ପ୍ରସ୍ତୁତ ହେଉଥିଲା ଅପମିଶ୍ରିତ ମସଲା, ମାଲିକକୁ ଅଟକ ରଖିଲା ପୋଲିସ

ଓଡ଼ିଆ ନ୍ୟୁଜ୍(ବ୍ୟୁରୋ): ପ୍ରସ୍ତୁତ ହେଉଥିଲା ଅପମିଶ୍ରିତ ମସଲା । ମାଲଗୋଡାଉନ ଅଞ୍ଚଳରେ ଅପମିଶ୍ରିତ ମସଲା ୟୁନିଟ୍ ଠାବ କରିଛି କମିଶନରେଟ୍ ପୋଲିସ। କଟକ ମହାନଗର ନିଗମ (ସିଏମସି) ଓ ସ୍ବାସ୍ଥ୍ୟ ଅଧିକାରୀଙ୍କ ଏକ ସ୍କ୍ୱାର୍ଡର ମିଳିତ ଟିମ୍ ଚଢାଉ କରିବାପରେ ଅପମିଶ୍ରିତ ମସଲା ୟୁନିଟର ମାଲିକଙ୍କୁ ଅଟକ ରଖାଯାଇଛି। ଏହି ୟୁନିଟରେ ଚାଉଳ ଗୁଣ୍ଡ ଓ ରଙ୍ଗ ମିଶାଇ ଅପମିଶ୍ରିତ ଲାଲ୍ ଲଙ୍କା ଗୁଣ୍ଡ, ହଳଦୀ ଓ ଅନ୍ୟାନ୍ୟ ମସଲା ପ୍ରସ୍ତୁତ କରାଯାଉଥିଲା। ୟୁନିଟ୍ ମାଲିକ ପ୍ରାୟ 300 ଗ୍ରାମ୍ ଚାଉଳ ଗୁଣ୍ଡ ମସଲାରେ ମିଶାଇ ଦେଉଥିଲେ। ଖାଦ୍ୟ ସାମଗ୍ରୀରେ ଏଭଳି ଅପମିଶ୍ରଣ ସ୍ବାସ୍ଥ୍ୟ ପ୍ରତି ବିପଦ ସୃଷ୍ଟି କରିପାରେ ବୋଲି ସିଏମସି ସ୍ୱାସ୍ଥ୍ୟ ଅଧିକାରୀ କହିଛନ୍ତି। ଖାଦ୍ୟରେ ରଙ୍ଗ ବ୍ୟବହାର କରିବା ଦ୍ୱାରା ଲିଭର ଖରାପ ହେବା ସହ ଅନ୍ୟାନ୍ୟ ସ୍ବାସ୍ଥ୍ୟ ସମସ୍ୟା ଦେଖାଦେଇଥାଏ।

ଅପମିଶ୍ରିତ ମସଲାର ଅନେକ ନମୁନା ସଂଗ୍ରହ କରାଯାଇ ଲ୍ୟାବ୍ ପରୀକ୍ଷା ପାଇଁ ପଠାଯିବ। ମସଲାରେ ଚାଉଳ ଗୁଣ୍ଡ ଓ ରଙ୍ଗ ମିଶାଯାଉଥିବା କଥା ୟୁନିଟ୍ ମାଲିକ ସ୍ୱୀକାର କରିଛନ୍ତି। କିଛି ଟଙ୍କା ରୋଜଗାର କରିବା ପାଇଁ ସେ ଏପରି କରିଥିବା କହିଛନ୍ତି। ସେ କହିଛନ୍ତି ଯେ କିଛି ବ୍ୟବସାୟୀ ଆସି ତାଙ୍କ ଠାରୁ ଅପମିଶ୍ରିତ ମସଲା କିଣୁଥିଲେ।