ପୁଣି ଅଣନିଶ୍ୱାସୀ ଦିଲ୍ଲୀବାସୀ

ଓଡ଼ିଆ ନ୍ୟୁଜ, (ବ୍ୟୁରୋ) :  ନୂଆଦିଲ୍ଲୀ- ବାୟୁ ପ୍ରଦୂଷଣ ଯୋଗୁ ପୁଣି ଅଣନିଶ୍ୱାସୀ ଦିଲ୍ଲୀବାସୀ । ଗତ 48ଘଣ୍ଟାରେ ସମଗ୍ର ବାୟୁ ପ୍ରଦୂଷଣ ସୂଚକାଙ୍କ ଗମ୍ଭୀର ଶ୍ରେଣୀରେ ରହିଛି । ଆଗାମୀ ଦିନରେ ଏହା ଆହୁରି ବିଷାକ୍ତ ହେବ । କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ଅନୁସାରେ ଆଜି ସକାଳେ ଦିଲ୍ଲୀର ଆନନ୍ଦ ବିହାରରେ ଏକ୍ୟୁଆଇ 430, ଆରକେପୁରମରେ 417, ପଞ୍ଜାବୀ ବାଗରେ 423 ଓ ଜାହାଙ୍ଗିରପୁରୀରେ 428 ଛୁଇଁଛି ।

ସିପିସିବି ଅନୁଯାୟୀ, ସୋମବାର ଜାତୀୟ ରାଜଧାନୀର ସାମଗ୍ରିକ ଏକ୍ୟୁଆଇ ‘ଅତ୍ୟନ୍ତ ଖରାପ’ ବର୍ଗରେ ୩୫୮ ରେକର୍ଡ କରାଯାଇଛି। ଦିଲ୍ଲୀର ପଡ଼ୋଶୀ ସହର ନଏଡା ଏବଂ ଜାତୀୟ ରାଜଧାନୀ ଅଞ୍ଚଳ (ଏନସିଆର)ର ଗୁରୁଗ୍ରାମରେ ମଧ୍ୟ ସମାନ ସ୍ଥିତି ଥିଲା ଏବଂ ହାରାହାରି ଏକ୍ୟୁଆଇ ଯଥାକ୍ରମେ ୩୬୩ ଓ ୩୪୯ ରହିଥିଲା। ସୁପ୍ରିମକୋର୍ଟଙ୍କ କଟକଣା ସତ୍ତ୍ୱେ ଦୀପାବଳି ପାଳନ ସମୟରେ ବାଣ ଫୁଟାଇବା ଘଟଣାରେ ଦିଲ୍ଲୀ ପୁଲିସ ସୋମବାର ୯୭ଟି ମାମଲା ରୁଜୁ କରିଛି। ଯଥାକ୍ରମେ ୨୯ ଓ ୨୮ ମାମଲା ସହ ପୂର୍ବ ଦିଲ୍ଲୀ ଓ ସହରର ଦକ୍ଷିଣ-ପଶ୍ଚିମ ଅଞ୍ଚଳରେ ସର୍ବାଧିକ ମାମଲା ରୁଜୁ ହୋଇଛି। ଦିଲ୍ଲୀର ରୋହିଣୀ ଏବଂ ବାହାର ଉତ୍ତର ଅଞ୍ଚଳରେ କୌଣସି ମାମଲା ରୁଜୁ ହୋଇନାହିଁ।

ସୂଚନାଯୋଗ୍ୟ, ଶୂନ୍ୟରୁ ୫୦ ମଧ୍ୟରେ ଏକ୍ୟୁଆଇକୁ ‘ଭଲ’, ୫୧ରୁ ୧୦୦ ଭିତରେ ‘ସନ୍ତୋଷଜନକ’, ୧୦୧ରୁ ୨୦୦ ‘ମଧ୍ୟମ’, ୨୦୧ରୁ ୩୦୦ ‘ଖରାପ’, ୩୦୧ରୁ ୪୦୦ ‘ଅତ୍ୟନ୍ତ ଖରାପ’, ୪୦୧ରୁ ୪୫୦ ‘ଗୁରୁତର’ ଏବଂ ୪୫୦ରୁ ଅଧିକ ‘ଅତି ଗୁରୁତର’ ବୋଲି ବିବେଚନା କରାଯାଏ।