ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ରବୀନ୍ଦ୍ରନାଥ ଟାଗୋରଙ୍କ ୧୬୩ତମ ଜୟନ୍ତୀ ପାଳିତ

ଓଡ଼ିଆ ନ୍ୟୁଜ,(ବ୍ୟୁରୋ): ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ପରିସରରେ ନୋବେଲ ପୁରସ୍କାର ବିଜେତା ତଥା ସାଂସ୍କୃତିକ ଖ୍ୟାତିସମ୍ପନ୍ନ ବିଶ୍ଵଗୁରୁ ରବୀନ୍ଦ୍ରନାଥ ଟାଗୋରଙ୍କ ୧୬୩ତମ ଜୟନ୍ତୀ ଗତ ୮ ମଇ ୨୦୨୪ ରେ ପାଳିତ ହୋଇଯାଇଛି। ଏହି ଅବସରରେବିଶ୍ୱବିଦ୍ୟାଳୟର ମାନ୍ୟବର କୁଳପତି ପ୍ରଫେସର ଚକ୍ରଧର ତ୍ରିପାଠୀ ଟାଗୋରଙ୍କ ତୈଳ ଚିତ୍ରରେ ପୁଷ୍ପମାଲ୍ୟ ଅର୍ପଣ କରି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ଅନ୍ୟମାନଙ୍କ ମଧ୍ୟରେ ଜୈବ ବିବିଧତା ଓ ପ୍ରାକୃତିକ ସମ୍ପଦ ସଂରକ୍ଷଣ ବିଦ୍ୟାଳୟର ଡିନ୍ ପ୍ରଫେସର ଶରତ କୁମାର ପଲିତା, ସମାଜବିଜ୍ଞାନ ବିଭାଗର ଆସୋସିଏଟ୍ ପ୍ରଫେସର ତଥା ମୁଖ୍ୟ ଡ. କପିଳା ଖେମୁଣ୍ଡୁ ଏବଂ ଜୈବ ବିବିଧତା ଓ ପ୍ରାକୃତିକ ସମ୍ପଦ ସଂରକ୍ଷଣ ବିଭାଗର ସହକାରୀ ପ୍ରଫେସର ଡ. କାକୋଳି ବାନାର୍ଜୀ ପ୍ରମୁଖ ଉପସ୍ଥିତ ଥିଲେ।

ଉତ୍ସବରେ ଅଧ୍ୟକ୍ଷତା କରି ପ୍ରଫେସର ତ୍ରିପାଠୀ ଟାଗୋରଙ୍କ ଦୂରଦୃଷ୍ଟି, ଦର୍ଶନ ଏବଂ ଦେଶର ନିରନ୍ତର ବିକାଶ ପାଇଁ ଉଦ୍ଦିଷ୍ଟ ଶିକ୍ଷାଗତ ପ୍ରୟାସ ଉପରେ ଆଲୋକପାତ କରିଥିଲେ। ଟାଗୋରଙ୍କ ପ୍ରସିଦ୍ଧ କୃତି ଗୀତାଞ୍ଜଳିକୁ ଉଦାହରଣ ଦେଇ ସେ କହିଥିଲେ, ଗୀତାଞ୍ଜଳିରେ ଟାଗୋରଙ୍କ ଲେଖା ଦେଖି ସମଗ୍ର ବିଶ୍ୱ ଆଶ୍ଚର୍ଯ୍ୟ ହୋଇଯାଇଥିଲା। ବିଶ୍ୱଗୁରୁ ରବୀନ୍ଦ୍ରନାଥ କବିତା ଆକାରରେ ଗୀତାଞ୍ଜଳିର ଶବ୍ଦ ମାଧ୍ୟମରେ ଆମ ସମାଜର ସାର ଏବଂ ଆମ ଦେଶର ଭାବମୂର୍ତ୍ତିକୁ ଆଲୋକିତ କରିଥିଲେ| ପ୍ରଫେସର ତ୍ରିପାଠୀ ଟାଗୋରଙ୍କ ବିଶ୍ୱଭାରତୀ, ଶାନ୍ତିନିକେତନ ପ୍ରତିଷ୍ଠା ଉପରେ ଗୁରୁତ୍ୱାରୋପ କରିଥିଲେ, ଯାହା ସାମାଜିକ ମୂଲ୍ୟବୋଧ ଏବଂ ଗ୍ରାମ୍ୟ ଜୀବନର ଉନ୍ନତି ଉପରେ ଆଧାରିତ ଏକ ଶାନ୍ତିପୂର୍ଣ୍ଣ ଏବଂ ବିକଶିତ ବିଶ୍ୱର ପରିକଳ୍ପନା କରିଥିଲା । ସେ ଜଣେ ଉଚ୍ଚ କୋଟିର କବି, ଲେଖକ, ନାଟ୍ୟକାର, ସଙ୍ଗୀତକାର, ଦାର୍ଶନିକ, ସମାଜ ସଂସ୍କାରକ ଓ ଚିତ୍ରଶିଳ୍ପୀ ବୋଲି ପ୍ରଫେସର ତ୍ରିପାଠୀ କହିଥିଲେ ।
ପ୍ରଫେସର ଏସ୍ କେ ପାଲିତା ଭାରତ ଓ ବିଶ୍ୱ ପ୍ରତି ଟାଗୋରଙ୍କ ଗଭୀର ଅବଦାନ ବିଶେଷ କରି ଉଚ୍ଚଶିକ୍ଷାର ଏକ ପ୍ରତିଷ୍ଠିତ ଅନୁଷ୍ଠାନ ବିଶ୍ୱଭାରତୀ ପ୍ରତିଷ୍ଠା ଉପରେ ଆଲୋକପାତ କରିଥିଲେ । ଓଡ଼ିଶା ସହ ଟାଗୋରଙ୍କ ଗୁରୁତ୍ୱପୂର୍ଣ୍ଣ ସମ୍ପର୍କ ଉପରେ ମଧ୍ୟ ସେ ଆଲୋକପାତ କରିଥିଲେ।

ଡକ୍ଟର ଖେମୁଣ୍ଡୁ ଟାଗୋରଙ୍କ ଶିକ୍ଷା ଦର୍ଶନ ବିଷୟରେ ବିସ୍ତୃତ ଭାବରେ ବର୍ଣ୍ଣନା କରିଥିଲେ, ଯାହା କି ୨୦୨୦ର ଜାତୀୟ ଶିକ୍ଷା ନୀତି (ଏନଇପି)ରେ ପ୍ରତିଫଳିତ ହୋଇଥିଲା । ଡ. ବାନାର୍ଜୀ ଜଣେ ବିଶିଷ୍ଟ ପରିବେଶବିତ୍ ଭାବରେ ଟାଗୋରଙ୍କ ଅବଦାନ ବିଷୟରେ କହିଥିଲେ ଏବଂ ତାଙ୍କର କିଛି ଲୋକପ୍ରିୟ ରଚନାର ପରିବେଷଣ ଦ୍ୱାରା ଦର୍ଶକଙ୍କୁ ଆକର୍ଷିତ କରିଥିଲେ ।
କାର୍ଯ୍ୟକ୍ରମରେ ସାମ୍ବାଦିକତା ଓ ଗଣଯୋଗାଯୋଗ ବିଭାଗର ଡାକ୍ତର ସୌରଭ ଗୁପ୍ତା, ସଂସ୍କୃତ ବିଭାଗର ଡ. ଦେବାଶିଷ କର୍ମାକର, ଶିକ୍ଷା ବିଭାଗର ଅତିଥି ଶିକ୍ଷକ ଡ. ପାର୍ଥ ପ୍ରତିମ ଦାସ, ଓଡ଼ିଆ ବିଭାଗର ଡ. ଗଣେଶ ପ୍ରସାଦ ସାହୁ ଓ ଇଂରାଜୀ ବିଭାଗର ଡ. ପ୍ରସେନଜିତ ସିହ୍ନାଙ୍କ ସମେତ ଅଧ୍ୟାପକ ସେମାନଙ୍କ ମତ ରଖିଥିଲେ ।
ଆସୋସିଏଟ୍ ପ୍ରଫେସର ତଥା ଓଡ଼ିଆ ଭାଷା ଓ ସାହିତ୍ୟ ବିଭାଗ ର ମୁଖ୍ୟ ଡ. ରୁଦ୍ରାଣୀ ମହାନ୍ତି କାର୍ଯ୍ୟକ୍ରମ ପରିଚାଳନା କରିଥିବା ବେଳେ ଆସୋସିଏଟ୍ ପ୍ରଫେସର ତଥା ହିନ୍ଦୀ ବିଭାଗମୁଖ୍ୟ ଡ. ଚକ୍ରଧର ପଧାନ ଧନ୍ୟବାଦ ଅର୍ପଣ କରିଥିଲେ। ଏହି କାର୍ଯ୍ୟକ୍ରମରେ ବିଶ୍ୱବିଦ୍ୟାଳୟର ସମସ୍ତ ଅଧ୍ୟାପକମାନେ ଉପସ୍ଥିତ ରହି ଟାଗୋରଙ୍କ ସ୍ଥାୟୀ ପରମ୍ପରାକୁ ସ୍ମରଣ କରିବାର ମହତ୍ତ୍ୱ ଉପରେ ଆଲୋକପାତ କରିଥିଲେ। ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟର ଜନସମ୍ପର୍କ ଅଧିକାରୀ ଡ. ଫଗୁନାଥ ଭୋଇ ଏହି କାର୍ଯ୍ୟକ୍ରମ ପାଇଁ ସମନ୍ୱୟ ଓ ସହଯୋଗ ପ୍ରଦାନ କରି ଏହାର ସଫଳ ରୂପାୟନ କରିଥିଲେ।