ପଶ୍ଚିମବଙ୍ଗ ଗସ୍ତରେ ଯାଇ ମମତାଙ୍କ ଉପରେ ବର୍ଷିଲେ ଅମିତ ଶାହା; CAA କୁ ନେଇ କିଛି ଏଭଳି କହିଲେ ଶାହା

କେନ୍ଦ୍ର ଗୃହମନ୍ତ୍ରୀ ତଥା ବିଜେପି ନେତା ଅମିତ ଶାହା ପଶ୍ଚିମବଙ୍ଗ ଗସ୍ତରେ ଅଛନ୍ତି। ଆଜି ସିଲିଗୁରିର ରେଲୱେ ସ୍ପୋର୍ଟସ୍ ଗ୍ରାଉଣ୍ଡରେ ଏହି ସମାବେଶକୁ ସମ୍ବୋଧିତ କରିବାବେଳେ ସେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ ଆମେ ଗଣତନ୍ତ୍ରରେ ବିଶ୍ୱାସ କରୁ। ଆମେ ଭାବୁଥିଲୁ ଯଦି ମମତା ବାନାର୍ଜୀ ତୃତୀୟ ଥର ଜିତନ୍ତି, ହୁଏତ ସେ ଉନ୍ନତି କରିବେ, କିନ୍ତୁ କିଛି ପରିବର୍ତ୍ତନ ହୋଇନାହିଁ। ମମତା ଦିଦି, ତିନିଥର ଜିତିବା ପରେ ମଧ୍ୟ ତୁମେ ଉନ୍ନତି କରୁନାହଁ। ବିଜେପି ଆପଣଙ୍କ ବିରୋଧରେ ଲଢେ଼ଇ ଜାରି ରଖିବ। ଅମିତ  ଶାହା ଆହୁରି କହିଛନ୍ତି ଯେ ଆମେ ତାଙ୍କୁ ଗୋଟିଏ ବର୍ଷ ପାଇଁ ସୁଯୋଗ ଦେଇଥିଲୁ, କିନ୍ତୁ ପରିବର୍ତ୍ତନ ହୋଇନଥିଲା। ମୁଁ ସେମାନଙ୍କୁ କହିବାକୁ ଚାହେଁ ଯେ ଜନତାମାନେ ଭୁଲକୁ ଠିକ୍ କରି ଜାଣନ୍ତି | ବିଧାନସଭାରେ ବିଜେପି ବିଧାୟକଙ୍କ ସଂଖ୍ୟା ତିନିରୁ ୭୭ କୁ ବୃଦ୍ଧି କରିବାରେ ସାହାଯ୍ୟ କରିଥିବାରୁ ମୁଁ ବଙ୍ଗଳାବାସୀଙ୍କୁ ଧନ୍ୟବାଦ ଦେବାକୁ ଚାହୁଁଛି।ଅମିତ ଶାହା କହିଛନ୍ତି, ଦିଦି, ଯଦି ଦେଶରେ କିଛି ଘଟେ, ତୁମେ ପ୍ରତିନିଧୀ ପଠାଉଛ, କିନ୍ତୁ ବୀରଭୂମି ଘଟଣାରେ ଦିଦି କାହିଁକି ତୁମେ କୌଣସି ପ୍ରତିନିଧୀ ପଠାଇଲ ନାହିଁ? ସେ ଆହୁରି ମଧ୍ୟ କହିଛନ୍ତି ଯେ ଟିଏମସି ଗୁଜବ ପ୍ରଚାର କରିଛି ଯେ CAA ପ୍ରଯୁଜ୍ୟ ହେବ ନାହିଁ। କରୋନା ତରଙ୍ଗ ସମାପ୍ତ ହେବା ପରେ CAA କାର୍ଯ୍ୟକାରୀ ହେବ | ଟିଏମସି ଲୋକଙ୍କୁ କାନ ଖୋଲି ଶୁଣନ୍ତୁ ଯେ CAA ଏକ ବାସ୍ତବତା, ଥିଲା ଏବଂ ରହିବ।