ଓଡ଼ିଆ ନ୍ୟୁଜ୍: ବଢିବ ଅଙ୍ଗନୱାଡି କର୍ମଚାରୀଙ୍କ ଦରମା। ଏନେଇ କହିଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା। ସେ କହିଛନ୍ତି ଯେ, ପ୍ରସ୍ତାବ ଅନୁଯାୟୀ ଅଙ୍ଗନୱାଡି କର୍ମଚାରୀଙ୍କ ଦରମା ବୃଦ୍ଧି ଉପରେ ଓଡ଼ିଶା ସରକାର ବିଚାର କରୁଛନ୍ତି। କେନ୍ଦ୍ରୀୟ ଅନୁମୋଦନ ଲୋଡିଥିବା ଏହି ପ୍ରସ୍ତାବ ଉଦୟପୁରରେ ଏକ ବିଧାନସଭା କର୍ମଶାଳାରେ ଉଠାଯାଇଥିଲା। ବେତନ ବୃଦ୍ଧି ଦ୍ୱାରା ରାଜ୍ୟର ୭୪,୦୦୦ କେନ୍ଦ୍ରର ପ୍ରାୟ ୧.୪ ଲକ୍ଷ ଅଙ୍ଗନୱାଡି କର୍ମଚାରୀ ଉପକୃତ ହେବେ। ଏଥିସହ କର୍ମଜୀବୀ ମହିଳାମାନଙ୍କ ପାଇଁ ହଷ୍ଟେଲ ସୁବିଧା ପାଇଁ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।
ତେବେ ଅଙ୍ଗନୱାଡି କର୍ମଚାରୀଙ୍କ ବେତନ କେବେ ବୃଦ୍ଧି କରାଯିବ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ପୂର୍ବ ସରକାର ରାଜ୍ୟରେ ଲୋକସଭା ଏବଂ ବିଧାନସଭା ନିର୍ବାଚନ ପୂର୍ବରୁ ଗତ ୨୦୨୪ ବର୍ଷ ଫେବ୍ରୁଆରିରେ ଅଙ୍ଗନୱାଡି କର୍ମଚାରୀ ଏବଂ ସେମାନଙ୍କ ସହାୟକଙ୍କ ମାସିକ ପାରିଶ୍ରମିକ ତଥା ଅନ୍ୟାନ୍ୟ ସାମାଜିକ ସୁରକ୍ଷା ସୁବିଧା ବୃଦ୍ଧି କରିବାକୁ ଘୋଷଣା କରିଥିଲେ। ପୂର୍ବରୁ ଅଙ୍ଗନୱାଡି କର୍ମଚାରୀଙ୍କ ମାସିକ ଦରମା ୭,୫୦୦ ରୁ ୧୦,୦୦୦ ଟଙ୍କା ଏବଂ କନିଷ୍ଠ ଅଙ୍ଗନୱାଡି କର୍ମଚାରୀଙ୍କ ଦରମା ୫,୩୭୮ ରୁ ୭,୨୫୦ ଟଙ୍କା ଏବଂ ଅଙ୍ଗନୱାଡି ସାହାୟିକା ୩,୭୫୦ ରୁ ୫,୦୦୦ ଟଙ୍କାକୁ ବୃଦ୍ଧି କରାଯାଇଥିଲା।