୨୦୩୫ ସୁଦ୍ଧା ୯୦୦ ପରମାଣୁ ବୋମା ତିଆରି କରିବାକୁ ଲକ୍ଷ ରଖିଛି ଚାଇନା!

ଓଡ଼ିଆ ନ୍ୟୁଜ୍(ବ୍ୟୁରୋ): ତାଇୱାନ ପ୍ରସଙ୍ଗରେ ଆମେରିକା ସହ ଚାଲିଥିବା ବିବାଦ ମଧ୍ୟରେ ଚୀନ୍ ଆଣବିକ ଭଣ୍ଡାର ବୃଦ୍ଧି କରିବାକୁ ଯୋଜନା କରୁଛି। କାଇଡୋ ନ୍ୟୁଜ୍ ସୂତ୍ରରୁ ପ୍ରକାଶ ଯେ ୨୦୩୫ ସୁଦ୍ଧା ଚୀନ୍ ଆଣବିକ ଅସ୍ତ୍ର ସଂଖ୍ୟାକୁ ୯୦୦ କୁ ବୃଦ୍ଧି କରିବାକୁ ଯୋଜନା କରୁଛି। ଚାଇନାର ପିପୁଲ୍ସ ଲିବରେସନ୍ ଆର୍ମି ଏକ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଛି, ଯାହା ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ଦ୍ୱାରା ଅନୁମୋଦିତ ହୋଇଛି। ଏହି ବ୍ଲୁ ପ୍ରିଣ୍ଟ ଅନୁଯାୟୀ ଚାଇନା ଆମେରିକା ବିରୋଧରେ ନିଜର ସେନାର ଶକ୍ତି ବୃଦ୍ଧି କରିବାକୁ ଜୋରଦାର କାର୍ୟ୍ୟ କରୁଛି।

ଚୀନ୍ର ଏହି ଉଦ୍ଦେଶ୍ୟକୁ ଆମେରିକା ମଧ୍ୟ ବୁଝିଛି। ୨୦୨୨ ମସିହାରେ ଆମେରିକା ଏହା ମଧ୍ୟ କହିଥିଲା ଯେ ଚୀନ୍ ଆଣବିକ ଭଣ୍ଡାର ବୃଦ୍ଧି ଦିଗରେ କାର୍ୟ୍ୟ କରୁଛି। ଆମେରିକା ଦାବି କରିଛି ଯେ ଚୀନ୍ ୨୦୩୫ ସୁଦ୍ଧା ପରମାଣୁ ଅସ୍ତ୍ର ସଂଖ୍ୟାକୁ ୧୫୦୦ କୁ ବୃଦ୍ଧି କରିବାକୁ ଯୋଜନା କରୁଛି। ବର୍ତ୍ତମାନର ରିପୋର୍ଟରେ ମଧ୍ୟ ଏହା ନିଶ୍ଚିତ ହୋଇଛି। ୨୦୩୫ ସୁଦ୍ଧା ଚୀନ୍ ସେନାର ଆଧୁନିକୀକରଣ କାର୍ୟ୍ୟ ସମାପ୍ତ ହେବ। କେତେକ ବିଦେଶୀ ବିଶେଷଜ୍ଞ ବିଶ୍ୱାସ କରନ୍ତି ଯେ ଆଣବିକ ଅସ୍ତ୍ର ସମ୍ବନ୍ଧରେ ଚୀନ୍ ପ୍ରଥମେ ବ୍ୟବହାର ନକରିବା ନୀତି ଛାଡିପାରେ।

ଗଣମାଧ୍ୟମର ରିପୋର୍ଟ ଅନୁଯାୟୀ, ନିକଟରେ ରୁଷ-ୟୁକ୍ରେନ ଯୁଦ୍ଧରେ ରୁଷର ଆକ୍ରୋଶ ସତ୍ତ୍ୱେ ନାଟୋ ଦେଶମାନେ ରୁଷ ବିରୋଧରେ ସିଧାସଳଖ କାର୍ୟ୍ୟାନୁଷ୍ଠାନ ଗ୍ରହଣ କରିନାହାଁନ୍ତି। ଚୀନ୍ ଅନୁଭବ କରୁଛି ଯେ ଏହାର କାରଣ ହେଉଛି ଋଷରେ ପରମାଣୁ ଅସ୍ତ୍ରଶସ୍ତ୍ରର ଏକ ବଡ଼ ଷ୍ଟକ୍ ଅଛି। ଷ୍ଟକହୋମ ଆନ୍ତର୍ଜାତୀୟ ଶାନ୍ତି ଅନୁସନ୍ଧାନ ପ୍ରତିଷ୍ଠାନ ରିପୋର୍ଟ ଅନୁଯାୟୀ ଋଷରେ ବର୍ତ୍ତମାନ ୫୯୭୭ ପରମାଣୁ ଅସ୍ତ୍ର ରହିଛି। ଯେତେବେଳେ କି ଆମେରିକାରେ ୫୪୨୮ ପରମାଣୁ ଅସ୍ତ୍ର ଅଛି ଜ୍ଝ ଚୀନ୍ ୨୦୨୭ ସୁଦ୍ଧା ଆଣବିକ ଅସ୍ତ୍ରକୁ ୫୫୦ ଏବଂ ୨୦୩୫ ରେ ୯୦୦ କୁ ବୃଦ୍ଧି କରିବାକୁ ଯୋଜନା କରୁଛି।

ଚୀନ୍ର ଗୁପ୍ତଚର ବେଲୁନ୍ ଆମେରିକାର ବାୟୁସେନାରେ ପ୍ରବେଶ କରିବା ପରେ ଏବଂ ଆମେରିକା ଏହାକୁ ଟାର୍ଗେଟ କରିବା ପରେ ମଧ୍ୟ ଦୁଇ ଦେଶ ମଧ୍ୟରେ ସମ୍ପର୍କ ଟିକେ ଖରାପ ହୋଇଯାଇଛି। ଏହାପୂର୍ବରୁ ତାଇୱାନରେ ଆମେରିକାର ଲୋକସଭାର ପୂର୍ବତନ ବାଚସ୍ପତି ନାନସୀ ପେଲୋସିଙ୍କ ଗସ୍ତ ଯୋଗୁଁ ଆମେରିକା ଏବଂ ଚୀନ୍ ମଧ୍ୟରେ ସମ୍ପର୍କକୁ ନେଇ ତିକ୍ତତା ଦେଖାଦେଇଥିଲା।