ଆଜି କୀଭ ଯିବେ ପୋଲାଣ୍ଡ ଏବଂ ସ୍ଲୋଭେନିଆର ପ୍ରଧାନମନ୍ତ୍ରୀ; ଯୁଦ୍ଧକୁ ନେଇ ୟୁକ୍ରେନର ରାଷ୍ଟ୍ରପତିଙ୍କ ସହ କରିବେ ଆଲୋଚନା !

ଋଷିଆ ଏବଂ ୟୁକ୍ରେନ ବିବାଦ ମଧ୍ୟରେ ଗତକାଲି ଚତୁର୍ଥ ରାଉଣ୍ଡ ଆଲୋଚନା ଯୁଦ୍ଧର ୧୯ ତମ ଦିନରେ ହୋଇଥିଲା। ଯୁଦ୍ଧର ୨୦ ତମ ଦିନରେ ମଧ୍ୟ ଦୁଇ ଦେଶ ଭିତରେ ଏହି ଆଲୋଚନା ଜାରି ରହିବ। ତେବେ ସୋମବାର ଅନୁଷ୍ଠିତ ଆଲୋଚନାରେ ଦୁଇ ଦେଶ ମଧ୍ୟରେ କୌଣସି ଆପୋଷ ବୁଝାମଣା ହୋଇପାରି ନାହିଁ। ୟୁକ୍ରେନ ରାଷ୍ଟ୍ରପତି ଜେଲେନସ୍କି କହିଛନ୍ତି ଯେ ଯୁଦ୍ଧ ବନ୍ଦ କରିବା ଏବଂ ଶାନ୍ତି ପ୍ରତିଷ୍ଠା ପାଇଁ ପ୍ରୟାସର ଏକ ଅଂଶ ଭାବରେ ସେ ଇସ୍ରାଏଲର ପ୍ରଧାନମନ୍ତ୍ରୀ ନାଫ୍ଟାଲି ବେନେଟଙ୍କ ସହ କଥା ହୋଇଛନ୍ତି। ଏଥି ସହିତ ଯୁଦ୍ଧର ୨୦ ତମ ଦିନରେ ଋଷିଆର ବୈଦେଶିକ ମନ୍ତ୍ରଣାଳୟର ବିବୃତ୍ତି ଆସିଛି। ଋଷିଆର ବୈଦେଶିକ ମନ୍ତ୍ରଣାଳୟ କହିଛି ଯେ ୟୁକ୍ରେନର ମିସାଇଲ ଆକ୍ରମଣରେ ସେଠାରେ ୨୦ ଜଣଙ୍କର ମୃତ୍ୟୁ ଘଟିଛି ଏବଂ ୨୮ ଜଣ ଆହତ ହୋଇଛନ୍ତି। ସୈନ୍ୟବାହିନୀର ସୂଚନା ଅନୁଯାୟୀ, ମାର୍ଚ୍ଚ ୧୪ ରେ ଡୋନାଟସ୍କ ଅଞ୍ଚଳରେ ଥିବା ଏକ ଆବାସିକ କମ୍ପ୍ଲେକ୍ସରେ ଟୋଚକା-ୟୁ କ୍ଷେପଣାସ୍ତ୍ର ଦ୍ୱାରା ଏହି ଆକ୍ରମଣ କରାଯାଇଥିଲା। ଏଥି ସହିତ, ୟୁକ୍ରେନ ଗଣମାଧ୍ୟମ ରିପୋର୍ଟ କରିଛି ଯେ ଡୋନବାସରେ ଭୟଙ୍କର ଲଢେ଼ଇ ଚାଲିଛି। ୟୁକ୍ରେନର ସଶସ୍ତ୍ର ବାହିନୀ ଅନୁଯାୟୀ ୧୦୦ ରୁଷୀୟ ସୈନିକଙ୍କର ମୃତ୍ୟୁ ଘଟିଛି ଏବଂ ୬ ଟି ଗାଡି ନଷ୍ଟ ହୋଇଯାଇଛି।

ଋଷିଆ କ୍ରମାଗତ ଭାବରେ ୟୁକ୍ରେନର ସହରଗୁଡ଼ିକୁ ଟାର୍ଗେଟ କରୁଛି। ଏହି ସମୟ ମଧ୍ୟରେ ରୁବିଜେନରେ ରୁଷର ଆକ୍ରମଣରେ ୪ ଜଣଙ୍କର ମୃତ୍ୟୁ ହୋଇଛି। ଲୁହାନସ୍କ ଓବ୍ଲାଷ୍ଟର ରାଜ୍ୟପାଳ ସେରହି ହାଇଦାଇ କହିଛନ୍ତି ଯେ ରୁଷୀୟ ସୈନିକ ଦୃଷ୍ଟିହୀନ ପିଲାମାନଙ୍କ ପାଇଁ ତିନୋଟି ବିଦ୍ୟାଳୟକୁ ନଷ୍ଟ କରିଦେଇଛନ୍ତି ଏବଂ ବୋର୍ଡିଂ ସ୍କୁଲ ଏବଂ ରୁବିଜେନ୍ ସହରର ଏକ ଡାକ୍ତରଖାନାକୁ ମଧ୍ୟ ଧ୍ୱଂସ କରିଦେଇଛି।

ମାରିଅପୋଲ ସିଟିରେ ରୁଷିଆର ଆକ୍ରମଣରେ ନିହତ ହୋଇଥିବା ଲୋକଙ୍କ ସଂଖ୍ୟାକୁ ନେଇ ବିଭିନ୍ନ ଦାବି କରାଯାଉଛି। ଏହି ସମୟରେ, ମାରିଅପୋଲ ସିଟି ପରିଷଦ ନିଶ୍ଚିତ କରିଛି ଯେ ୧୪ ମାର୍ଚ୍ଚ ସୁଦ୍ଧା ଋଷିଆର ଯୁଦ୍ଧରେ ସହରରେ ପ୍ରାୟ ୨,୩୫୭ ଜଣଙ୍କର ମୃତ୍ୟୁ ଘଟିଛି।

ପୋଲାଣ୍ଡ ଏବଂ ସ୍ଲୋଭେନିଆର ପ୍ରଧାନମନ୍ତ୍ରୀମାନେ ଆଜି ୟୁରୋପୀୟ ୟୁନିଅନର ନେତାଙ୍କ ପ୍ରତିନିଧୀ ଭାବରେ ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କୁ ଭେଟିବା ପାଇଁ କୀଭ ଗସ୍ତ କରିବେ। ୟୁକ୍ରେନର ସାର୍ବଭୌମତ୍ୱ ଏବଂ ସ୍ବାଧୀନତା ପାଇଁ ସମଗ୍ର ୟୁରୋପୀୟ ୟୁନିଅନର ସ୍ପଷ୍ଟ ସମର୍ଥନକୁ ନିଶ୍ଚିତ କରିବା ଏହି ଗସ୍ତର ଉଦ୍ଦେଶ୍ୟ ବୋଲି ପୋଲାଣ୍ଡ ସରକାର କହିଛନ୍ତି।