ଠାକୁରାଣୀସ୍ଥିତ ଆର୍ସେଲର ମିତ୍ତଲ ଲୌହ ଖଣି ନିକଟରେ ଟ୍ରକ ଦୁର୍ଘଟଣା ଗ୍ରସ୍ତ

ଓଡ଼ିଆ ନ୍ୟୁଜ,(ବ୍ୟୁରୋ): ଠାକୁରାଣୀସ୍ଥିତ ଆର୍ସେଲର ମିତ୍ତଲ ଲୌହ ଖଣି ନିକଟରେ ଟ୍ରକ ଦୁର୍ଘଟଣା ଗ୍ରସ୍ତ, ଚାଳକ ମୃତ | କେନ୍ଦୁଝର ଜିଲ୍ଲା ବଡ଼ବିଲ ଥାନା ଅନ୍ତର୍ଗତ ଠାକୁରାଣୀସ୍ଥିତ ଆର୍ସେଲର ମିତ୍ତଲ ଲୌହ ଖଣି ନିକଟରେ ଗତ ରାତିରେ ଏକ ଟ୍ରକ୍ ଦୁର୍ଘଟଣା ଗ୍ରସ୍ତ ହୋଇ ଏହାର ଚାଳକ ମୃତ୍ୟୁବରଣ କରିଥିବା ଜଣାପଡିଛି।

ସୂଚନାନୁସାରେ ଉକ୍ତ ଟ୍ରକ ମାଲ ବୋଝେଇ କରି ଖଣିରୁ ବାହାରୁଥିବା ବେଳେ ଗଡାଣିରେ ଭାରସାମ୍ୟ ହରାଇ ଓଲଟି ପଡିଥିଲା। ଫଳରେ ଏହାର ଚାଳକ ମାଲ ଓ ଗାଡି ମଝିରେ ଚାପି ହୋଇ ପ୍ରାଣ ହରାଇଥିଲେ। ଦୁର୍ଘଟଣା ଏତେ ଭୟଙ୍କର ଥିଲା ଯେ ଟ୍ରକର ଆଗ ଗୁଡିକ ଭାଙ୍ଗି ଯାଇ ଗାଡିରୁ ଅଲଗା ହୋଇଯାଇଥିବା ବେଳେ ବୋଝେଇ ମାଲ ଗୁଡିକ ରାସ୍ତା ଉପରେ ବିଛାଡି ହୋଇ ପଡିଥିଲା।

ରାତିସାରା ଉଦ୍ଧାର କାର୍ଯ୍ୟ ଜାରି ରହିଥିବା ଖବର ନେବା ପର୍ଯ୍ୟନ୍ତ ଟ୍ରକଟି ଦୁର୍ଘଟଣା ସ୍ଥଳରେ ରହିଥିବା ବେଳେ ଚାଳକଙ୍କ ମୃତଦେହ ବ୍ୟବଚ୍ଛେଦ ପାଇଁ ବଡବିଲ ମେଡିକାଲରେ ରହିଥିବା ଦେଖା ଯାଇଛି। ପୋଲିସ ଘଟଣାର ତଦନ୍ତ ଜାରି ରଖିଥିବା ସୂଚନା ମିଳିଛି।