ପାକିସ୍ତାନର ପେଶାୱାରର ଏକ ମସଜିଦରେ ବୋମା ବିସ୍ଫୋରଣ; ୩୦ ମୃତ ୫୦ ରୁ ଅଧିକ ଆହତ

ପାକିସ୍ତାନର ପେଶାୱାରର ଏକ ମସଜିଦରେ ଶୁକ୍ରବାର ଏକ ଶକ୍ତିଶାଳୀ ବୋମା ବିସ୍ଫୋରଣ ହୋଇଛି। ଏହି ବିସ୍ଫୋରଣରେ ଅତି କମରେ ୩୦ ଜଣଙ୍କର ମୃତ୍ୟୁ ଘଟିଥିବା ବେଳେ ୫୦ ରୁ ଅଧିକ ଲୋକ ଆହତ ହୋଇଛନ୍ତି। ତେବେ ମୃତ୍ୟୁ ସଂଖ୍ୟା ଆଗକୁ ଆହୁରି ବଢିପାରେ ବୋଲି ଜଣାପଡିଛି। ଜଣେ ପୋଲିସ ଅଧିକାରୀ କହିଛନ୍ତି ଯେ ପୋଲିସ ପ୍ରଶାସନ ଜରୁରୀକାଳୀନ ପରିସ୍ଥିତିରେ ଅଛି। ଆହତମାନଙ୍କୁ ଡାକ୍ତରଖାନା ନିଆଯାଉଛି। ବୋମା ବିସ୍ଫୋରଣର ପ୍ରକୃତ କାରଣ ଅନୁସନ୍ଧାନ ଚାଲିଛି। ଏହା ଆତ୍ମଘାତୀ ଆକ୍ରମଣ ହୋଇଥିବା କୁହାଯାଉଛି।

ଏକ ନ୍ୟୁଜ୍ ଏଜେନ୍ସିର ସୂଚନା ଅନୁସାରେ, ପେଶୱାରର କିସା ଖୱାନୀ ବଜାର ଅଞ୍ଚଳରେ ଜାମିଆ ମସଜିଦରେ ଏହି ବିସ୍ଫୋରଣ ଘଟିଥିଲା ଯେତେବେଳେ ପୂଜକମାନେ ଶୁକ୍ରବାର ପ୍ରାର୍ଥନା କରୁଥିଲେ। ଏହା ଏକ ଶିଆ ମସଜିଦ ଯାହା ବହୁତ ବ୍ୟସ୍ତବହୁଳ ଅଞ୍ଚଳରେ ଅବସ୍ଥିତ। ଏହି ଘଟଣାରେ ବହୁ ସଂଖ୍ୟକ ଲୋକ ଉପସ୍ଥିତ ଥିଲେ। ଏପର୍ଯ୍ୟନ୍ତ କୌଣସି ସଂସ୍ଥା ଏହି ଆକ୍ରମଣ ପାଇଁ ଦାୟୀ ବୋଲି ଦାବି କରିନାହାଁନ୍ତି।

ପାକିସ୍ତାନର ରିପୋର୍ଟ ଅନୁଯାୟୀ, ଏପର୍ଯ୍ୟନ୍ତ ୩୦ ଟି ମୃତଦେହକୁ ଡାକ୍ତରଖାନାକୁ ଅଣାଯାଇଛି। ଏହି ଆକ୍ରମଣରେ ଆହତ ହୋଇଥିବା ୧୦ ଜଣଙ୍କ ଅବସ୍ଥା ଅତ୍ୟନ୍ତ ଗୁରୁତର ବୋଲି କୁହାଯାଉଛି। ଏହି କାରଣରୁ ଆହତଙ୍କ ସଂଖ୍ୟା ଆହୁରି ବୃଦ୍ଧି ପାଇବ ବୋଲି ଆଶା କରାଯାଉଛି। ଏକ ପିଟିଆଇ ରିପୋର୍ଟ ଅନୁଯାୟୀ ପୋଲିସ ଅଧିକାରୀ ପେଶୱାର ଏଜାଜ ଅହସାନ କହିଛନ୍ତି ଯେ ଦୁଇଜଣ ଆକ୍ରମଣକାରୀ ମସଜିଦ ଭିତରକୁ ପ୍ରବେଶ କରିବାକୁ ଚେଷ୍ଟା କରିଥିଲେ। ଆକ୍ରମଣକାରୀମାନେ ଘଟଣାସ୍ଥଳରେ ଡ୍ୟୁଟିରେ ଥିବା ପୋଲିସ କର୍ମଚାରୀଙ୍କ ଉପରକୁ ମଧ୍ୟ ଗୁଳି ଚଳାଇଥିଲେ। ଏହି ଆକ୍ରମଣରେ ଜଣେ ପୋଲିସ କର୍ମଚାରୀଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି। ଗୁଳି ବିନିମୟ ପରେ ବୋମା ବିସ୍ଫୋରଣ ହୋଇଥିଲା।  ଆଫଗାନିସ୍ତାନରେ ତାଲିବାନ ଆସିବା ପରେ ପାକିସ୍ତାନରେ ଆତଙ୍କବାଦୀ ଆକ୍ରମଣ ବୃଦ୍ଧି ପାଇଛି।