ସ୍ପାନିସ୍ ହକି ଶତବାର୍ଷିକୀ ପ୍ରତିଯୋଗିତା: ଭାରତୀୟ ଦଳରେ ୨ ଓଡ଼ିଆ
ଓଡ଼ିଆ ନ୍ୟୁଜ୍ (ବ୍ୟୁରୋ): ସ୍ପାନିସ୍ ହକି ଶତବାର୍ଷିକୀ ପ୍ରତିଯୋଗିତାରେ ଭାରତୀୟ ଦଳରେ ୨ ଓଡ଼ିଆ। ଶୁକ୍ରବାର ୨୪ ଜଣିଆ ଭାରତୀୟ ହକି ଦଳ ଘୋଷିତ ହୋଇଛି। ଏହି ଦଳରେ ମାତ୍ର ୨ ଜଣ ଓଡ଼ିଆ ଖେଳାଳି ଅମିତ ରୋହିଦାସ ଏବଂ ନୀଲମ ସଂଜୀପ ଖେସ ସ୍ଥାନ ପାଇଛନ୍ତି। ଜୁଲାଇ ୨୫ରୁ ୩୦ ତାରିଖ ପର୍ଯ୍ୟନ୍ତ ଏହି ପ୍ରତିଯୋଗିତା ଅନୁଷ୍ଠିତ ହେବ। ଚତୁଃରାଷ୍ଟ୍ରୀୟ ଏହି ପ୍ରତିଯୋଗିତାରେ ଭାରତ ସହିତ ଇଂଲଣ୍ଡ, ନେଦରଲାଣ୍ଡ୍ସ ଏବଂ ଆୟୋଜକ ସ୍ପେନ୍ ଅଂଶଗ୍ରହଣ କରିବେ। ଚଳିତ ବର୍ଷର ଏସିଆନ୍ ଚାମ୍ପିଅନ୍ସ ଟ୍ରଫି ଏବଂ ହାଙ୍ଗଝୌ ଏସୀୟ କ୍ରୀଡ଼ା ପୂର୍ବରୁ ଭାରତୀୟ ଦଳ ପାଇଁ ଏହା ଭଲ ପ୍ରସ୍ତୁତି ହେବ। ଅଗ୍ରଣୀ ଡ୍ରାଗ୍ ଫ୍ଲିକର ତଥା ଡିଫେଣ୍ଡର୍ ହର୍ମନପ୍ରୀତ୍ ସିଂହଙ୍କୁ ଅଧିନାୟକ ଭାର ଅର୍ପଣ କରାଯାଇଥିବା ବେଳେ ମିଡଫିଲ୍ଡର ହାର୍ଦିକ ସିଂହ ଉପ ଅଧିନାୟକ ନିଯୁକ୍ତ ହୋଇଛନ୍ତି। ଦଳ ଚୟନ ସମ୍ପର୍କରେ ଭାରତୀୟ ଦଳ ମୁଖ୍ୟ ପ୍ରଶିକ୍ଷକ କ୍ରେଗ୍ ଫୁଲଟନ୍ କହିଛନ୍ତି ‘ଆମେ ଅତ୍ୟନ୍ତ ଯତ୍ନର ସହ ଏକ ଯୁବ ଓ ସନ୍ତୁଳିତ ଦଳ ଗଠନ କରିଛୁ।
ସର୍ବୋଚ୍ଚ ସ୍ତରରେ ଲଢ଼ିବାକୁ ଏକ ମିଳିତ ପ୍ରୟାସ କରିଛୁ। ଶୀର୍ଷ ଦଳ ଗୁଡିକ ବିପକ୍ଷରେ ଆମ କୌଶଳ, ଦକ୍ଷତାକୁ ଶାଣିତ କରିବାକୁ ସୁଯୋଗ ମିଳିବ। ଏସିଆନ ଚାମ୍ପିଅନ୍ସ ଟ୍ରଫି ଏବଂ ଏସୀୟ ଗେମ୍ସ ପ୍ରସ୍ତୁତି ଦିଗରେ ଏହି ପ୍ରତିଯୋଗିତା ପ୍ରମୁଖ ଭୂମିକା ନେବ। ଆଗକୁ ଆସୁଥିବା ପ୍ରତିଯୋଗିତା ଲାଗି ଆମ ପ୍ରଦର୍ଶନ ବଢ଼ାଇବାରେ ଏହା ସହାୟକ ହେବ’। ଭାରତୀୟ ପୁରୁଷ ହକି ଦଳ: ଗୋଲକିପର୍-ଶ୍ରୀଜେଶ ପରାଟୁ ରବୀନ୍ଦ୍ରନ, କ୍ରିଷନ୍ ବାହାଦୂର ପାଠକ। ଡିଫେଣ୍ଡର୍ସ-ଜର୍ମାନପ୍ରୀତ୍ ସିଂହ, ନୀଲମ ସଂଜୀପ ଖେସ, ମନପ୍ରୀତ୍ ସିଂହ, ଅମିତ ରୋହିଦାସ, ହର୍ମନପ୍ରୀତ୍ ସିଂହ (ଅଧିନାୟକ), ବରୁଣ କୁମାର, ସଂଜୟ। ମିଡଫିଲ୍ଡର୍ସ-ହାର୍ଦିକ ସିଂହ (ଉପ ଅଧିନାୟକ), ବିବେକ ସାଗର ପ୍ରସାଦ, ସୁମିତ, ନିଳକଣ୍ଠ ଶର୍ମା, ସମସେର୍ ସିଂହ, ରାଜକୁମାର ପାଲ୍। ଫରୱାର୍ଡସ-ଲଳିତ କୁମାର ଉପାଧ୍ୟାୟ, ମନଦୀପ ସିଂହ, ଗୁରଜାଣ୍ଟ ସିଂହ, ସୁଖଜିତ ସିଂହ, ଅଭିଷେକ, ପୱନ, ଦିଲପ୍ରୀତ୍ ସିଂହ, ସିମ୍ରନଜିତ୍ ସିଂହ, କର୍ତି ସେଲଭମ୍।