ଧାନ ସଂଗ୍ରହ ପୂର୍ବରୁ ମିଲରେ ଗଦା ଗଦା ଧାନ

ଓଡ଼ିଆ ନ୍ୟୁଜ୍: ଖରିଫ ଧାନ ସଂଗ୍ରହ କାର୍ଯ୍ୟକୁ ଆଉ ମାତ୍ର ୨ ସପ୍ତାହ ବାକି ରହିଥିବାବେଳେ ଝାଡ଼ଖଣ୍ଡ ଏବଂ ପଶ୍ଚିମବଙ୍ଗର ନିକଟବର୍ତ୍ତୀ ଜିଲାଗୁଡ଼ିକରୁ ଯାଜପୁର ଜିଲାକୁ ବେଆଇନ ଭାବେ ଧାନ ଆସୁଛି। କାରଣ ନିକଟବର୍ତ୍ତୀ ରାଜ୍ୟଗୁଡ଼ିକ ତୁଳନାରେ ଓଡ଼ିଶା ଧାନର ସର୍ବନିମ୍ନ ସହାୟକ ମୂଲ୍ୟ ଅଧିକ। ତେଣୁ ଝାଡ଼ଖଣ୍ଡ ଓ ପଶ୍ଚିମବଙ୍ଗ ସୀମାନ୍ତ ପଏଣ୍ଟଗୁଡ଼ିକରୁ କେନ୍ଦୁଝର, ମୟୂରଭଞ୍ଜ, ଭଦ୍ରକ ଓ ବାଲେଶ୍ୱର ଜିଲା ଦେଇ ଯାଜପୁରକୁ ସଂଯୋଗକାରୀ ରାସ୍ତାରେ ବେଆଇନ ଧାନ ଆସୁଥିବା ସୂଚନା ମିଳିଛି।

ରାଜ୍ୟ ସରକାରଙ୍କ ପକ୍ଷରୁ ଓଡ଼ିଶା-ଝାଡ଼ଖଣ୍ଡ ଏବଂ ପଶ୍ଚିମବଙ୍ଗ ସୀମାର ପଲାସମୁଣ୍ଡଳି, ତୁକପଳାସିଆ, ଧୁମସାହି, ସରକଣା, ଦେଉଳି, ଚାନ୍ଦୁଆ, ଯଦୁନାଥପୁର, ତିରିଙ୍ଗ, ନନ୍ଦବସା, ଭାଲୁପାଣି ପ୍ରଭୃତି ସ୍ଥାନରେ ବେଆଇନ ଧାନ ପରିବହନ ନିୟନ୍ତ୍ରଣ ପାଇଁ ପୂର୍ବରୁ ସିସିଟିଭି କ୍ୟାମେରା ସ୍ଥାପନ କରାଯାଇଛି। ତଥାପି ଏହି ବେଆଇନ କାର୍ଯ୍ୟ ନିୟନ୍ତ୍ରଣ ହୋଇପାରୁ ନଥିବା ଅଭିଯୋଗ ହୋଇଛି।