କାର୍ତ୍ତିକ ପୂର୍ଣ୍ଣିମାରେ ଅଘଟଣ

ଓଡ଼ିଆ ନ୍ୟୁଜ,(ବ୍ୟୁରୋ): ଆଜି ପବିତ୍ର ଡଙ୍ଗା ଭସା | ଆଉ ସବୁଠି ଚାଲିଛି ଆନନ୍ଦ ଉଲ୍ଲାସର ମାହୋଲ । ଡଙ୍ଗା ଭସାଇ ପୂଣ୍ୟ ଅର୍ଜନ କରିବାକୁ ସବୁ ଜଳାଶୟରେ ଭିଡ଼ । ମାତ୍ର ଏପରି ସମୟରେ ଆଜି ସକାଳେ ମାଲକାନଗିରି ଜିଲ୍ଲା ସଦର ଥାନା ଚମ୍ପାନଗରରେ ଘଟି ଯାଇଛି ଏକ ଦୁଃଖଦ ଘଟଣା। ତେବେ ସୂଚନା ମୁତାବକ,  ଆଜି ସକାଳୁ ସାଙ୍ଗମାନଙ୍କ ସହ ଗାଁ ନିକଟସ୍ଥ ପୋଖରୀକୁ ଡଙ୍ଗା ଭସାଇବାକୁ ଯାଇଥିଲେ ସାବିତ୍ରୀ ।

ସେଠାରେ ଡଙ୍ଗା ଭସାଇବା ସହ ସାଙ୍ଗ ମାନଙ୍କ ସହ ଅନ୍ୟ ଡଙ୍ଗା ଗୁଡିକରୁ ଟଙ୍କା ସଂଗ୍ରହ କରିବା ପାଇଁ ପୋଖରି ଭିତରକୁ ଯାଇଥିଲେ । ଟଙ୍କା ସଂଗ୍ରହ କରୁଥିବା ବେଳେ ହଠାତ୍ ସାବିତ୍ରୀଙ୍କ ଗୋଡ ଖସିଯିବାରୁ ସେ ପାଣିରେ ବୁଡିଯାଇଥିଲେ। ଅନ୍ୟ ସାଙ୍ଗମାନେ ଏହା ଦେଖି ଭୟରେ ଦୌଡ଼ି ପଳାଇଥିଲେ। କିନ୍ତୁ ଏନେଇ କାହାରିକୁ କିଛି କହିନଥିଲେ। ଅନେକ ସମୟ ପରେ ସାବିତ୍ରୀଙ୍କ ପରିବାର ଲୋକେ ତାଙ୍କୁ ଖୋଜାଖୋଜି କରିବା ବେଳେ ସେ ପୋଖରିରେ ତାଙ୍କର ମୃତଦେହ ଭାସୁଥିବା ବେଖିବାକୁ ପାଇଥିଲେ ।

ଖବର ପାଇ ଅଗ୍ନିଶମ କର୍ମଚାରୀ ପହଞ୍ଚି ନିକଟସ୍ଥ ପୋଖରୀରୁ ନାବାଳିକାଙ୍କୁ ଉଦ୍ଧାର କରିଥିଲେ। ତୁରନ୍ତ ତାଙ୍କୁ ମେଡିକାଲ ନିଆଯାଇଥିବା ବେଳେ ସେଠାରେ ଡାକ୍ତର ମୃତ ଘୋଷଣା କରିଛନ୍ତି। ସବୁଠି କାର୍ତ୍ତିକ ପୂର୍ଣ୍ଣିମା ପାଇଁ ଆନନ୍ଦ ଉଲ୍ଲାସର ମାହୋଲ ଥିବା ବେଳେ ନାବାଳିକାଙ୍କ ପରିବାର କାନ୍ଦ ବୋବାଳିରେ ଫାଟି ପଡ଼ୁଛି। ଏହି ଘଟଣା ଯୋଗୁ ଗାଁରେ ଶୋକର ଛାୟା ଖେଳି ଯାଇଛି।