ଆପଣ ଆୟକର ରିଟର୍ଣ୍ଣ ଦାଖଲ କରିନାହାନ୍ତି କି? ଆଜି ଶେଷ ତାରିଖ

ଓଡ଼ିଆ ନ୍ୟୁଜ୍ (ବ୍ୟୁରୋ): ୨୦୨୧-୨୨ ଆର୍ଥିକ ବର୍ଷ ପାଇଁ ଆୟକର ରିଟର୍ଣ୍ଣ ଦାଖଲ କରିବାର ଆଜି ହେଉଛି ଶେଷ ଦିନ । ଏକ ଦିନ ପୂର୍ବରୁ ପାଞ୍ଚ କୋଟିରୁ ଅଧିକ ରିଟର୍ଣ୍ଣ ଦାଖଲ କରାଯାଇଥିଲା। ଶନିବାର ଏହାର ଅଫିସିଆଲ୍ ଟ୍ୱିଟର ହ୍ୟାଣ୍ଡେଲରେ ଏହି ସୂଚନା ପ୍ରଦାନ କରି ଆୟକର ବିଭାଗ ଟିକସଦାତାଙ୍କୁ ୩୧ ଜୁଲାଇ ସୁଦ୍ଧା ଧାର୍ୟ୍ୟ ତାରିଖ ସୁଦ୍ଧା ଆୟକର ରିଟର୍ଣ୍ଣ ଦାଖଲ କରିବାକୁ ଅନୁରୋଧ କରିଛି। ବିଳମ୍ବ ଶୁଳ୍କକୁ ଏଡାଇବା ପାଇଁ ନିର୍ଦ୍ଧାରିତ ସମୟ ସୁଦ୍ଧା ରିଟର୍ଣ୍ଣ ଦାଖଲ କରିବାକୁ ବିଭାଗ କହିଛି।

ବିଭାଗ କହିଛି ଯେ ମୂଲ୍ୟାଙ୍କନ ବର୍ଷ ୨୦୨୨-୨୩ ରୁ ଶନିବାର ରାତି ୮.୩୬ ପର୍ୟ୍ୟନ୍ତ ପାଞ୍ଚ କୋଟିରୁ ଅଧିକ ରିଟର୍ଣ୍ଣ ଦାଖଲ କରାଯାଇଛି। ଏହାପୂର୍ବରୁ ଜୁଲାଇ ୨୯ ପର୍ୟ୍ୟନ୍ତ ୪.୫୨ କୋଟି ଆଇଟିଆର ଦାଖଲ କରାଯାଇଥିଲା।

ଆଜି ସମସ୍ତ ଆୟକର ସେବା କେନ୍ଦ୍ର ଖୋଲା ରହିବ
ଏହା ସହିତ ଆୟକର ବିଭାଗର ନିୟାମକ ସଂସ୍ଥା କେନ୍ଦ୍ରୀୟ ବୋର୍ଡ ଅଫ୍ ଡାଇରେକ୍ଟ ଟ୍ୟାକ୍ସ (ସିବିଡିଟି) ଜୁଲାଇ ୩୧ ରବିବାର ହୋଇଥିଲେ ମଧ୍ୟ ସାରା ଦେଶରେ ସମସ୍ତ ଆୟକର ସେବା କେନ୍ଦ୍ରକୁ ଖୋଲା ରଖିବାକୁ ନିର୍ଦ୍ଦେଶ ଦେଇଛି। ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଇ-ଫାଇଲ୍ ପୋର୍ଟାଲ ସହ ଜଡିତ ସମସ୍ୟାର ତୁରନ୍ତ ସମାଧାନ କରାଯାଉଛି ଏବଂ ଟିକସଦାତାଙ୍କଠାରୁ ଆସୁଥିବା ସମସ୍ତ ସନ୍ଦେହ ଏବଂ ପ୍ରଶ୍ନର ଉତ୍ତର ଦିଆଯାଉଛି।

ଏପର୍ୟ୍ୟନ୍ତ ୫ କୋଟି ରିଟର୍ଣ୍ଣ
ଆୟକର ରିଟର୍ଣ୍ଣ ଦାଖଲ କରିବାର ସମୟସୀମା ବୃଦ୍ଧି ପାଇଁ ସୋସିଆଲ ମିଡିଆ ପ୍ଲାଟଫର୍ମରେ ଚାହିଦା ସମ୍ପର୍କରେ ପଚରାଯାଇଥିବା ଅଧିକାରୀ କହିଛନ୍ତି ଯେ ବର୍ତ୍ତମାନ ବିଭାଗ ଏହା ବିଷୟରେ ଚିନ୍ତା କରୁନାହିଁ। ୨୦୨୦-୨୧ ଆର୍ଥିକ ବର୍ଷ ପାଇଁ ରିଟର୍ଣ୍ଣ ଦାଖଲ କରିବାର ଶେଷ ତାରିଖ ୩୧ ଡିସେମ୍ବର ୨୦୨୧ ପର୍ୟ୍ୟନ୍ତ ବୃଦ୍ଧି କରାଯାଇଥିଲା। ଏହି ସମୟ ମଧ୍ୟରେ ମୋଟ ୫.୮୯ କୋଟି ରିଟର୍ଣ୍ଣ ଦାଖଲ କରାଯାଇଥିଲା।