ପୁଲିସକୁ ଚକ୍ମା ଦେଖାଇ ସିଂହଦ୍ବାରରେ ଆକାଶ ମାର୍ଗରେ ଉଡିଲା ଡ୍ରୋନ୍
ଓଡ଼ିଆ ନ୍ୟୁଜ (ବ୍ୟୁ୍ରୋ) : ରଥଯାତ୍ରା ପାଇଁ ଉତ୍ସବମୁଖର ଶ୍ରୀକ୍ଷେତ୍ର । ରଥଯାତ୍ରା ଉପଲକ୍ଷେ ପୁରୀ ଜିଲ୍ଲା ପୁଲିସ ପକ୍ଷରୁ ଶ୍ରୀମନ୍ଦିର ଆଖପାଖ ସହ ସମ୍ପୂର୍ଣ୍ଣ ବଡ଼ଦାଣ୍ଡ ନୋ ଫ୍ଲାଇଂ ଜୋନ୍ ଘୋଷଣା କରାଯାଇଛି। ପୁଲିସର ବିନା ଅନୁମତିରେ କେହି ବି ବଡ଼ଦାଣ୍ଡରେ ଡ୍ରୋନ୍ ଉଡ଼ାଇ ପାରିବେନି ବୋଲି ସ୍ପଷ୍ଟ ନିର୍ଦ୍ଦେଶନାମା ଜାରି ହୋଇଛି। ରଥଯାତ୍ରା ଉପଲକ୍ଷେ ଏହି କଟକଣା ଜାରି ହୋଇଛି। ତଥାପି ଆଜି ପୁଲିସକୁ ଚକ୍ମା ଦେଖାଇ ସିଂହଦ୍ବାରରେ ଆକାଶ ମାର୍ଗରେ ଡ୍ରୋନ୍ ଉଡ଼ିଛି।
ସୂଚନା ଅନୁସାରେ । ଆକାଶମାର୍ଗରେ ବହୁ ଉଚ୍ଚରେ ଏକ ଡ୍ରୋନ୍ ଉଡ଼ି ବଡ଼ଦାଣ୍ଡ ଓ ଶ୍ରୀମନ୍ଦିରର ଭିଡିଓ ଉତ୍ତୋଳନ କରୁଥିବା ଦେଖିବାକୁ ମିଳିଥିଲା। ପୁଲିସ ମୁଣ୍ଡ ଉପରେ କିଛି ସମୟ ପଇଁତରା ମାରିବାପରେ ଏହା ସିଂହଦ୍ବାର ଗୁମୁଟ ଉପରେ ରହି ଶ୍ରୀମନ୍ଦିର ଓ ବଡ଼ଦାଣ୍ଡର ଭିଡିଓ ଉତ୍ତୋଳନ କରିଥିଲା। ଡ୍ରୋନ୍ ଏତେ ଉଚ୍ଚରେ ଉଡ଼ୁଥିଲା ଯେ ଆଖିକୁ ମାଛି ଭଳି ଦିଶୁଥିଲା। ପୁଲିସ ନଜରରେ ପଡ଼ିବା ସହ ଖୋଳତାଡ଼ ପରେ ଡ୍ରୋନ୍ଟି କ୍ଷୀପ୍ର ଗତିରେ ଦୋଳମଣ୍ଡପସାହି ଗଳି ଦେଇ କେଉଁଆଡ଼େ ଉଭାନ୍ ହୋଇଯାଇଥିଲା। ଏହି ଡ୍ରୋନ୍ କାହାର ତାର ଖୋଳତାଡ଼ କରାଯାଇଥିଲେ ବି ପୁଲିସ ଏହାର ଟେର୍ ପାଇପାରିନି। ଏହା ରଥଯାତ୍ରାରେ ସୁରକ୍ଷା ବ୍ୟବସ୍ଥା ପ୍ରତି ଅଙ୍ଗୁଳି ଉଠାଇଛି।
ଅନ୍ୟପଟେ ପୂର୍ବତଟ ରେଳପଥ ପକ୍ଷରୁ ରାଜ୍ୟର ବିଭିନ୍ନ ସ୍ଥାନରୁ ପୁରୀକୁ ୧୫ଟି ସ୍ପେଶାଲ ଟ୍ରେନ୍ ଚଳାଚଳ ଲାଗି ବ୍ୟବସ୍ଥା କରାଯାଇଛି। ୦୮୯୦୭ ପାରାଦୀପ-ପୁରୀ ସ୍ପେଶାଲ, ୦୮୦୧୯ ଅନୁଗୋଳ-ପୁରୀ ସ୍ପେଶାଲ, ୦୮୦୪୧ ଭଦ୍ରକ-ପୁରୀ ସ୍ପେଶାଲ, ୦୮୦୩୩ ଖୋର୍ଦ୍ଧାରୋଡ୍-ପୁରୀ ସ୍ପେଶାଲ, ୦୮୦୫୧ ନୂଆଗାଁ ରୋଡ୍-ପୁରୀ ସ୍ପେଶାଲ, ୦୮୦୨୧ ଅନୁଗୋଳ-ପୁରୀ ସ୍ପେଶାଲ, ୦୮୦୪୩ ଭଦ୍ରକ-ପୁରୀ ସ୍ପେଶାଲ, ୦୮୦୨୩ ବ୍ରହ୍ମପୁର-ପୁରୀ ସ୍ପେଶାଲ, ୦୮୯୦୯ ପାରାଦୀପ-ପୁରୀ ସ୍ପେଶାଲ, ୦୮୫୪୯ ପଲାସା-ପୁରୀ ସ୍ପେଶାଲ, ୦୮୦୪୫ କେନ୍ଦୁଝରଗଡ଼-ପୁରୀ ସ୍ପେଶାଲ, ୦୮୦୨୯ ଗୁଣୁପୁର-ପୁରୀ ସ୍ପେଶାଲ, ୦୮୯୧୧ ଯାଜପୁର କେନ୍ଦୁଝର ରୋଡ୍-ପୁରୀ ସ୍ପେଶାଲ, ୦୮୦୨୫ ବ୍ରହ୍ମପୁର-ପୁରୀ ସ୍ପେଶାଲ ଓ ୦୮୦୩୭ ଖୋର୍ଦ୍ଧାରୋଡ୍-ପୁରୀ ସ୍ପେଶାଲ ଟ୍ରେନ୍ ନିଜ ଗନ୍ତବ୍ୟ ସ୍ଥାନରୁ ପୁରୀ ଅଭିମୁଖେ ଯାତ୍ରା କରିବ।