ତ୍ରିପୁରା ଡିଜିପିଙ୍କ ସନ୍ଦେହଜନକ ମୃତ୍ୟୁ

ଓଡ଼ିଆ ନ୍ୟୁଜ୍: ତ୍ରିପୁରା ଡିଜିପିଙ୍କ ସନ୍ଦେହଜନକ ମୃତ୍ୟୁ। ରାଜଧାନୀ ଅଗରତାଲାରେ ତ୍ରିପୁରା ଡିଜିପି ଅନୁରାଗ ଧନଖରଙ୍କ (Anurag Dhankar)ସନ୍ଦେହଜନକ ପରିସ୍ଥିତିରେ ମୃତ୍ୟୁ ଘଟିଛି। ପ୍ରାଥମିକ ସୂଚନା ଅନୁଯାୟୀ, ସୋମବାର ଦିନ ଆଗରତାଲାସ୍ଥିତ ପୋଲିସ୍ ମୁଖ୍ୟାଳୟରେ ତାଙ୍କ ମୃତଦେହ ମିଳିଥିଲା। ଏହି ଘଟଣା ସମଗ୍ର ପୋଲିସ ବିଭାଗ ଓ ରାଜ୍ୟ ସରକାରଙ୍କ ମଧ୍ୟରେ ଚହଳ ସୃଷ୍ଟି କରିଛି। ଡିଜିପି ଅନୁରାଗ ଧନକରଙ୍କୁ ତୁରନ୍ତ ଆଗରତାଲାର ଗୋବିନ୍ଦ ବଲ୍ଲଭ ପନ୍ତ (ଜିବିପି) ହସ୍ପିଟାଲକୁ ନିଆଯାଇଥିଲା । ସେଠାରେ ଡାକ୍ତରମାନେ ତାଙ୍କର ଯାଞ୍ଚ କରିବା ପରେ ତାଙ୍କୁ ମୃତ ଘୋଷଣା କରିଥିଲେ। ତାଙ୍କର ଏହି ହଠାତ୍ ମୃତ୍ୟୁ ଅନେକ ପ୍ରଶ୍ନ ସୃଷ୍ଟି କରିଛି। ମୃତ୍ୟୁର ପ୍ରକୃତ କାରଣ ଜାଣିବା ପାଇଁ ଅଧିକାରୀମାନେ ପୋଷ୍ଟ-ମର୍ଟମ ରିପୋର୍ଟକୁ ଅପେକ୍ଷା କରିଛନ୍ତି।

ଖବର ଜଣା ପଡିବା ପରେ ମୁଖ୍ୟମନ୍ତ୍ରୀ ମାଣିକ ସାହା, ମୁଖ୍ୟ ସଚିବ ଜେକେ ସିହ୍ନା ଓ ଅନ୍ୟ ବରିଷ୍ଠ ଅଧିକାରୀ ହସ୍ପିଟାଲରେ ପହଞ୍ଚିଛନ୍ତି । ଗଣମାଧ୍ୟମ ରିପୋର୍ଟ ମୁତାବକ ସେ ନିଜେ ଜୀବନ ହାରିଥିବା ଅନୁମାନ କରାଯାଉଛି । କିନ୍ତୁ ମୃତ୍ୟୁର ପ୍ରକୃତ କାରଣ ଜଣାପଡିନାହିଁ । ଧନଖଡ ୧୯୯୪ ବ୍ୟାଚ ତ୍ରିପୁରା କ୍ୟାଡରର ଆଇପିଏସ ଅଟନ୍ତି । ଘଟଣାର ତଦନ୍ତ ଚାଲିଛି । ତ୍ରିପୁରା ସରକାରଙ୍କ ଦ୍ୱାରା ନିଯୁକ୍ତ ହେବା ପରେ, ସେ ମେ’ ୨୦୨୫ରେ ପୋଲିସ୍ ମହାନିର୍ଦ୍ଦେଶକ (ପୋଲିସ୍ ବାହିନୀର ମୁଖ୍ୟ) ଭାବରେ ଦାୟିତ୍ୱ ଗ୍ରହଣ କରିଥିଲେ। ରାଜ୍ୟର ସର୍ବୋଚ୍ଚ ପୋଲିସ୍ ଅଧିକାରୀ ଭାବରେ, ଆଇନ-ଶୃଙ୍ଖଳା ରକ୍ଷା ଏବଂ ପୋଲିସ୍ ବାହିନୀର କାର୍ଯ୍ୟକଳାପ ଉପରେ ନଜର ରଖିବା ତାଙ୍କ ଦାୟିତ୍ୱ ଥିଲା।