ଦୁଷ୍କର୍ମ ଉଦ୍ୟମ କରି ଫେରାର ଥିବା ଯୁବକ ଗିରଫ

ଓଡ଼ିଆ ନ୍ୟୁଜ,(ବ୍ୟୁରୋ): ବାଲେଶ୍ୱର ଜିଲ୍ଲା ସୋର ବ୍ଲକ ତଳନଗର ପଞ୍ଚାୟତ ହାବେଳୀ ଗଣ୍ଡତରା ଗ୍ରାମରେ ଜଣେ ଯୁବତୀଙ୍କୁ ତାଙ୍କ ସମ୍ପର୍କୀୟ ଭାଇ ଦୁଷ୍କର୍ମ ଉଦ୍ୟମ କରୁଥିବା ବେଳେ ଯୁବତୀ ଜଣଙ୍କ ଖସିବାକୁ ଉଦ୍ୟମ କରିବାରୁ ଯୁବକ ଜଣଙ୍କ ତାଙ୍କୁ ଏକ କଟୁରିରେ ଆକ୍ରମଣ ଘଟଣାରେ ପୁଲିସ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି।

ଅଭିଯୋଗ ଅନୁସାରେ ଏହି ଗ୍ରାମର ଜଣେ ଯୁବତୀଙ୍କୁ ଘରେ କେହି ନଥିବାର ସୁଯୋଗ ନେଇ ତାଙ୍କ ସମ୍ପର୍କୀୟ ଭାଇ ଦୁଷ୍କର୍ମ ଉଦ୍ୟମ କରିଥିଲେ।ସେ ଖସିବାକୁ ଉଦ୍ୟମ କରିବା ସମୟରେ ଅଭିଯୁକ୍ତ ବିଷ୍ଣୁ ମୋହନ ଏକ କଟୁରିରେ ଯୁବତୀ ହାତକୁ ହାଣି ଫେରାର ହୋଇଯାଇଥିଲେ। ଫଳରେ ପରିବାର ଲୋକେ ଯୁବତୀ ଜଣଙ୍କୁ ଗୁରୁତର ଭାବେ ସୋର ଡାକ୍ତରଖାନାରେ ଭର୍ତି କରିଥିଲେ।

ସୋର ଥାନାରେ ଅଭିଯୋଗ ପରେ ପୁଲିସ ୭୯୭/୨୪ ରେ ଏକ ମାମଲା ରୁଜ୍ଜୁ କରି ଘଟଣାର ତଦନ୍ତ ଆରମ୍ଭ କରିଥିଲା। ବଶ୍ୱସ୍ତ ସୂତ୍ରରୁ ଖବର ପାଇ ପୁଲିସ ଗତକାଲି ରାତିରେ ଅଭିଯୁକ୍ତକୁ ତାଙ୍କ ଘରୁ ଗିରଫ କରିଥିଲା। ଆଜି ଅପରାହ୍ନରେ ସୋର ମେଡ଼ିକାଲରେ ତାର ଡାକ୍ତରୀ ମାଇନା ପରେ ପୁଲିସ ତାକୁ କୋର୍ଟ ଚାଲାଣ କରିଛି।