ସୁପ୍ରିମକୋର୍ଟରେ ପହଞ୍ଚିଲା ବାହାନଗା ଟ୍ରେନ୍ ଟ୍ରାଜେଡି ମାମଲା

ଓଡ଼ିଆ ନ୍ୟୁଜ୍ (ବ୍ୟୁରୋ): ବାହାନଗାରେ ଘଟିଥିବା ଟ୍ରେନ୍ ଦୁର୍ଘଟଣାକୁ ନେଇ ସାରା ଦେଶ ବର୍ତ୍ତମାନ ସ୍ତବ୍ଧ । ଦୁର୍ଘଟଣା କେମିତି ହେଲା? ତାକୁ ନେଇ ଏବେ ସବୁଠି ଆଲୋଚନା । ଏହାରି ଭିତରେ ଏହି ଟ୍ରେନ୍ ଦୁର୍ଘଟଣାର ତଦନ୍ତ ବର୍ତ୍ତମାନ ସୁପ୍ରିମକୋର୍ଟରେ ପହଞ୍ଚିଛି । ବିଶାଲ ତିୱାରୀ ନାମକ ଜଣେ ଓକିଲ ଏହି ପ୍ରସଙ୍ଗରେ ଏକ ପିଟିସନ ଦାଖଲ କରିଛନ୍ତି। ଏହି ଆବେଦନରେ ଦୁର୍ଘଟଣାକୁ ରୋକିବା ପାଇଁ ‘କବଚ’ ବ୍ୟବସ୍ଥାକୁ ଯଥାଶୀଘ୍ର କାର୍ୟ୍ୟକାରୀ କରିବାକୁ ଦାବି କରାଯାଇଛି।

ଏହା ସହିତ ପୂର୍ବତନ ବିଚାରପତିଙ୍କ ଅଧ୍ୟକ୍ଷତାରେ ତଦନ୍ତ କମିଶନ ଗଠନ ପାଇଁ ଦାବି କରାଯାଇଛି। ଏହା ବ୍ୟତୀତ ରେଳ ସୁରକ୍ଷା ସମ୍ପର୍କରେ ପୂର୍ବତନ ବିଚାରପତିଙ୍କ ଅଧ୍ୟକ୍ଷତାରେ ଏକ ବିଶେଷଜ୍ଞ କମିଟି ଗଠନ କରିବାକୁ ମଧ୍ୟ ଦାବି କରାଯାଇଛି।

ଟ୍ରେନ୍ ଦୁର୍ଘଟଣାର ସର୍ବଶେଷ ସୂଚନା ପ୍ରଦାନ କରି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମାନସୁଖ ମାଣ୍ଡଭିଆ କହିଛନ୍ତି ଯେ ଏହି ଦୁର୍ଘଟଣାରେ ୧୦୦୦ ରୁ ଅଧିକ ଲୋକ ଆହତ ହୋଇଛନ୍ତି ଏବଂ ସେମାନେ ଚିକିତ୍ସିତ ହେଉଛନ୍ତି। ୧୦୦ ରୁ ଅଧିକ ରୋଗୀ ଗୁରୁତର ଚିକିତ୍ସାର ଆବଶ୍ୟକତା କରୁଛନ୍ତି ଏବଂ ଦିଲ୍ଲୀ ଏମ୍ସ, ଲେଡି ହାର୍ଡିଙ୍ଗ ହସ୍ପିଟାଲ ଏବଂ ଆରଏମଏଲ ହସ୍ପିଟାଲର ବିଶେଷଜ୍ଞ ଡାକ୍ତରମାନେ ସେମାନଙ୍କ ଚିକିତ୍ସା ପାଇଁ ଆଧୁନିକ ଉପକରଣ ଏବଂ ଔଷଧ ନେଇ ଏଠାକୁ ଆସିଛନ୍ତି। ଆମର ଏକ ବିସ୍ତୃତ ଆଲୋଚନା ହୋଇଥିଲା ଏବଂ ଏକ କାର୍ୟ୍ୟ ଯୋଜନା ମଧ୍ୟ ପ୍ରସ୍ତୁତ କରାଯାଇଛି । ଏଥି ସହିତ ଏପର୍ୟ୍ୟନ୍ତ ଏହି ଦୁର୍ଘଟଣାରେ ୨୮୮ ଜଣଙ୍କର ମୃତ୍ୟୁ ହୋଇଛି।