ତିନି ଦିନିଆ ଜାମ୍ମୁ କାଶ୍ମୀର ଗସ୍ତରେ ଯିବେ ଗୃହମନ୍ତ୍ରୀ ଅମିତ୍ ଶାହା; ଜାଣନ୍ତୁ କଣ ରହିଛି ସମ୍ପୂର୍ଣ୍ଣ କାର୍ଯ୍ୟସୂଚୀ

କେନ୍ଦ୍ର ଗୃହମନ୍ତ୍ରୀ ଅମିତ ଶାହା ୩୦ ସେପ୍ଟେମ୍ବରରୁ ତିନି ଦିନିଆ ଜାମ୍ମୁ କାଶ୍ମୀର ଗସ୍ତରେ ଯାଉଛନ୍ତି। ସେଠାରେ ସେ ଦୁଇଟି ସମାବେଶକୁ ସମ୍ବୋଧିତ କରିବେ ଏବଂ ଚାଲିଥିବା ବିକାଶମୂଳକ ପ୍ରକଳ୍ପର ସମୀକ୍ଷା କରିବେ ବୋଲି ଆଶା କରାଯାଉଛି।

ଜାମ୍ମୁ କାଶ୍ମୀର ବିଜେପିର ଦାୟିତ୍ୱରେ ଥିବା ସୁନୀଲ ଶର୍ମାଙ୍କ ଅନୁଯାୟୀ ଅମିତ ଶାହା ତାଙ୍କର ତିନି ଦିନିଆ ଗସ୍ତ ସମୟରେ ଅଧିକାଂଶ ସମୟ କାଶ୍ମୀରରେ ବିତାଇବେ। ଏହି ସମୟରେ ସେ ଅକ୍ଟୋବର ୧ ଏବଂ ୨ ରେ ରାଯୌରୀ ଏବଂ ବାରାମୁଲ୍ଲାରେ ରାଲି କରିବାକୁ ଯୋଜନା କରିଛନ୍ତି। ତାଙ୍କର ଏହି ଗସ୍ତର ଆଗାମୀ ନିର୍ବାଚନ ସହିତ କୌଣସି ସମ୍ପର୍କ ନାହିଁ ବୋଲି ସେ କହିଛନ୍ତି।

ଜାମ୍ମୁ କାଶ୍ମୀରରେ ନିର୍ବାଚନ କେବେ ହେବ?

ସୁନୀଲ ଶର୍ମା କହିଛନ୍ତି ଯେ ଜାମ୍ମୁ କାଶ୍ମୀରର କେନ୍ଦ୍ରଶାସିତ ଅଞ୍ଚଳ ଡିସେମ୍ବର ମାସରେ ନିର୍ବାଚନ କରିବ ବୋଲି ଆଶା କରାଯାଉଥିଲା, କିନ୍ତୁ ବର୍ତ୍ତମାନ ଏପ୍ରିଲ ୨୦୨୩ ରେ ନିର୍ବାଚନ ହେବାର ସମ୍ଭାବନା ରହିଛି। ତେବେ କଳ୍ପନାଜଳ୍ପନ ତୁଳନାରେ ଚୂଡ଼ାନ୍ତ ନିଷ୍ପତ୍ତି ନିର୍ବାଚନ ଆୟୋଗ ନିଜେ ନେବାକୁ ପଡିବ।