କର୍ଣ୍ଣାଟକରେ କଂଗ୍ରେସର ବଡ ବିଜୟ, ବୋମ୍ମାଇ ଦର୍ଶାଇଲେ କଂଗ୍ରେସ ବିଜୟର ତିନୋଟି କାରଣ
ଓଡ଼ିଆ ନ୍ୟୁଜ (ବ୍ୟୁ୍ରୋ) : କର୍ଣ୍ଣାଟକ ବିଧାନସଭା ନିର୍ବାଚନରେ କଂଗ୍ରେସର ବଡ଼ ବିଜୟ ହୋଇଛି। ନିର୍ବାଚନରେ କଂଗ୍ରେସ ସଂଖ୍ୟାଗରିଷ୍ଠତା ହାସଲ କରିଛି। ତେବେ ବିଧାନସଭା ନିର୍ବାଚନରେ ବିଜେପିର ଅଭିଯାନର ନେତୃତ୍ୱ ନେଇଥିବା କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ବସଭରାଜ ବୋମ୍ମାଇ କହିଛନ୍ତି ଯେ କଂଗ୍ରେସ ଏହାର ଅଭିଯାନ ଶୀଘ୍ର ଆରମ୍ଭ କରିଥିଲା।
ବିଧାନସଭା ନିର୍ବାଚନରେ ବିଜେପି ୨୨୪ଟି ବିଧାନସଭା ଆସନ ମଧ୍ୟରୁ ୬୬ଟି ଜିତିଥିବାବେଳେ କଂଗ୍ରେସ ୧୩୫ଟି ଆସନ ଜିତିଥିଲା । ଅନ୍ୟପଟେ ଜେଡିଏସ ୧୯ଟି ଆସନ ଜିତିଥିଲା। ତେବେ ବୋମ୍ମାଇ କଂଗ୍ରେସର ବିଜୟର ତିନୋଟି କାରଣ ଦର୍ଶାଇଛନ୍ତି।
ସେ କହିଛନ୍ତି, “ଲୋକମାନେ ‘ମାଗଣା ଉପହାରର ଲୋଭରେ ପଡ଼ିଗଲେ।ତା’ପରେ ବ୍ୟକ୍ତିଗତ ଭାବେ ମୁଁ ଅନୁଭବ କରୁଛି ଯେ କଂଗ୍ରେସ ଅଧିକ ସଂଗଠିତ ଥିଲା । କଂଗ୍ରେସ ଏହାର ପ୍ରସ୍ତୁତି ପୂର୍ବରୁ ଆରମ୍ଭ କରିସାରିଥିଲା। ତେବେ ଆମେ(ବିଜେପି) ନିଷ୍ପତ୍ତି ଟିକେ ବିଳମ୍ବରେ ନେଲୁ। ଏହା ଛଡା ବିଳମ୍ବରେ କାମ କଲୁ। ସେ କହିଛନ୍ତି, ଯଦିଓ ବିଜେପି ସରକାର ଅନେକ କାର୍ଯ୍ୟକ୍ରମ ଆୟୋଜନ କରିଥିଲା କିନ୍ତୁ ସଠିକ୍ ବାର୍ତ୍ତା ଲୋକଙ୍କ ପାଖରେ ପହଞ୍ଚିପାରିନଥିଲା । ସେ କହିଛନ୍ତି ବିଜେପିକୁ ମିଳିଥିବା ଭୋଟରେ କୌଣସି ପରିବର୍ତ୍ତନ ହୋଇନାହିଁ | ବୋମ୍ମାଇ କହିଛନ୍ତି ଯେ ଦକ୍ଷିଣ କର୍ଣ୍ଣାଟକ ଯାହାକୁ ଜେଡି (ଏସ୍) ଗଡ଼ ବୋଲି କୁହାଯାଏ, ସେହି ଦଳର ପାଞ୍ଚ ପ୍ରତିଶତ ଭୋଟ୍ କଂଗ୍ରେସ ଆଡକୁ ଯାଇଛି।
୨୦୧୮ଠାରୁ ବିଜେପି ନିଜର ୩୬ ପ୍ରତିଶତ ଭୋଟ୍ ବଜାୟ ରଖିଛି, କିନ୍ତୁ କଂଗ୍ରେସର ଭୋଟ୍ ପ୍ରତିଶତ ୩୮.୧ ପ୍ରତିଶତରୁ ୪୨.୯ ପ୍ରତିଶତକୁ ବୃଦ୍ଧି ପାଇଛି। ଜେଡି (ଏସ୍)ର ଭୋଟ୍ ପ୍ରତିଶତ ୧୮.୩ ରୁ ୧୩.୩ ପ୍ରତିଶତକୁ ଖସି ଆସିଛି ବୋଲି ସେ ପ୍ରତିକ୍ରିୟାରେ କହିଛି ।