ଚାରା ଦୁର୍ନୀତି ମାମଲାରେ ଦୋଷୀ ସାବ୍ୟସ୍ତ ହେବା ପରେ ଜାମିନ ପାଇଁ ହାଇକୋର୍ଟ ଯିବେ ଲାଲୁ; ଆସନ୍ତା ମାସରୁ ଶୁଣାଣି ଆରମ୍ଭ ହେବ

ବହୁ ଚର୍ଚ୍ଚିତ ଚାରା ଦୁର୍ନୀତି ମାମଲା ଏବଂ ଡୋରଣ୍ଡା ଟ୍ରେଜେରୀ ବେଆଇନ ପ୍ରତ୍ୟାହାରର ମାମଲାରେ ଗତକାଲି ସିବିଆଇର ସ୍ୱତନ୍ତ୍ର କୋର୍ଟ ଆରଜେଡି ସୁପ୍ରିମୋ ଲାଲୁ ପ୍ରସାଦ ଯାଦବଙ୍କୁ ୫ ବର୍ଷ ଜେଲ ଦଣ୍ଡାଦେଶ ଶୁଣାଇଛନ୍ତି। ଏହି ମାମଲାରେ ବୃଦ୍ଧାବସ୍ଥା ଏବଂ ଅସୁସ୍ଥତାକୁ ଦର୍ଶାଇ କମ୍ ଦଣ୍ଡ ପାଇଁ କୋର୍ଟଙ୍କ ପାଖରେ ଆବେଦନ କରିଥିଲେ। ହେଲେ ତାଙ୍କ ଆବେଦନକୁ ଗ୍ରହଣ କରିନାହାଁନ୍ତି କୋର୍ଟ। ଏଭଳି ପରିସ୍ଥିତିରେ ବର୍ତ୍ତମାନ ଲାଲୁ ଏହି ଦଣ୍ଡ ବିରୋଧରେ ହାଇକୋର୍ଟ ଯିବେ। ଏହା ସହିତ ସେ ଜେଲରୁ ବାହାରିବା ପାଇଁ ଜାମିନ ଆବେଦନ ମଧ୍ୟ କରିବେ। ଏହି ପ୍ରକ୍ରିୟା ପ୍ରାୟ ଦେଢ଼ ମାସ ସମୟ ଲାଗିବ। ଜାମିନ ଆବେଦନ ଉପରେ ଶୁଣାଣି ଆସନ୍ତା ମାସରୁ ଆରମ୍ଭ ହେବାର ସମ୍ଭାବନା ରହିଛି।

ସେ ଏପର୍ଯ୍ୟନ୍ତ ସାଢେ଼ ତିନି ବର୍ଷର ଜେଲରେ ରହିଛନ୍ତି ଏବଂ ଏହି ଆଧାରରେ ତାଙ୍କୁ ହାଇକୋର୍ଟରୁ ଜାମିନ ମିଳିଛି। ଚାରା ଦୁର୍ନୀତିର ଡୁମ୍କା ଟ୍ରେଜେରୀ ମାମଲାରେ ତାଙ୍କୁ ସର୍ବାଧିକ ସାତ ବର୍ଷ ଜେଲ ଦଣ୍ଡାଦେଶ ହୋଇଛି। ଏଥିରେ ଜାମିନ ଶୁଣାଣି ସମୟରେ ହାଇକୋର୍ଟ ଏକ ରିପୋର୍ଟ ମାଗିଥିଲେ ଯେ ଏହି ମାମଲାରେ ଲାଲୁ ପ୍ରସାଦ ଯାଦବ କେତେ ଦିନ ଜେଲରେ ଅଛନ୍ତି? ଲାଲୁଙ୍କ ଓକିଲ ଅଧା ଅବଧି ଜେଲରେ ରହିବାର ଏକ ଡକ୍ୟୁମେଣ୍ଟ କୋର୍ଟରେ ଜମା କରିଥିଲେ। ଯାହା ପରେ କୋର୍ଟ ତାଙ୍କୁ ଜାମିନ ପ୍ରଦାନ କରିଥିଲେ।