ରର ଯୋଜନାରେ ବିଜେପି ଫଟୋ ଦେବ ବୋଲି ବିଜେଡି କାହିଁକି ଆଶା କରୁଛି ବୋଲି ଜୟନାରାୟଣ ମିଶ୍ର କହିଛନ୍ତି ।