ବର୍ଷାରେ ବେହାଲ ତେଲେଙ୍ଗାନା: ଫୁଲୁଛି ଗୋଦାବରୀ ନଦୀର ଜଳସ୍ତର

ଓଡ଼ିଆ ନ୍ୟୁଜ(ବ୍ୟୁରୋ): ଲଗାଣ ବର୍ଷାରେ ବେହାଲ ତେଲେଙ୍ଗାନା ଓ ଆନ୍ଧ୍ରପ୍ରଦେଶ । ବଢିବାରେ ଲାଗିଛି ଗୋଦାବରୀ ନଦୀର ଜଳସ୍ତର। ଫଳରେ ସୀମାନ୍ତ ମୋଟୁ ଠାରୁ ରାଞ୍ଚି ବିଜୟୱାଡ଼ା କରିଡର ୩୨୬ ନମ୍ବର ଜାତୀୟ ରାଜପଥ ସମ୍ପୂର୍ଣ୍ଣ ବନ୍ଦ ରହିଛି। କୁଇଗୁର ବ୍ରିଜ଼ ଉପରେ ୪ ଫୁଟର ପାଣି ପ୍ରବାହିତ ହେଉଛି । ଫଳରେ ଉଭୟ କୂଳରେ ଶତାଧିକ ଗାଡି ଅଟକି ରହିଛି । ବନ୍ୟାଜଳରେ ବୁଡ଼ିଛି ସମଗ୍ର ଗାଁ । ଗାଁ ଲୋକେ ପ୍ରାଣ ବିକଳରେ ଛାତ ଉପରେ ଚଢ଼ିଲେଣି ତ କିଏ ଗଛ ଉପରେ ଚଢ଼ିଲାଣି । ତେବେ ଏପରି ଏକ ଦୃଶ୍ୟ ତେଲେଙ୍ଗାନାର ଖମ୍ମକ ଅଂଚଳରୁ ସାମ୍ନାକୁ ଆସିଛି ।ଗୋଦାବରୀ ନଦୀର ଜଳସ୍ତର ୫୫ ଫୁଟକୁ ବୃଦ୍ଧି ପାଇଛି। ଆନ୍ଧ୍ରର ବାଦ୍ରାଦ୍ରି କତାଗୁଡ଼େମ ଜିଲ୍ଲାରେ ହାଇ ଆଲର୍ଟ ଜାରି କରିଛନ୍ତି ଜିଲ୍ଲାପାଳ ।

ବାଦ୍ରାଚେଲାମର କତାକଲୋନୀ, ଆୟାପା କଲୋନୀ, ଦୁମାଗୁଡେମ ବ୍ଲକର ଚୁନାମବାଟି ଏହି ସବୁ ଗାଁରୁ ୪୦୦ରୁ ଉର୍ଦ୍ଧ୍ଵ ଲୋକଙ୍କୁ ସ୍ଥାନାନ୍ତର କରିଛି ଆନ୍ଧ୍ର ପ୍ରଶାସନ । ଅନ୍ୟପଟେ ବନ୍ୟା ଓ ବର୍ଷା ଜନିତ ମୃତ୍ୟୁ ସଂଖ୍ୟା ମଧ୍ୟ ବଢ଼ିବାରେ ଲାଗିଛି । ବିଭିନ୍ନ ଜିଲ୍ଲାରେ ପ୍ରବଳ ବର୍ଷା ନେଇ ରେର୍ଡ଼ ଅଲର୍ଟ ଜାରି କରିଛି ପାଣିପାଗ ବିଭାଗ ।