ହାତୀ ଭାଙ୍ଗିଲା ଘର; କାନ୍ଥ ପଡ଼ି ମାଆ, ପୁଅ ମୃତ

ଓଡ଼ିଆ ନ୍ୟୁଜ,(ବ୍ୟୁରୋ): ରାତିରେ ଚାରି ସନ୍ତାନଙ୍କୁ ନେଇ ଘରେ ଶୋଇଥିଲା ମାଆ | ସବୁଦିନ ପରି ଖାଇପିଇ ଖୁସିରେ ଶୋଇଥିଲେ ପରିବାର | ହେଲେ ଏହି ନିଦ୍ରା ମାଆର ଶେଷ ନିଦ୍ରା ହୋଇଛି | କେବଳ ମା ନୁହେଁ ପାଖରେ ଶୋଇଥିବା ପୁଅ ମଧ୍ୟ ସବୁଦିନ ପାଇଁ ଚିରନିଦ୍ରାରେ ଶୋଇଯାଇଛି | ଶୋଇଥିବା ବେଳେ ଘର ଭାଙ୍ଗିଲା ଦନ୍ତା ହାତୀ | କାନ୍ଥ ତଳେ ଚାପି ହୋଇ ଗର୍ଭବତୀ ମାଆ ଓ ପୁଅର ମୃତ୍ୟୁ ହୋଇଛି |

ତିନି ଝିଅ ଗୁରୁତର ହୋଇଛନ୍ତି | ସୁନ୍ଦରଗଡ ଜିଲ୍ଲା ବରସୁଆଁ ରେଞ୍ଜ ବାଲିଝୁଡ଼ି ଗାଁରେ ଘଟିଛି ଏହି ଅଭାବନୀୟ ଅଘଟଣ । ମୃତକମାନେ ହେଲେ ମାଆ ସୁକାନ୍ତି ଭତ୍ତା ଓ ୮ ବର୍ଷର ପୁଅ ସୁଖନାଥ ଭତ୍ତା। ଗୁରୁତରମାନଙ୍କୁ ରାଉରକେଲା ଆରଜିଏଚକୁ ସ୍ଥାନାନ୍ତର କରାଯାଇଛି। ତେବେ ସୂଚନା ଅନୁସାରେ, ଗତକଲି ରାତିରେ ସୁକାନ୍ତି ତାଙ୍କ ପିଲାମାନଙ୍କ ସହ ଘରେ ଶୋଇଥିଲେ।

ଏହି ସମୟରେ ହାତୀ ପଲ ଘରେ ପଶି ବ୍ୟାପକ ଭଙ୍ଗାରୁଜା କରିଥିଲେ | ହାତୀଙ୍କ ଉପଦ୍ରବ ବେଳେ ଏକ ମାଟି କାନ୍ଥ ସୁକାନ୍ତି ତାଙ୍କ ଚାରି ସନ୍ତାନ ଉପରେ ପଡ଼ିଥିଲା । ପାଟି ଶୁଣି ସୁକାନ୍ତିଙ୍କ ଘରେ ପହଞ୍ଚିଥିଲେ ଗ୍ରାମବାସୀ l ୫ ଜଣଙ୍କୁ ସଂଗେ ସଂଗେ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ। କିନ୍ତୁ ସେଠାରେ ଡାକ୍ତର ମା ସୁକାନ୍ତି ଓ ତାଙ୍କ ପୁଅକୁ ମୃତ ଘୋଷଣା କରିଥିଲେ l ତେବେ ସୁକାନ୍ତିଙ୍କ ଅନ୍ୟ ୩ ଝିଅ ଏବେ ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି।