୩୫ରୁ ୪୦ ପାକ୍ ସେନା ମରିଛନ୍ତି: DGMO

ଓଡ଼ିଆ ନ୍ୟୁଜ୍: ଭାରତୀୟ ସେନାର ଅପରେସନ ସିନ୍ଦୂରରେ ପାକିସ୍ତାନ ଓ ପାକିସ୍ତାନ ଅଧିକୃତ କାଶ୍ମୀର (ପିଓକେ)ରେ ଆତଙ୍କବାଦୀ ଅଡ୍ଡାଗୁଡ଼ିକୁ ଧ୍ୱଂସ କରାଯାଇଛି। ଏଥିରେ ପାକିସ୍ତାନ ସେନାକୁ ମଧ୍ୟ ବଡ଼ କ୍ଷତି ସହିବାକୁ ପଡ଼ିଛି। ଆଜି ଏକ ସାମ୍ବାଦିକ ସମ୍ମିଳନୀରେ ଡାଇରେକ୍ଟର ଜେନେରାଲ ଅଫ ମିଲିଟାରୀ ଅପରେସନ୍ସ (ଡିଜିଏମଓ) ଲେଫ୍ଟନାଣ୍ଟ ଜେନେରାଲ ରାଜୀବ ଘାଇ ଘୋଷଣା କରିଛନ୍ତି ଯେ, ମେ ଇ ୭ ରୁ ୧୦ ତାରିଖ ମଧ୍ୟରେ ନିୟନ୍ତ୍ରଣ ରେଖା (ଏଲଓସି) ନିକଟରେ ହୋଇଥିବା ଗୁଳିଚାଳନା ଓ ଛୋଟ ଅସ୍ତ୍ରଶସ୍ତ୍ର ଆକ୍ରମଣରେ ପାକିସ୍ତାନ ସେନାର ପ୍ରାୟ ୩୫ ରୁ ୪୦ ଜଣ ଯବାନ ନିହତ ହୋଇଛନ୍ତି।

ଏପ୍ରିଲ ୨୨ରେ ଜମ୍ମୁ ଓ କାଶ୍ମୀରର ପହଲଗାମରେ ହୋଇଥିବା ଏକ ଆତଙ୍କବାଦୀ ଆକ୍ରମଣରେ ୨୬ ଜଣ ଲୋକ, ମୁଖ୍ୟତଃ ପର୍ଯ୍ୟଟକ, ପ୍ରାଣ ହରାଇଥିଲେ। ଏହି ଆକ୍ରମଣରେ ପାକିସ୍ତାନର ସମ୍ପୃକ୍ତି ଥିବା ଭାରତ ଅଭିଯୋଗ କରିଥିଲା, ଯାହାକୁ ଇସଲାମାବାଦ ଅସ୍ୱୀକାର କରିଛି। ଜବାବରେ, ଭାରତୀୟ ସଶସ୍ତ୍ର ବାହିନୀ ମଇ ୭ରେ ‘ଅପରେସନ ସିନ୍ଦୂର’ ଆରମ୍ଭ କରି ପାକିସ୍ତାନ ଓ ପିଓକେରେ ୯ଟି ଆତଙ୍କବାଦୀ ଅଡ୍ଡା ଉପରେ ସଠିକ ଆକ୍ରମଣ କରିଥିଲା। ଏହି ଅଭିଯାନରେ ୧୦୦ରୁ ଅଧିକ ଆତଙ୍କବାଦୀ, ଯୁସୁଫ ଆଜହର, ଆବଦୁଲ ମଲିକ ରଉଫ ଓ ମୁଦାସିର ଅହମଦ ଭଳି ଉଚ୍ଚ ସ୍ତରୀୟ ଆତଙ୍କବାଦୀ ନିପାତ ହୋଇଥିଲେ।