କର୍ଣ୍ଣାଟକକୁ ମିଳିଲା ମୁଖ୍ୟମନ୍ତ୍ରୀ, ମେ ୨୦ ରେ ଶପଥ ଗ୍ରହଣ

ଓଡ଼ିଆ ନ୍ୟୁଜ (ବ୍ୟୁ୍ରୋ) : ଦୀର୍ଘ ୫ ଦିନର ବିଚାର ବିମର୍ଷ ପରେ କର୍ଣ୍ଣାଟକ ମୁଖ୍ୟମନ୍ତ୍ରୀ କିଏ ହେବେ ତାହାର ଚିତ୍ର ସ୍ପଷ୍ଟ ହୋଇଛି । ବର୍ତ୍ତମାନ କର୍ଣ୍ଣାଟକର ପରବର୍ତ୍ତୀ ମୁଖ୍ୟମନ୍ତ୍ରୀ ସିଦ୍ଧରମୟା ଏବଂ ଉପମୁଖ୍ୟମନ୍ତ୍ରୀ ଡି.କେ ଶିବକୁମାରଙ୍କ ଶପଥ ଗ୍ରହଣ ସମାରୋହ ପାଇଁ କଂଗ୍ରେସ ମଧ୍ୟ ଦିନ ସ୍ଥିର କରିଛି । କଂଗ୍ରେସର ସାଧାରଣ ସମ୍ପାଦକ କେ.ସି ଭେନୁଗୋପାଲ କହିଛନ୍ତି ଯେ ଶପଥ ଗ୍ରହଣ ସମାରୋହ ମେ ୨୦ ତାରିଖ ଅପରାହ୍ଣ ୧୨.୩୦ ରେ ଅନୁଷ୍ଠିତ ହେବ । ସେ କହିଛନ୍ତି ଯେ ଏହି ଦିନ ମୁଖ୍ୟମନ୍ତ୍ରୀ ଏବଂ ଉପମୁଖ୍ୟମନ୍ତ୍ରୀଙ୍କ ସମେତ କ୍ୟାବିନେଟର ଅନ୍ୟ ମନ୍ତ୍ରୀମାନେ ମଧ୍ୟ ଶପଥ ଗ୍ରହଣ କରିବେ ।

କେସି ଭେନୁଗୋପାଲ ଆହୁରି ମଧ୍ୟ କହିଛନ୍ତି ଯେ ସିଦ୍ଧରମୟା କର୍ଣ୍ଣାଟକର ନୂତନ ମୁଖ୍ୟମନ୍ତ୍ରୀ ଥିବାବେଳେ ଡି.କେ ଶିବକୁମାର ଉପମୁଖ୍ୟମନ୍ତ୍ରୀ ହେବେ । ୧୩ ମଇରେ ଦଳ ସଂଖ୍ୟାଗରିଷ୍ଠତା ହାସଲ କରିଥିଲା, ୧୪ ତାରିଖ ଦିନ ଏକ ବୈଠକ ଅନୁଷ୍ଠିତ ହୋଇଥିଲା ଯେଉଁଥିରେ କଂଗ୍ରେସ ଦଳ ପର୍ଯ୍ୟବେକ୍ଷକ ନିଯୁକ୍ତ କରିଥିଲା । ସେ କହିଛନ୍ତି ଯେ କଂଗ୍ରେସ ଏକ ଗଣତାନ୍ତ୍ରିକ ଦଳ । ଆମେ ଏକମତ ଉପରେ ବିଶ୍ୱାସ କରୁ, ଏକଛତ୍ରବାଦୀ ଶାସନ ନୁହେଁ । ଉଭୟ ସିଦ୍ଧରମୟା ଏବଂ ଡି.କେ ଶିବକୁମାର ଦଳ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।