ବିଜେଡ଼ି ସରକାର ଓଡ଼ିଶାର ମାଆ ଭଉଣୀଙ୍କୁ ସୁରକ୍ଷା ନ ଦେଇ ରାଜନୀତି କରିବା ଚିନ୍ତାଜନକ: ସୂରଜ ସୂର୍ଯ୍ୟବଂଶୀ

0

ଓଡ଼ିଆ ନ୍ୟୁଜ୍(ବ୍ୟୁରୋ): ବିଧାନସଭା ତଥ୍ୟରୁ ରାଜ୍ୟରେ ମହିଳା ଓ ଶିଶୁ କେତେ ସୁରକ୍ଷିତ, ତାହା ମୁଁ ଜାଣିପାରିଛି । ଦୀର୍ଘ 22 ବର୍ଷ ଶାସନରେ ରାଜ୍ୟରେ ନାରୀ ନିର୍ଯ୍ୟାତନା ଚରମ ସୀମାରେ ପହଞ୍ଚିଥିବା ବିଧାନସଭା ତଥ୍ୟ କହୁଥିବା ବେଳେ ନାରୀଙ୍କୁ ସୁରକ୍ଷା ନ ଦେଇ ବିଜେଡି ରାଜନୀତି କରିବା ଚିନ୍ତାଜନକ ବୋଲି ଏକ ପ୍ରେସ ବିଜ୍ଞପ୍ତି ଜରିଆରେ କହିଛନ୍ତି ଧାମନଗରର ନବନିର୍ବାଚିତ ବିଧାୟକ ସୂରଜ ସୂର୍ଯ୍ୟବଂଶୀ ।

ସେ କହିଛନ୍ତି ଯେ ବିଜେଡି ମୁଖପାତ୍ର ସସ୍ମିତ ପାତ୍ରଙ୍କ ପ୍ରେସ ବିବୃତ୍ତି ଦେଖିଲି । ସେ ଆମ ନେତା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ମନ୍ତବ୍ୟକୁ ନା ଠିକରେ ଶୁଣିଛନ୍ତି ନା ଠିକରେ ବୁଝିବା ପାଇଁ ଚେଷ୍ଟା କରିଛନ୍ତି । ମୁଖ୍ୟମନ୍ତ୍ରୀଙ୍କ ଦାୟିତ୍ୱରେ ଗୃହ ବିଭାଗ ରହିଛି । ମାଆଙ୍କୁ ସମ୍ମାନର ନାରା ଦେଉଥିବା ବିଜେଡ଼ି ସରକାରରେ ନାରୀ ନିର୍ଯ୍ୟାତନା ଚରମ ସୀମାରେ ପହଞ୍ଚିଥିବା ବିଧାନସଭା ତଥ୍ୟ କହୁଛି ଓ ରାଜ୍ୟବାସୀଙ୍କ ସାମ୍ନାରେ ରହିଛି । ଖୋଦ୍ ବିଜେଡି ଦଳର ନେତା ସୌମ୍ୟରଞ୍ଜନ ପଟ୍ଟନାୟକ ଓ ବରିଷ୍ଠ କଂଗ୍ରେସ ନେତା ନରସିଂହ ମିଶ୍ରଙ୍କ ଓଡିଶାର ମାଆ ଓ ଭଉଣୀ ଏବଂ ଶିଶୁ ନିଖୋଜ ଉପରେ ହେଉଥିବା ନିର୍ଯ୍ୟାତନା ପ୍ରଶ୍ନରେ ରାଜ୍ୟ ସ୍ୱରାଷ୍ଟ୍ର ମନ୍ତ୍ରୀ ଦେଇଥିବା ଉତ୍ତର ଚିନ୍ତାଜନକ ।

ରାଜ୍ୟରେ 2021ରେ ନାରୀ ହତ୍ୟା 1191, ଧର୍ଷଣ 2368, ଯୌତୁକ ନିର୍ଯ୍ୟାତନା 3693 ଓ ବିଭିନ୍ନ ଅପରାଧରେ ମହିଳାମାନେ ଶୀକାର ହୋଇଛନ୍ତି । ରାଜ୍ୟରେ ଧର୍ଷଣ ମାମଲା ନିୟନ୍ତ୍ରଣ ହେବା ପରିବର୍ତ୍ତେ ଧର୍ଷଣ ମାମଲା ବୃଦ୍ଧି ପାଇଛି । ନାରୀ ନିର୍ଯ୍ୟାତନା ପାଇଁ ଓଡ଼ିଶା ସଦାବେଳେ ଅପବାଦ ମୁଣ୍ଡାଇ ଆସିଛି । 2021ରେ 7316 ବାଳିକା ନିଖୋଜ ହୋଇଛନ୍ତି । ମୁଖ୍ୟମନ୍ତ୍ରୀ ଖୋଦ୍ ଗୃହମନ୍ତ୍ରୀ ଅଛନ୍ତି । ଏହି ସବୁ ବିଧାନସଭାର ତଥ୍ୟ ହିଁ ପ୍ରମାଣ କରୁଛି ରାଜ୍ୟରେ ମହିଳା ଓ ନାବାଳିକା କେତେ ସୁରକ୍ଷା ଅଛନ୍ତି ଓ ମହିଳାଙ୍କୁ କେତେ ସମ୍ମାନ ଦିଆଯାଉଛି ? ଏ କ’ଣ ନାରୀ ସଶକ୍ତିକରଣର ଉଦାହରଣ?

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି 2014ରୁ ଶାସନ କ୍ଷମତା ଗ୍ରହଣ କରିବା ପରେ ମହିଳାଙ୍କୁ ସମ୍ମାନ ଦେବା ସହ ସେମାନଙ୍କର ବିକାଶ ଦିଗରେ କାର୍ଯ୍ୟ କରୁଛନ୍ତି । ସେଥିପାଇଁ ଦେଶର ମାଆ ଭଉଣୀମାନେ ପ୍ରଧାନମନ୍ତ୍ରୀଙ୍କୁ ଆଶୀର୍ବାଦ କରି ନିର୍ବାଚିତ କରି ଚାଲିଛନ୍ତି । ଶୌଚ ପାଇଁ ଶୌଚାଳୟ, ରାନ୍ଧିବା ପାଇଁ ଗ୍ୟାସ, ଜନଧନ ଯୋଜନା କିମ୍ବା କୋଭିଡ୍ ସମୟରେ 1500 ଟଙ୍କା ସହାୟତା ରାଶି ହେଉ ଏବଂ ଗରିବ କଲ୍ୟାଣ ଯୋଜନାରେ ଖାଦ୍ୟ ଶସ୍ୟ ପ୍ରଦାନ କରିବା ହେଉ, ଏହିପରି ଅନେକ କାର୍ଯ୍ୟ କରି ପ୍ରଧାନମନ୍ତ୍ରୀ ମାଆ ଓ ଭଉଣୀ ମାନଙ୍କର ବିଶ୍ୱାସଭାଜନ ହୋଇପାରିଛନ୍ତି ।

ଧାମନଗରର ଉପନିର୍ବାଚନରେ ମାଆ ଭଉଣୀମାନଙ୍କ ଭୋଟ୍ ପ୍ରତିଶତ ଅଧିକ ଥିଲା ଏବଂ ଧାମନଗରର ମାଆ ଓ ଭଉଣୀ ମାନେ ବିଜେପିକୁ ଆଶୀର୍ବାଦ କରି ଜିତାଇଥିଲେ । ଏହା ପ୍ରମାଣିତ କରୁଛି , ମାଆ ଭଉଣୀ ମାନଙ୍କର କେତେ ଆଶୀର୍ବାଦ ବିଜେପି ପ୍ରତି ରହିଛି । ସସ୍ମିତ ବାବୁ ସୁବିଧା ଅନୁସାରେ ନବୀନ ପଟ୍ଟନାୟକଙ୍କୁ କେବେ ମୁଖ୍ୟମନ୍ତ୍ରୀ ତ କେବେ ଦଳର ସଭାପତି ଭୂମିକାରେ ଉପସ୍ଥାପନା କରୁଛନ୍ତି, ଯାହା ରାଜ୍ୟବାସୀ ଜାଣିଲେଣି ଏବଂ ଆଗକୁ ମଧ୍ୟ ସମ୍ପୂର୍ଣ୍ଣ ଭାବେ ବୁଝିଯିବେ ବୋଲି ସୂର୍ଯ୍ୟବଂଶୀ କହିଛନ୍ତି ।

Leave A Reply

Your email address will not be published.