ଅମରନାଥ ଯାତ୍ରା ପୂର୍ବରୁ TRFର ଧମକପୂର୍ଣ୍ଣ ଚିଠି

ଓଡିଆ ନ୍ୟୁଜ୍ (ବ୍ୟୁରୋ): କରୋନା ମହାମାରୀ ହେତୁ ନିରନ୍ତର ସ୍ଥଗିତ ରହିବା ପରେ ଅମରନାଥ ଯାତ୍ରା ଜୁନ୍ ମାସରେ ଆରମ୍ଭ ହେବାକୁ ଯାଉଛି, ବର୍ତ୍ତମାନ ଅମରନାଥ ଯାତ୍ରାକୁ ନେଇ ଭକ୍ତଙ୍କ ମଧ୍ୟରେ ଉତ୍ସାହ ରହିଛି। ଏଥର ଲକ୍ଷ ଲକ୍ଷ ଲୋକ ଅମରନାଥ ଯାତ୍ରାରେ ଅଂଶଗ୍ରହଣ କରିବେ ବୋଲି ଆଶା କରାଯାଉଛି। କିନ୍ତୁ ଏହା ପୂର୍ବରୁ ଆତଙ୍କବାଦୀ ସଂଗଠନର ଆଶଙ୍କା ଦେଖାଦେଇଛି। ଆତଙ୍କବାଦୀ ସଂଗଠନ ଟିଆରଏଫର ଧମକପୂର୍ଣ୍ଣ ଚିଠି ସାମ୍ନାକୁ ଆସିଛି ।

ଏହି ଚିଠିରେ ଆତଙ୍କବାଦୀ ସଂଗଠନ ପକ୍ଷରୁ ରାଷ୍ଟ୍ରିୟ ସ୍ୱୟଂସେବାକ ସଂଗଠନ (ଆରଏସଏସ) ଏବଂ କେନ୍ଦ୍ର ସରକାରଙ୍କୁ ଟାର୍ଗେଟ କରାଯାଇଛି। ସଂଗଠନ କହିଛି ଯେ ସେମାନେ ଏହି ଯାତ୍ରାକୁ ବିରୋଧ କରୁନାହୁଁ କିନ୍ତୁ ଯେତେବେଳେ କାଶ୍ମୀର ବିରୁଦ୍ଧରେ ଏପରି ଧାର୍ମିକ ଅନୁଷ୍ଠାନ ବ୍ୟବହାର କରାଯାଏ, ସେତେବେଳେ ଏହି ବିଷୟଗୁଡ଼ିକୁ ନିଜ ହାତକୁ ନେବା ଆମର ଚିନ୍ତାର ବିଷୟ ହୋଇଯାଏ।

କାଶ୍ମୀରର ଆତଙ୍କବାଦୀ ସଂଗଠନ ଟିଆରଏଫ ପକ୍ଷରୁ କୁହାଯାଇଛି ଯେ ପ୍ରତିବର୍ଷ ୧୫ ହଜାର ବଦଳରେ ୮ ଲକ୍ଷ ଲୋକ ଅମରନାଥ ଯାତ୍ରାରେ ଆସୁଥିବାବେଳେ ୧୫ ଦିନ ବଦଳରେ ୭୫ ଦିନର ଯାତ୍ରା ଚାଲିଛି। ଏହା ହେଉଛି ଅମରନାଥ ଯାତ୍ରାର ରାଜନୀତିକରଣ । ଏଥିରେ ଆହୁରି ଦର୍ଶାଯାଇଛି ଯେ ଶ୍ରୀମନ୍ଦିର ବୋର୍ଡ ଦ୍ୱାରା ଏହା ଘୋଷଣା କରାଯାଇଛି ଯେ ତିନି ଲକ୍ଷ ଭକ୍ତ ପବିତ୍ର ଗୁମ୍ଫା ପରିଦର୍ଶନ କରିପାରିବେ ଏବଂ ଏହି ଯାତ୍ରା ୭୫ ଦିନ ପର୍ୟ୍ୟନ୍ତ ଜାରି ରହିବ। ଏହା ଏକ ରାଜନୈତିକ ପଦକ୍ଷେପ ବ୍ୟତୀତ ଆଉ କିଛି ନୁହେଁ ।

ଆତଙ୍କବାଦୀ ସଂଗଠନ ପକ୍ଷରୁ ତୀର୍ଥଯାତ୍ରୀମାନଙ୍କୁ କୁହାଯାଇଛି ଯେପର୍ୟ୍ୟନ୍ତ ସେମାନେ କାଶ୍ମୀର ପ୍ରସଙ୍ଗରେ ହସ୍ତକ୍ଷେପ ନକରନ୍ତି ସେ ପର୍ୟ୍ୟନ୍ତ ସେମାନେ ସୁରକ୍ଷିତ ରହିବେ। ଯଦି ଅମରନାଥ ଯାତ୍ରା ରାଜନୈତିକ ଏବଂ ଜନସଂଖ୍ୟାଗତ ଲାଭ ପାଇଁ ବ୍ୟବହୃତ ହୁଏ ତେବେ ସରକାରଙ୍କ ଯୋଜନା ସଫଳ ହେବାକୁ ଅନୁମତି ଦେବ ନାହିଁ ବୋଲି ଆତଙ୍କବାଦୀ ସଂଗଠନ ପକ୍ଷରୁ କୁହାଯାଇଛି ।

ସୂଚନାନୁସାରେ ଅମରନାଥ ଯାତ୍ରା ବର୍ଷ ବର୍ଷ ଧରି ଆତଙ୍କବାଦୀଙ୍କ ଟାର୍ଗେଟରେ ରହିଆସିଛି। ୨୦୦୦ ମସିହାରେ ପହଲଗାମ ବେସ କ୍ୟାମ୍ପରେ ଆତଙ୍କବାଦୀ ଆକ୍ରମଣରେ ୧୭ ଜଣ ତୀର୍ଥଯାତ୍ରୀଙ୍କ ସମେତ ୨୫ ଜଣଙ୍କର ମୃତ୍ୟୁ ଘଟିଥିଲା। ଜୁଲାଇ ୨୦୧୭ ରେ ଏକ ଯାତ୍ରୀବାହୀ ବସ୍ ଉପରେ ଆତଙ୍କବାଦୀ ଆକ୍ରମଣରେ ୭ଜଣ ତୀର୍ଥଯାତ୍ରୀଙ୍କ ମୃତ୍ୟୁ ଘଟିଥିଲା। ସୂଚନାଯୋଗ୍ୟ ଯେ ଅମରନାଥ ଯାତ୍ରା ଶାନ୍ତିପୂର୍ଣ୍ଣ ଏବଂ ନିରାପଦରେ ସମ୍ପନ୍ନ ହେବା ପାଇଁ ଗୃହ ମନ୍ତ୍ରଣାଳୟ ସ୍ୱତନ୍ତ୍ର ପ୍ରସ୍ତୁତି କରିଛି। ଅମରନାଥ ଯାତ୍ରାର ଦୁଇଟି ମାର୍ଗରେ ଅତି କମରେ ୧୨,୦୦୦ ପାରାମିଲିଟାରୀ ଫୋର୍ସ ଏବଂ ଜାମ୍ମୁ କାଶ୍ମୀର ପୋଲିସର ହଜାର ହଜାର କର୍ମଚାରୀ ନିୟୋଜିତ ହେବେ ବୋଲି ଆଶା କରାଯାଉଛି। ଡ୍ରୋନ୍ ଉପରେ ମଧ୍ୟ ନଜର ରଖାଯିବ।

୨୦୧୯ ରେ, ଧାରା ୩୭୦ ରଦ୍ଦ ହେବା ପୂର୍ବରୁ ଏହି ଯାତ୍ରା ବନ୍ଦ ହୋଇଯାଇଥିଲା । ନିକଟରେ ଜାମ୍ମୁ କାଶ୍ମୀରରେ ହିଂସା ଘଟିବା ପରେ ଅମରନାଥ ଯାତ୍ରା ଏକ ଗୁରୁତ୍ୱପୂର୍ଣ୍ଣ ସୁରକ୍ଷା ଚ୍ୟାଲେଞ୍ଜ ସୃଷ୍ଟି କରିଛି। ନିକଟରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଅମରନାଥ ଯାତ୍ରାର ପ୍ରସ୍ତୁତି ଏବଂ ନିରାପତ୍ତା ସମୀକ୍ଷା କରିଛନ୍ତି। ଏହି ସମୟରେ ଟିଆରଏଫ ଏକ ଧମକପୂର୍ଣ୍ଣ ଚିଠିକୁ ନେଇ ଯାତ୍ରୀଙ୍କ ସୁରକ୍ଷାପ୍ରତି କଡାନିଷ୍ପତି ନିଆଯାଉଛି ।