ଛାତ୍ରଙ୍କ ପକେଟରେ ଫୁଟିଲା ବିସ୍ଫୋରକ, ୨ଜଣ ଛାତ୍ର ଗୁରୁତର

ଓଡ଼ିଆ ନ୍ୟୁଜ୍(ବ୍ୟୁରୋ): ସ୍କୁଲରେ ଅଘଟଣ। ଛାତ୍ରଙ୍କ ପକେଟରେ ଫୁଟିଲା ବିସ୍ଫୋରକ। ୨ଜଣ ଛାତ୍ର ଗୁରୁତର ହୋଇଥିବା ବେଳେ ଜଣେ ଆହତ ହୋଇଛନ୍ତି। କନ୍ଧମାଳ ଜିଲ୍ଲା ବାଲିଗୁଡା ବ୍ଲକ କରୁମୁଣ୍ଡା ଗାଁରେ ସେଣ୍ଟ ଜାଭିଆର ହାଇସ୍କୁଲରେ ଅଘଟଣ। ଜଣେ ଛାତ୍ର ଜୋସ ନାୟକ ନିଜ ପକେଟରେ ବିସ୍ଫୋରକ ରଖି ପଡ଼ିଆରେ ଖେଳୁଥିବା ବେଳେ ବିସ୍ଫୋରଣ ହୋଇଛି। ଏଥିରେ ଜୋସଙ୍କ ହାତ ପାପୁଲି କଟି ଯାଇଥିବା ବେଳେ ଜଙ୍ଘ ଓ ମୁହଁରେ ଗଭୀର କ୍ଷତ ସୃଷ୍ଟି ହୋଇଛି। ଅନ୍ୟ ଜଣେ ଛାତ୍ର ଆଶିଷ ନାୟକଙ୍କ ଛାତି ଓ ଗୋଡ଼ରେ ଗଭୀର ଆଘାତ ଲାଗିଛି।

ତିନି ଛାତ୍ରଙ୍କୁ ବାଲିଗୁଡା ଉପଖଣ୍ଡ ଚିକିତ୍ସାଳୟରେ ପ୍ରଥମେ ପ୍ରାଥମିକ ଚିକିତ୍ସା କରାଯାଇଥିଲା। ପରେ ଜଣେ ଗୁରୁତରଙ୍କୁ ବ୍ରହ୍ମପୁର ଏମକେସିଜି ମେଡିକାଲ ଓ ଅନ୍ୟ ଜଣଙ୍କୁ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ତେବେ ଏହା କି ପ୍ରକାର ବିସ୍ପୋରକ ତାହା ଏଯାବତ ଜଣାପଡ଼ିନାହିଁ। ଛାତ୍ର ଜଣକ ବିସ୍ପୋରକ କେଉଁଠୁ ପାଇଲେ ଓ ସ୍କୁଲ ପରିସରକୁ ଆଣିଲେ ତାକୁ ନେଇ ପ୍ରଶ୍ନ ଉଠିଛି। ଘଟଣାର ତଦନ୍ତ ଜାରି ରହିଥିବା ବାଲିଗୁଡା ଥାନା ଅଧିକାରୀ ବାବା ଶଙ୍କର ସରାଫ ସୂଚନା ଦେଇଛନ୍ତି।