ଚଳନ୍ତା କାର୍ ଉପରକୁ ଗୁଳି ଚଳାଇ ଟଙ୍କା ଲୁଟ୍; ୬ ଗିରଫ

ଓଡ଼ିଆ ନ୍ୟୁଜ,(ବ୍ୟୁରୋ): ଚଳନ୍ତା କାର୍ ଉପରକୁ ଗୁଳି ଚଳାଇ ଟଙ୍କା ଲୁଟ୍ ଘଟଣାରେ ୬ ଜଣଙ୍କୁ ଗିରଫ କଲା କେନ୍ଦୁଝର ଜିଲ୍ଲା ତୁରୁମୁଙ୍ଗା ପୋଲିସ ।

ସେମାନଙ୍କ ନିକଟରୁ ୨ଟି ବନ୍ଧୁକ, ୮ଟି ଜୀବନ୍ତ ଗୁଳି, ଗୋଟିଏ ୪ ଚକିଆ କ୍ୟାମ୍ପର୍ ଗାଡ଼ି ସହ, ୩ଟି ବାଇକ୍ ଜବତ କରିଛି ପୋଲିସ । ଗିରଫ ଅଭିଯୁକ୍ତଙ୍କ ମଧ୍ୟରୁ ୨ ଜଣ ମୟୁରଭଞ୍ଜ ଜିଲ୍ଲାର ହୋଇଥିବା ବେଳେ, ୨ ଜଣ କେନ୍ଦୁଝର ଜିଲ୍ଲା ଟାଉନ୍ ଥାନା ଓ ଅନ୍ୟ ୨ ଜଣ କେନ୍ଦୁଝର ଜିଲ୍ଲା ସଦର ଥାନା ଅଞ୍ଚଳର ବୋଲି ଜଣା ପଡିଛି । ତୁରୁମୁଙ୍ଗା ରେ ଏ ସମ୍ପର୍କରେ ଏକ ପ୍ରେସମିଟ୍ କରି ସୂଚନା ଦେଇଛନ୍ତି ଚମ୍ପୁଆ SDPO |

ଗତ ୧୮ ତାରିଖ ରାତିରେ ଖିରେଇଟାଙ୍ଗିରି ଟୋଲଗେଟ୍ ନିକଟରେ ମୟୁରଭଞ୍ଜ ବାଦାମପାହାଡ଼ ଅଞ୍ଚଳର S.K. ଅହମଦ ହୁସେନ୍ ଡ୍ରାଇଭର୍ ସହ ଏକ କାର୍ ରେ ଆସୁଥିବା ବେଳେ, ୬ ରୁ ୭ ଜଣ ଦୁର୍ବୃତ୍ତ ଏକ କ୍ୟାମ୍ପର୍ ଗାଡ଼ି ଓ ପଲସର୍ ବାଇକ୍ ରେ ପିଛା କରି ପିସ୍ତଲରୁ ୧ ରାଉଣ୍ଡ ଗୁଳି ଚଳାଇ ତାଙ୍କଠାରୁ ୧୫ ହଜାର ଟଙ୍କା ଲୁଟ୍ କରି ଫେରାର୍ ହୋଇଯାଇଥିଲେ । ଲିଖିତ ଅଭିଯୋଗ ପାଇବା ପରେ ତଦନ୍ତ ଆରମ୍ଭ କରିଥିଲା ପୋଲିସ ।