ଜମ୍ମୁରେ ପ୍ରଧାନମନ୍ତ୍ରୀ ମୋଦୀଙ୍କ ଗସ୍ତ ପୂର୍ବରୁ ବିସ୍ଫୋରଣ; ପୁଲିସର ତଦନ୍ତ ଜାରି
ପ୍ରଧାନମନ୍ତ୍ରୀଙ୍କ ଜାମ୍ମୁ କାଶ୍ମୀର ଗସ୍ତର କିଛି ଘଣ୍ଟା ପୂର୍ବରୁ ଜାମ୍ମୁରେ ସନ୍ଦେହଜନକ ବିସ୍ଫୋରଣ ଘଟିଛି। ଯାହା ପରେ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଥିଲା। ରବିବାର ସକାଳେ ଘଟିଥିବା ଏହି ବିସ୍ଫୋରଣ ସୁରକ୍ଷା ଏଜେନ୍ସିର ଚିନ୍ତା ବଢାଇ ଦେଇଛି। ତେବେ ଜାମ୍ମୁର ଲାଲିଆନା ଗ୍ରାମରେ ଏହି ବିସ୍ଫୋରଣ ଘଟିଛି। ଏହା ପ୍ରଧାନମନ୍ତ୍ରୀଙ୍କ ରାଲି ସ୍ଥାନ ଠାରୁ ୭ ରୁ ୮ କି.ମି ଦୂରରେ ଅବସ୍ଥିତ | ଏହି ବିସ୍ଫୋରଣ ହେତୁ ଦେଢ଼ ଫୁଟ ଗଭୀର ଗର୍ତ୍ତ ଭୂମିରେ ସୃଷ୍ଟି ହୋଇଥିଲା | ଏହି ସମୟରେ, ଏହି ବିସ୍ଫୋରଣର ସୂଚନା ପାଇବା ମାତ୍ରେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ଜମ୍ମୁ ଜିଲ୍ଲା ଅନ୍ତର୍ଗତ ଲାଲିଆନା ଗାଁରେ ଘଟିଥିବା ଏହି ବିସ୍ଫୋରଣଟି କେଉଁ ଧରଣର ତାହା ଜାଣିବା ଲାଗି ଜମ୍ମୁ ଓ କଶ୍ମୀର ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛି। ଜମ୍ମୁର ବରିଷ୍ଠ ପୁଲିସ ସୁପରିଣ୍ଟେଣ୍ଡେଣ୍ଟ୍ ଚନ୍ଦନ କୋହଲି କହିଛନ୍ତି, ଉଲ୍କାପାତ କିଂବା ବଜ୍ରପାତ ଯୋଗୁଁ ଲାଲିଆନା ଗାଁ ଅନ୍ତର୍ଗତ ବିଲରେ ଗହ୍ବରଟିଏ ସୃଷ୍ଟି ହେବା ପରି ମନେହେଉଛି। ଏ ସଂକ୍ରାନ୍ତରେ ଅଧିକ ତଦନ୍ତ ଚାଲିଛି।
ସୂଚନା ଯେ, ଜମ୍ମୁ ଓ କଶ୍ମୀରରୁ ୨୦୧୯ ଅଗଷ୍ଟ ୫ ତାରିଖ ଦିନ ଧାରା ୩୭୦ ଉଚ୍ଛେଦ ହେବା ପରେ ଆଜି ପ୍ରଥମ କରି ଏହି କେନ୍ଦ୍ରଶାସିତ ଅଞ୍ଚଳ ଗସ୍ତ କରୁଛନ୍ତି ମୋଦୀ। ଜମ୍ମୁ ଡିଭିଜନ୍ର ସାମ୍ବା ଜିଲ୍ଲାର ପଲ୍ଲୀ ପଞ୍ଚାୟତରେ ପ୍ରଧାନମନ୍ତ୍ରୀ ମୋଦୀ ସମଗ୍ର ଦେଶରେ ପାଳନ ହେଉଥିବା ଜାତୀୟ ପଞ୍ଚାୟତ ରାଜ ଦିବସ ଅବସରରେ ଗ୍ରାମସଭାଗୁଡ଼ିକ ପ୍ରତି ଉଦ୍ବୋଧନ ଦେବେ। ଏହାଛଡ଼ା, ଜମ୍ମୁ ଓ କଶ୍ମୀରରେ ପ୍ରଧାନମନ୍ତ୍ରୀ ମୋଦୀ ଆଜି ୨୦,୦୦୦ କୋଟି ଟଙ୍କାରୁ ଊର୍ଦ୍ଧ୍ବ ବିକାଶମୂଳକ ପ୍ରକଳ୍ପର ଉଦ୍ଘାଟନ ଓ ଶିଳାନ୍ୟାସ କରିବେ।