ପଶ୍ଚିମବଙ୍ଗ ବୀରଭୂମ ଗଣହତ୍ୟା ମାମଲା;’ସିବିଆଇ’ ତଦନ୍ତ ପାଇଁ ଆଦେଶ ଦେଲେ ହାଇକୋର୍ଟ
କଲିକତା ହାଇକୋର୍ଟ ଶୁକ୍ରବାର ଦିନ ବୀରଭୂମ ହିଂସା ଉପରେ ସିବିଆଇ ତଦନ୍ତ ନିର୍ଦ୍ଦେଶ ଦେଇଛନ୍ତି। ମମତା ବାନାର୍ଜୀ ସରକାରଙ୍କ ଅନୁରୋଧକୁ କେନ୍ଦ୍ରୀୟ ଏଜେନ୍ସିକୁ ହସ୍ତାନ୍ତର ନକରିବାର ଅନୁରୋଧକୁ ପ୍ରତ୍ୟାଖ୍ୟାନ କରି କଲିକତା ହାଇକୋର୍ଟ ଏହି ମାମଲାକୁ ସିବିଆଇକୁ ହସ୍ତାନ୍ତର କରିବାକୁ ନିର୍ଦ୍ଦେଶ ଦେଇଛନ୍ତି। ଅଦାଲତ କହିଛନ୍ତି ଯେ ପରିସ୍ଥିତିର ପ୍ରମାଣ ଏବଂ ଘଟଣାର ପ୍ରଭାବ ସୂଚାଇ ଦେଉଛି ଯେ ରାଜ୍ୟ ପୋଲିସ ଏହି ଘଟଣାର ଅନୁସନ୍ଧାନ କରିପାରିବ ନାହିଁ। ଏଭଳି ପରିସ୍ଥିତିରେ କଲିକତା ହାଇକୋର୍ଟ ଏହାର ତଦନ୍ତ ବନ୍ଦ କରିବାକୁ ରାଜ୍ୟ ସରକାରଙ୍କ ଦ୍ୱାରା ସ୍ଥାପିତ ଏସଆଇଟିକୁ ନିର୍ଦ୍ଦେଶ ଦେଇଛନ୍ତି। ଏବେ ରାଜ୍ୟ ପୋଲିସର ଏସଆଇଟି ମାମଲା ସିବିଆଇକୁ ହସ୍ତାନ୍ତର କରିବ। ସିବିଆଇ ତଦନ୍ତ ଉପରେ ହାଇକୋର୍ଟ ତଦାରଖ କରିବେ। ଏପ୍ରିଲ ୭ ସୁଦ୍ଧା ରିପୋର୍ଟ ଦାଖଲ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି।
ପ୍ରଧାନ ବିଚାରପତି ପ୍ରକାଶ ଶ୍ରୀବାସ୍ତବ ଏବଂ ଜଷ୍ଟିସ୍ ଆର.ଭରଦ୍ୱାଜଙ୍କ ଡିଭିଜନ୍ ବେଞ୍ଚ କହିଛି ଯେ ନ୍ୟାୟକୁ ଦୃଷ୍ଟିରେ ରଖି ସିବିଆଇ ତଦନ୍ତ ପାଇଁ ନିର୍ଦ୍ଦେଶ ଦିଆଯାଉଛି। ଏହି ଘଟଣାରେ ସିବିଆଇ କିମ୍ବା ନ୍ୟାସନାଲ ଇନଭେଷ୍ଟିଗେସନ୍ ଏଜେନ୍ସି (ଏନଆଇଏ) ଙ୍କ ଦ୍ଵାରା ଯାଞ୍ଚ ପାଇଁ PIL ଗୁଡ଼ିକର ମଧ୍ୟ କୋର୍ଟ ଶୁଣାଣି କରିଛନ୍ତି।
ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ବାନାର୍ଜୀ କହିଛନ୍ତି, ଆତ୍ମସମର୍ପଣ ନ କଲେ ସନ୍ଦିଗ୍ଧମାନଙ୍କୁ ଖୋଜି ଖୋଜି ବାହାର କରାଯିବ। ଏହି ବୀଭତ୍ସ ହତ୍ୟାକାଣ୍ଡ ପାଇଁ ରାଜନୈତିକ ମହଲ ସମାଲୋଚନା କରୁଥିବା ବେଳେ ପଶ୍ଚିମବଙ୍ଗ ସରକାର ରାଜନୈତିକ ହିଂସାକାଣ୍ଡକୁ ଉପେକ୍ଷା କରୁଛନ୍ତି ବୋଲି ବିରୋଧୀ ଦଳ ‘ବିଜପେି’ ଦୋଷାରୋପ କରିଛି।