ମନୀଷ ସିସୋଦିଆଙ୍କ ବିରୋଧରେ ମାନହାନି ମକଦ୍ଦମା ରୁଜୁ କଲେ ମୁଖ୍ୟମନ୍ତ୍ରୀଙ୍କ ପତ୍ନୀ: ମାଗିଲେ ୧୦୦ କୋଟି କ୍ଷତିପୂରଣ

ଓଡ଼ିଆ ନ୍ୟୁଜ୍ (ବ୍ୟୁରୋ): ଦିଲ୍ଲୀର ଆପ୍ ସରକାରଙ୍କ ମୁସ୍କିଲ୍ ଦିନକୁ ଦିନ ବଢିବାରେ ଲାଗିଛି । ବର୍ତ୍ତମାନ ଡେପୁଟି ସିଏମ ମନୀଷ ସିସୋଦିଆଙ୍କ ବିରୋଧରେ ମାନହାନି ମକଦ୍ଦମା ଦାୟର କରାଯାଇଛି। ଆସାମର ମୁଖ୍ୟମନ୍ତ୍ରୀ ହେମନ୍ତ ବିଶ୍ୱ ଶର୍ମାଙ୍କ ପତ୍ନୀ ରିଙ୍କି ଭୁୟାନ ଶର୍ମା ମଙ୍ଗଳବାର ଦିନ ଡେପୁଟି ସିଏମ ମନୀଷ ସିସୋଦିଆଙ୍କ ବିରୋଧରେ ମାନହାନି ମକଦ୍ଦମା ଦାୟର କରିଛନ୍ତି। ସିଭିଲ୍ ଜଜ୍ ଗୌହାଟି କୋର୍ଟରେ ରିଙ୍କି ଭୁୟାନ୍ ଶର୍ମା ମାନହାନି ମକଦ୍ଦମା ଦାୟର କରିଛନ୍ତି ଏବଂ କ୍ଷତିପୂରଣ ବାବଦରେ ୧୦୦ କୋଟି ଟଙ୍କା ମଧ୍ୟ ଦାବି କରିଛନ୍ତି।

ଆସାମର ମୁଖ୍ୟମନ୍ତ୍ରୀ ହେମନ୍ତ ବିଶ୍ୱ ଶର୍ମାଙ୍କ ପତ୍ନୀ ରିଙ୍କି ଭୁୟାନ ମଙ୍ଗଳବାର ଦିନ ପିପିଇ କିଟ୍ ପ୍ରସଙ୍ଗରେ ଦିଲ୍ଲୀର ଡେପୁଟି ସିଏମ୍ ଏବଂ ଏଏପି ନେତା ମନୀଷ ସିସୋଦିଆଙ୍କ ବିରୋଧରେ ୧୦୦ କୋଟି ଟଙ୍କା ବଦନାମ ମାମଲା ଦାୟର କରିଛନ୍ତି। ଜୁନ ୨୨ ରେ ଗୌହାଟି ହାଇକୋର୍ଟରେ ଏହି ମାମଲାର ଶୁଣାଣି ହେବ। ରିଙ୍କି ଭୁୟାନଙ୍କ ଓକିଲ ପି ନାୟକ କହିଛନ୍ତି ଯେ ରିଙ୍କି ଭୁୟାନ ଶର୍ମା ଏଫଆଇଆର ଦାଖଲ କରିଛନ୍ତି।

ନିକଟରେ ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ପିପିଇ କିଟ୍ ଚୁକ୍ତି ସମ୍ପର୍କରେ ଆସାମ ସିଏମ୍ ହେମନ୍ତ ବିଶ୍ୱ ଶର୍ମାଙ୍କ ବିରୋଧରେ ଦୁର୍ନୀତି ଅଭିଯୋଗ ଆଣିଛନ୍ତି। ସିସୋଦିଆ ଏକ ସାମ୍ବାଦିକ ସମ୍ମିଳନୀରେ ଅଭିଯୋଗ କରିଛନ୍ତି ଯେ ହେମନ୍ତ ବିଶ୍ୱ ଶର୍ମା ତାଙ୍କ ପତ୍ନୀ ଏବଂ ପୁଅର ବ୍ୟବସାୟିକ ଭାଗିଦାରୀଙ୍କ ସଂସ୍ଥାକୁ ୨୦୨୦ ରେ ବଜାର ଦରଠାରୁ ଅଧିକ ମୂଲ୍ୟରେ ପିପିଇ କିଟ୍ ଯୋଗାଣ ପାଇଁ ସରକାରୀ ଚୁକ୍ତିନାମା ଦେଇଛନ୍ତି। ସିସୋଦିଆର ଏହି ବିବୃତ୍ତିରେ ହେମନ୍ତ ବିଶ୍ୱ ଶର୍ମା କହିଛନ୍ତି ଯେ ତାଙ୍କ ପତ୍ନୀ ଗୋଟିଏ ପଇସା ନ ନେଇ ସରକାରଙ୍କୁ ୧୫୦୦ ପିପିଇ କିଟ୍ ଦାନ କରିଥିବାରୁ ସେ ଆଇନଗତ କାର୍ୟ୍ୟାନୁଷ୍ଠାନ ଗ୍ରହଣ କରିବେ।