ଅଶାନ୍ତ ହେଉଛି ରାଜଧାନୀ, ବରମୁଣ୍ଡା ବସ୍ଷ୍ଟାଣ୍ଡ ସାମ୍ନାରୁ ମୁଣ୍ଡବିହୀନ ଶବ ଉଦ୍ଧାର
ଓଡ଼ିଆ ନ୍ୟୁଜ୍: ଦିନକୁ ଦିନ ଅଶାନ୍ତ ହେଉଛି ରାଜଧାନୀ। ବରମୁଣ୍ଡା ବସ୍ଷ୍ଟାଣ୍ଡ ସାମ୍ନାରୁ ମୁଣ୍ଡବିହୀନ ଶବ ଉଦ୍ଧାର ହୋଇଛି। ଯାହାକୁ ନେଇ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳି ଯାଇଛି। ପ୍ରାଥମିକ ତଦନ୍ତରୁ ଏହା ଏକ ସମ୍ଭାବ୍ୟ ସଡ଼କ ଦୁର୍ଘଟଣାକୁ ଇଙ୍ଗିତ କରୁଥିବା ବେଳେ ପୋଲିସ ହତ୍ୟା ସମେତ ଅନ୍ୟ ଦିଗରୁ ମଧ୍ୟ ଯାଞ୍ଚ କରୁଛି। ପୋଲିସ ଅନୁଯାୟୀ, ସ୍ଥାନୀୟ ଲୋକମାନେ ସକାଳ ପ୍ରାୟ ୪ଟା ସମୟରେ ରାସ୍ତା କଡ଼ରେ ମୃତଦେହ ପଡ଼ିଥିବା ଦେଖିଥିଲେ।
ସେହି ସମୟରେ ସହରରେ ପ୍ରବଳ ବର୍ଷା ହେଉଥିବାରୁ ରାସ୍ତା ଦେଇ ଯାଉଥିବା ଲୋକମାନେ ବିକୃତ ମୃତଦେହ ଦେଖି ତୁରନ୍ତ ପୋଲିସକୁ ସୂଚନା ଦେଇଥିଲେ। ଖବର ପାଇ ପୋଲିସର ଏକ ଟିମ୍ ଘଟଣାସ୍ଥଳକୁ ଯାଇ ମୃତଦେହକୁ ଉଦ୍ଧାର କରି ପୋଷ୍ଟମର୍ଟମ ପାଇଁ କ୍ୟାପିଟାଲ ହସ୍ପିଟାଲକୁ ପଠାଇଥିଲା। ତେବେ ମୃତକଙ୍କ ପରିଚୟ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ହିଁ ମୃତ୍ୟୁର ସଠିକ୍ କାରଣ ନିଶ୍ଚିତ ହୋଇପାରିବ ବୋଲି ଅଧିକାରୀମାନେ କହିଛନ୍ତି।