୪୦ ବର୍ଷ ପରେ ପ୍ରଥମ ଥର ଏହି ଦେଶ ଗସ୍ତ କରିବେ ଭାରତର ପ୍ରଧାନମନ୍ତ୍ରୀ

ଓଡ଼ିଆ ନ୍ୟୁଜ୍ (ବ୍ୟୁରୋ): ଆସନ୍ତା ସପ୍ତାହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ୟୁରୋପୀୟ ଦେଶ ଗସ୍ତ କରିବାର କାର୍ଯ୍ୟକ୍ରମ ରହିଛି । ଏହି ସମୟରେ ଭାରତ ଏବଂ ଗ୍ରୀସ୍ ଦ୍ୱିପାକ୍ଷିକ ସମ୍ପର୍କକୁ ବ୍ୟାପକ ରଣନୀତିକ ଭାଗିଦାରୀ ସ୍ତରକୁ ବୃଦ୍ଧି କରିବାକୁ ଚାହୁଁଛନ୍ତି। ଶୁକ୍ରବାର ସୂତ୍ରରୁ ଏହି ସୂଚନା ଦିଆଯାଇଛି। ଚାରି ଦଶନ୍ଧି ମଧ୍ୟରେ ଭାରତ ପ୍ରଧାନମନ୍ତ୍ରୀଙ୍କ ଗ୍ରୀସକୁ ଏହା ପ୍ରଥମ ଗସ୍ତ ହେବ। ବାଣିଜ୍ୟ, ପୁଞ୍ଜି ବିନିଯୋଗ, ପ୍ରତିରକ୍ଷା ଏବଂ ଲୋକ-ଲୋକଙ୍କ ସମ୍ପର୍କ ଭଳି କ୍ଷେତ୍ରରେ ସହଯୋଗ ବୃଦ୍ଧି କରିବାକୁ ଉଭୟ ପକ୍ଷ ଆଗ୍ରହୀ ଅଟନ୍ତି। ମୋଦୀଙ୍କ ଗ୍ରୀସ ଗସ୍ତ ଗୁରୁତ୍ୱପୂର୍ଣ୍ଣ ମନେହୁଏ କାରଣ ସେପ୍ଟେମ୍ବର ୧୯୮୩ ରେ ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ପରଠାରୁ ଏହା ଭାରତ ପ୍ରଧାନମନ୍ତ୍ରୀଙ୍କ ଗ୍ରୀସ ଗସ୍ତ ହେବ।

ଇନ୍ଦିରା ଗାନ୍ଧୀଙ୍କ ପରେ କୌଣସି ପ୍ରଧାନମନ୍ତ୍ରୀ ଗ୍ରୀସ ଯାଇ ନଥିଲେ
୧୯୮୩ ମସିହାରେ ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଗ୍ରୀସ ଗସ୍ତ କରିଥିଲେ। ସେବେଠାରୁ ଅନ୍ୟ କୌଣସି ପ୍ରଧାନମନ୍ତ୍ରୀ ଗ୍ରୀସ ଗସ୍ତ କରିନାହାଁନ୍ତି। ଗ୍ରୀସର ତତ୍କାଳୀନ ପ୍ରଧାନମନ୍ତ୍ରୀ ଆଣ୍ଡ୍ରିଆସ୍ ପାପେଣ୍ଡ୍ରୁ ତିନିଥର ଭାରତ ଗସ୍ତ କରିଥିଲେ। ସେ ନଭେମ୍ବର ୧୯୮୪ ରେ ଇନ୍ଦିରା ଗାନ୍ଧୀଙ୍କ ଅନ୍ତିମ ସଂସ୍କାର ପାଇଁ, ଜାନୁଆରୀ ୧୯୮୫ ରେ ପରମାଣୁ ନିରସ୍ତ୍ରୀକରଣ ସମ୍ମିଳନୀରେ ଯୋଗଦେବା ପାଇଁ ଏବଂ ଜାନୁୟାରୀ ୧୯୮୬ ରେ ଗଣତନ୍ତ୍ର ଦିବସ ଉତ୍ସବର ମୁଖ୍ୟ ଅତିଥି ଭାବରେ ଦ୍ୱିପାକ୍ଷିକ ରାଜ୍ୟ ଗସ୍ତ କରିଥିଲେ। ଜୁନ୍ ମାସରେ ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର ଗ୍ରୀସ ଗସ୍ତ କରିଥିଲେ।