ଭାସିଗଲା କ୍ୱିଣ୍ଟାଲ୍ କ୍ୱିଣ୍ଟାଲ୍ ପୋଚ, ବୋହିଗଲା ମହୁଲି ମଦ

ଓଡ଼ିଆ ନ୍ୟୁଜ,(ବ୍ୟୁରୋ): ଶଙ୍ଖଝର ଓ ହାୟାରପୁର ଅଞ୍ଚଳରେ ଅବକାରୀ ଚଢାଉ | ବିପୁଳ ପୋଚ ଓ ମଦ ଜବତ ସହ ଜଣେ ଗିରଫ | ଦେଖନ୍ତୁ ମହୁଲି ମଦର ସୁଅ, ତା ସହ ପୋଚର ଗନ୍ଥାଘର। ଯାହାକୁ ନଷ୍ଟ କରୁଛି ଅବକାରୀ ବିଭାଗ।

କେନ୍ଦୁଝର ଅବକାରୀ ଅଧିକ୍ଷକଙ୍କ ନିର୍ଦ୍ଦେଶ କ୍ରମେ ଆଜି ବଡ଼ବିଲ ଓ ଚମ୍ପୁଆ ଅବକାରୀ ବିଭାଗ ପକ୍ଷରୁ ବନ ବିଭାଗ ସହାୟତାରେ ବଡବିଲ ଥାନା ଅନ୍ତର୍ଗତ ଶଙ୍ଖଝର ଓ ହାୟାରପୁର ଅଞ୍ଚଳରେ ମିଳିତ ଚଢ଼ାଉ କରି ପ୍ରାୟ ୭୬୦୦ କେଜି ପୋଚ ନଷ୍ଟ କରିବା ସହ ୪୪୮ ଲିଟର ଚୋରା ମଦ ଜବତ କରିଛି। ଏହା ସହିତ ଜଣେ ଅଭିଯୁକ୍ତଙ୍କୁ ଗିରଫ କରିଛି।

ଜଙ୍ଗଲ ମଧ୍ୟରେ ଚାଲିଥିବା ବେଆଇନ୍ ମଦଭାଟି ସମ୍ପର୍କରେ ସୂଚନା ପାଇ ଅବକାରୀ ବିଭାଗ ପକ୍ଷରୁ ବଡବିଲ ବନ ବିଭାଗ ସହାୟତାରେ ସେଠାରେ ଅତର୍କିତ ଚଢ଼ାଉ କରା ଯାଇଥଲା। ଏହି ଚଢ଼ାଉରେ ବଡବିଲ ଅବକାରୀ OIC ଜନାର୍ଦ୍ଦନ ପଲେଇ, ଚମ୍ପୁଆ ଅବକାରୀ OIC ବିନୋଦ ବାସ୍କେ ଓ ସମସ୍ତ ଅବକାରୀ କର୍ମଚାରୀ ସକ୍ରିୟ ଭାବେ ରହିଥିବା ବେଳେ ବଡବିଲ ବନ ବିଭାଗ କର୍ମଚାରୀ ତାଙ୍କୁ ପୂର୍ଣ୍ଣ ସହଯୋଗ କରିଥିଲେ।