ଧୋଇଗଲା ତୁଙ୍ଗଭଦ୍ରା ଡ୍ୟାମ୍ ଫାଟକ
ଓଡ଼ିଆ ନ୍ୟୁଜ,(ବ୍ୟୁରୋ): ବନ୍ୟାପାଣିରେ ଭାସିଗଲା ତୁଙ୍ଗଭଦ୍ରା ଡ୍ୟାମର ଗେଟ । ଗତକାଲି ରାତିରେ କର୍ଣ୍ଣାଟକର ତୁଙ୍ଗଭଦ୍ରା ଡ୍ୟାମରେ ବନ୍ୟା ପାଣି ନିଷ୍କାସନ ସମୟରେ ପାଣିର ପ୍ରଖର ସ୍ରୋତରେ ଡ୍ୟାମର ଏକ ଗେଟ୍ ଭାଙ୍ଗି ଭାସିଯାଇଥିବା ଜଣା ପଡିଛି । ଏହାକୁ ଦୃଷ୍ଟିରେ ରଖି ଡ୍ୟାମ୍ ଡାଉନ ଷ୍ଟ୍ରିମ ଅଞ୍ଚଳକୁ ପ୍ରଶାସନ ପକ୍ଷରୁ ବନ୍ୟା ସତର୍କ ସୂଚନା ଜାରି କରାଯାଇଛି । ସେପଟେ ପ୍ରଶାସନ ପକ୍ଷରୁ ଡ୍ୟାମର ୫ଟି ଗେଟକୁ ଛାଡ଼ି ବାକିଗୁଡ଼ିକୁ ଖୋଲି ଦିଆଯାଇଛି।
ପରିସ୍ଥିତି ଅନୁଧ୍ୟାନ ନିମନ୍ତେ ଉପମୁଖ୍ୟମନ୍ତ୍ରୀ ଡିକେ ଶିବକୁମାର କୋପାଲ ଗସ୍ତରେ ବାହାରିଛନ୍ତି। ଗତ ରାତିରେ ୩୫ହଜାର ଘନଫୁଟ ବନ୍ୟାଜଳ ଜଳବନ୍ଧକୁ ପ୍ରବେଶ କରିଥିଲା। ଫଳରେ ଜଳବନ୍ଧର ୧୯ନମ୍ବର ଫାଟକଟି ଧୋଇ ହୋଇଯାଇଥିଲା। ଗତ ୭୦ ବର୍ଷ ମଧ୍ୟରେ ଏହା ଜଳଭଣ୍ଡାରର ପ୍ରଥମ ବଡ଼ କ୍ଷତି ହୋଇଥିବାରୁ କର୍ତ୍ତୃପକ୍ଷ ଏହାକୁ ଗୁରୁତର ସହ ଗ୍ରହଣ କରିଛନ୍ତି। ତୁରନ୍ତ ମରାମତି କରିବା ନିମନ୍ତେ ଜଳର ପରିମାଣ ୧୦୫ ଟିଏମ୍ସିରୁ ୬୦-୬୫ ଟିଏମ୍ସିକୁ ହ୍ରାସ କରିବାକୁ ଯୋଜନା କରାଯାଇଛି। ଫଳରେ ୫ଟି ଫାଟକ ବ୍ୟତୀତ ଅନ୍ୟ ସମସ୍ତ ଫାଟକ ଖୋଲିବାକୁ ଆଦେଶ ଦିଆଯାଇଛି।
ସୂଚନା ଅନୁସାରେ, ଡ୍ୟାମରୁ ଅଧିକ ମାତ୍ରାରେ ପାଣି ନିଷ୍କାସନ ହେବା ପରେ ଭାସି ଯାଇଥିବା ୧୯ ନମ୍ବର ଗେଟର ମରାମତି କାମ ଆରମ୍ଭ ହେବ ବୋଲି କହିଛନ୍ତି ଡ୍ୟାମ ପ୍ରଶାସନ । ଗେଟ ଭାସିଯିବା ପରେ କୃଷ୍ଣା ନଦୀ କୂଳରେ ରହୁଥିବା ଲୋକଙ୍କୁ ସଜାଗ ରହିବାକୁ କହିବା ସହ ପଡୋଶୀ ରାଜ୍ୟ ଆନ୍ଧ୍ରପ୍ରଦେଶର ଅଞ୍ଚଳବାସୀଙ୍କୁ ମଧ୍ୟ ସତର୍କ ସୂଚନା ଜାରି କରିଛି ପ୍ରଶାସନ । ବର୍ତ୍ତମାନ ଡ୍ୟାମ ମଧ୍ୟରୁ ୮୯ ହଜାର କ୍ୟୁସେସ ଜଳ ନିଷ୍କାସିତ ହେଉଛି।
Comments are closed.