ପୁଣି ଜମ୍ମୁ କାଶ୍ମୀରର କୁଲଗାମରେ ଟାର୍ଗେଟ କିଲିଂ; ବ୍ୟାଙ୍କ ମ୍ୟାନେଜରଙ୍କୁ ଗୁଳି କରି ହତ୍ୟା କଲେ ଆତଙ୍କବାଦୀ
ଆତଙ୍କବାଦୀମାନେ ପୁଣି ଥରେ ଜାମ୍ମୁ କାଶ୍ମୀରର କୁଲଗାମରେ ଏକ ବର୍ବରତାର ସୀମା ପାର କରିଛନ୍ତି। ଘାଟିରେ ସୁରକ୍ଷା ବାହିନୀ ଦ୍ୱାରା କରାଯାଇଥିବା ଅପରେସନରେ ରାଗିଯାଇ ଆତଙ୍କବାଦୀମାନେ ଜଣେ ବ୍ୟାଙ୍କ ମ୍ୟାନେଜରଙ୍କୁ ଗୁଳି କରି ହତ୍ୟା କରିଛନ୍ତି। ମୃତ ବ୍ୟାଙ୍କ ମ୍ୟାନେଜରଙ୍କ ନାମ ବିଜୟ କୁମାର ବୋଲି କୁହାଯାଉଛି। ମୃତ ବିଜୟ କୁମାର ସ୍ଥାନୀୟ ଗ୍ରାମ ବ୍ୟାଙ୍କରେ ମ୍ୟାନେଜର ଭାବରେ କାର୍ଯ୍ୟ କରୁଥିଲେ। ସେ ଏଠାରେ କିଛି ଦିନ ପୂର୍ବରୁ ଚାକିରିରେ ଯୋଗ ଦେଇଥିଲେ।
ଏଥିସହିତ ଆକ୍ରମଣର ତୁରନ୍ତ ପରେ ଘଟଣାସ୍ଥଳରେ ପହଞ୍ଚି ସେନା ଏବଂ ପୋଲିସ କର୍ମଚାରୀମାନେ ଏହି ଅଞ୍ଚଳକୁ ସିଲ କରି ଆକ୍ରମଣକାରୀଙ୍କୁ ଖୋଜିବା ଆରମ୍ଭ କରି ଦେଇଛନ୍ତି। ଏହି ଅଞ୍ଚଳରେ ସ୍ଥାପିତ ସିସିଟିଭି କ୍ୟାମେରା ମଧ୍ୟ ସ୍କାନ କରାଯାଉଛି।
ତେବେ ମଙ୍ଗଳବାର ଦିନ ଆତଙ୍କବାଦୀମାନେ କୁଲଗାମରେ କାର୍ଯ୍ୟ କରୁଥିବା କାଶ୍ମୀରୀ ହିନ୍ଦୁ ମହିଳା ଶିକ୍ଷକ ରଜନୀ ବାଲାଙ୍କୁ ହତ୍ୟା କରିଛନ୍ତି। ପରଦିନ ଅର୍ଥାତ୍ ବୁଧବାର ରାତିରେ ଦକ୍ଷିଣ କାଶ୍ମୀରର ଶୋପିଆନ୍ରେ ଆତଙ୍କବାଦୀମାନେ ଏକ ଗ୍ରାମୀଣ ଯୁବକଙ୍କୁ ଗୁଳି କରି ପଳାଇ ଯାଇଥିଲେ। ଗୁଳିଟି ତାଙ୍କ ଗୋଡରେ ବାଜିଥିଲା ଏବଂ ତାଙ୍କ ଅବସ୍ଥା ସ୍ଥିର ଥିବା କୁହାଯାଉଛି। ଅଟୋମେଟିକ୍ ଅସ୍ତ୍ରଶସ୍ତ୍ରରେ ସଜ୍ଜିତ ଆତଙ୍କବାଦୀଙ୍କ ଏକ ଗୋଷ୍ଠୀ ବୁଧବାର ରାତି ପ୍ରାୟ ୮ ଟାରେ ଶୋପିଆନ୍ ଗାଁ ରାଖ-ଇ-ଚିଡ୍ରାନ୍ ଭିତରକୁ ପ୍ରବେଶ କରିଥିଲେ।
ଗାଁରେ ପ୍ରବେଶ କରି ସେ ଫାରୁକ୍ ଅହମ୍ମଦ ଶେଖଙ୍କ ଠିକଣା ପଚାରିଥିଲେ। ଆତଙ୍କବାଦୀଙ୍କ ନିକଟତର ହେଉଥିବା ଦେଖି ଘର ବାହାରେ ଠିଆ ହୋଇଥିବା ଫାରୁକ୍ ପଳାଇ ନିଜ ଜୀବନ ରକ୍ଷା କରିବାକୁ ଚେଷ୍ଟା କରିଥିଲେ। ତାଙ୍କୁ ଦୌଡ଼ୁଥିବା ଦେଖି ଆତଙ୍କବାଦୀମାନେ ତାଙ୍କ ଉପରକୁ ଗୁଳି ଚଳାଇଥିଲେ। ତାଙ୍କୁ ଗୁଳି ମାରିବା ମାତ୍ରେ ଫାରୁକ୍ ତଳେ ପଡ଼ିଯାଇଥିଲେ ଏବଂ ଆତଙ୍କବାଦୀମାନେ ତାଙ୍କୁ ମୃତ ବୋଲି ଭାବି ପଳାଇ ଯାଇଥିଲେ। ଆତଙ୍କବାଦୀମାନେ ଚାଲିଯିବା ପରେ ସମ୍ପର୍କୀୟମାନେ ପୋଲିସକୁ ଜଣାଇ ଡାକ୍ତରଖାନା ନେଇଥିଲେ। ଫାରୁକଙ୍କ ଅବସ୍ଥା ସ୍ଥିର ଅଛି।