କ୍ଲାଉଡିଆଙ୍କୁ ଅର୍ଥନୀତିରେ ନୋବେଲ ପୁରସ୍କାର

ଓଡ଼ିଆ ନ୍ୟୁଜ, ନୂଆଦିଲ୍ଲୀ  : ଆମେରିକୀୟ ଅର୍ଥନୀତିଜ୍ଞ କ୍ଲାଉଡିଆ ଗୋଲ୍ଡିନଙ୍କୁ ଅର୍ଥନୀତି ବିଜ୍ଞାନରେ ୨୦୨୩ର ନୋବେଲ ପୁରସ୍କାର ମିଳିବ। ରୟାଲ୍ ସ୍ୱିଡିଶ୍ ଏକାଡେମୀ ଅଫ୍ ସାଇନ୍ସେସ୍ କ୍ଲାଉଡିଆ ଗୋଲ୍ଡିନଙ୍କୁ ଅଲଫ୍ରେଡ୍ ନୋବେଲଙ୍କ ସ୍ମୃତିରେ ଅର୍ଥନୀତି ବିଜ୍ଞାନରେ ପୁରସ୍କାର ପ୍ରଦାନ କରିବାକୁ ନିଷ୍ପତ୍ତି ନେଇଛି। ମହିଳା ଶ୍ରମ ବଜାରର ପରିଣାମ ବିଷୟରେ ଆମ ଜ୍ଞାନକୁ ବିକଶିତ କରିବା ପାଇଁ ତାଙ୍କୁ ଏହି ପୁରସ୍କାର ପ୍ରଦାନ କରାଯିବ।

ଗତ କିଛି ଦଶନ୍ଧି ଧରି ମହିଳାଙ୍କ ରୋଜଗାର ଏବଂ ଶ୍ରମ ବଜାରରେ ସେମାନଙ୍କ ଭାଗିଦାରୀ ନେଇ ବ୍ୟାପକ ବିବରଣୀ ପ୍ରଦାନ କରିଛନ୍ତି କ୍ଲାଉଡିଆ। ତାଙ୍କ ଗବେଷଣା ଦ୍ୱାରା ପରିବର୍ତ୍ତନର କାରଣ ଏବଂ ଲିଙ୍ଗଗତ ଅନ୍ତରରେ ଆୟର ମୁଖ୍ୟ ସ୍ରୋତ ଜଣାପଡ଼ିଛି। ବିଶ୍ୱ ଶ୍ରମ ବଜାରରେ ମହିଳାଙ୍କ ପ୍ରତିନିଧିତ୍ୱ କମ୍ ରହିଛି। ସେମାନେ କାମ କଲେ ମଧ୍ୟ ପୁରୁଷଙ୍କ ତୁଳନାରେ କମ ରୋଜଗାର କରିଥାନ୍ତି ବୋଲି କ୍ଲାଉଡିଆଙ୍କ ଗବେଷଣାରୁ ସ୍ପଷ୍ଟ ହୋଇଛି। ରିପୋର୍ଟ ମୁତାବକ, କ୍ଲାଉଡିଆ ଗୋଲ୍ଡିନ ଏହି ପୁରସ୍କାର ଜିତିବାରେ ତୃତୀୟ ମହିଳା ହୋଇଛନ୍ତି।

ଏହା ପୂର୍ବରୁ ସମ୍ମାନିତ ହୋଇଥିବା ୯୨ ପୁରସ୍କାର ବିଜେତାଙ୍କ ମଧ୍ୟରୁ କେବଳ ଦୁଇଜଣ ମହିଳାଙ୍କୁ ହିଁ ଏହି ପୁରସ୍କାର ପ୍ରଦାନ କରାଯାଇଥିଲା। କ୍ଲାଉଡିଆ ଗୋଲ୍ଡିନ ହାର୍ଭାର୍ଡ ବିଶ୍ୱବିଦ୍ୟାଳୟରେ ଅର୍ଥନୀତିର ପ୍ରଫେସର ଅଛନ୍ତି।